Read Kahua 1 SAMUELE 26 Bible Online

1 SAMUELE 26 - Kahua bible

1 SAMUELE 26

¹Tani na mane ni Sipi ka râ me i Gibea i pasina o Saulo ma ka hagarongoa, vi o Tavite ki ahi igê na hungana i Gakila i na akerena na bagamasusu raha i Juta.

²O Saulo ki merarâ na rehagaro gi oru na mane ni me ramo na Isiraelita ma ki tari oto râ igê na bagamasusu raha i Sipi, hanana i bâbâ igê renia o Tavite.

³Ngaia ki tênga i na akerena na tara igê na hungana i Gakila. O Tavite ki gâga mênga igê na masusu, matena i rongo, vi o Saulo ki tabea me ki bâbâ renia.

⁴Ngaia ki hagatorangenira na mane ga râ bâbâ ma. Ngaia ki tarahua, vi o Saulo ki gâga monari i ngekana.

⁵Ngaia ki tari oto râ ma ki tarahua nga na agua, garu mêru so igê o Saulo ma o Abenere karena o Nere, na mane i bêngenira na mane ni me iana o Saulo. O Saulo ki mêru i rarona na tênga ma na mane ni me iana ka tênga rihia.

⁶Hoi, o Tavite ki hagatererua o Agimeleki na Hitita ma o Abisai i mevora o Joaba, kenaterua kani ka Seruia, ki vi: “Ti na hitangimurua i agana vi arâ me heniê tanga na tênga iana o Saulo?” O Abisai ki arami, ki vi: “Inê!”

⁷Hoita, igê na bungiana ngekana o Tavite mo Abisai karu banu igê na tênga iana o Saulo ma karu bâsia o Saulo, i mêru i gupuna na tênga. Ngaia ki hagêrasia so i ano na ora iana hagarangia na bêna. O Abenere ma na mane ni me ka mêru rihia.

⁸O Abisai ki vi tanga o Tavite, ki vi: “Igê na bungiana i ngekê nga God ki tagarenia tangago na merongamu. Hoi, gu nakê be ahura henia na mako renia na ora iana marena. Mareha vi ve ahura hagarako. Hagetage togo ma!”

⁹Ma o Tavite ki vi: “Naka vê! Siana ko erasia. Na Araha ki page hagaitangia nga na enoni i erasia na maneraha i atea.

¹⁰Inê kê tohe renia na Araha mamauri, vi inê kê girara, vi na Araha ngaia marena ki page nahuia ki meme o Saulo igê na mera suri parongana, se i meme igê na hearihatana.

¹¹Na Araha ki manimaniê, vi siana kê nahuia ki meme na ani, na Araha ki bani atea ki maneraha. Naka karu tora pania na ora iana ma na pi na hê ni ve, ma karu migirâ.”

¹²Vikê o Tavite ki tavorerua na ora ma na pi na ve, garu oga i bêrungana o Saulo, ma ngairerua, o Abisai ma ngaia, karu râ. I mareha rârâ ta na enoni, vige bâsia se vige girara, se vige rite. Ngaira hato ka mêru bore, suria na Araha ki tora mamêrugata.

¹³Hoi, o Tavite ki aharêvoro i na apanena râ i na maruguna tanga na botena na hungana, i hagatê maninga.

¹⁴Ngaia ki ngirira o Abenere ma na mane ni me iana o Saulo, ki vi: “Abenere, u rongoê!” O Abenere ki hagate, ki vi: “Ti kani ngerengere ma ki hagaritea na maneraha?”

¹⁵O Tavite ki arami, ki vi: “Abenere, na ruata tanga na maneraha i Isiraele kanigo, iê? Tanu hega kanigo pe girara gu anumasia na maneraha iamu? I ngekê nga ta na enoni ki banu igê na tênga, hanana vi nanahuia ki meme na maneraha iamu.

¹⁶Abenere, igo ko hagêrahu! Inê kê tohe renia na Araha mamauri, vi igamu hato ki ararigamu mu meme, suria mu pe anumasia na maneraha iami, na Araha i atea. Bâ! I he nga na ora iana na maneraha? I he nga na pi na ve i bêrungana na bêna?”

¹⁷O Saulo ki rongogirara na ringena o Tavite, ma ki hagate, ki vi: “Kareku o Tavite, igo ngekana?” O Tavite ki arami, ki vi:

¹⁸“Maneraha, inê ngekê.” Ma ngaia ki hagatea, ki vi: “Maneraha, tanu hega kanigo amani tarigeniê mênga, inê na kariamu. Na ta kanigê katoa? Na ta kanigê erasia?

¹⁹Maneraha, gu rongo! Be vi tangago. Manga vi na Araha kani katogo ko merongasiê, hoi, na vogasiha tanga ki page horoa na aitangihana. Ma ki manga na enoni ma ka katogo ko merongasiê, hoi, na Araha ke hagaitangira, suria ngaira ka tarigeniê hura tenia na apanena iana na Araha tanga na agua getea, ka vi, ‘Râ ku vogasira vê na ataro i ngekana.’

²⁰Siana ko nakara na enoni ka nanahuiê kê meme igê na agua, i mareha vi na agua iana na Araha. Tanu hega na maneraha iata na Isiraelita kani râ me ki vi nahuiê kê meme? Inê na gu ma kani inê! Tanu hega ko gamorahiê manga vi inê ka na marâ vasiga?”

²¹O Saulo ki arami, ki vi: “Inê ki tangahuriê. Gu aporo me o kareku o Tavite! I asa hagetage be page erasigo nikâ, suria igo ko pe nahuiê be me i na bungi akê. Inê kê beka! Na bagatauhaku ki era ngavê!”

²²O Tavite ki arami, ki vi: “Maneraha, na ora iamu ikê. Kasia me na hitangita na me iamu ke râ me ke torea.

²³Na Araha ki korokoro tangara na ani ga toto suria ma ka katogi na tarani ga oto i maana. I ngekê ngaia ki tagarenigo tangê ma inê kê pe erasigo, suria na Araha ki atego ko maneraha.

²⁴Inê kê metanu na mêrihamu i ngekê. Hoi, na Araha ke meêtanu nogaku ma ke hagatahiê tenigi na ara ni bagabevoani!”

²⁵O Saulo ki vi tanga o Tavite, ki vi: “O kareku, God ke korokoro tangago. Igo ko page tavoraha bâkoro igê na ara ni marâ.” Hoi, o Tavite ki râ, ma o Saulo ki aporo i pasina.