Read Kahua 1 SAMUELE 27 Bible Online

1 SAMUELE 27 - Kahua bible

1 SAMUELE 27

¹O Tavite ki tako, ki vi: “I ta na tangiana o Saulo ki page nahuiê kê meme. Na tarana koro tangê be gava tanga i Pilisitia, hanana o Saulo ki hatohato vige page gariê i Isiraele ma inê kê page apeape tatara.”

²Vikê o Tavite ma na tangarê ge ono na me iana ka aharêvoro ototo râ tanga o Akisi na maneraha i Gate karena o Maoko.

³O Tavite ma na me iana henira na ahemata iata ka oga i Gate. O Tavite ki mererârua kaniana gi rua: ka Aginoama ni Jeserele ma ka Abigaile ni Karamele na nâna o Nabala.

⁴Matena o Saulo ki rongo, vi o Tavite ki gava ki râ i Gate, ngaia ki kahu hato vê vige garia nikâ.

⁵O Tavite ki vi tanga o Akisi, ki vi: “Maneraha, manga vi na tamaku koro kanigo, hoi, gu vateê renia na kere hinua be oga igê. I tanu hega, kani vigê gâga henigo igê na hinua raha iamu?”

⁶Vikê o Akisi ki vatea renia na hinua i Sikilage. Haganega tenia na matena ngekana, na maneraha i Juta ka nahunia tare nga i Sikilage.

⁷O Tavite ki oga i Pilisitia surigi na hageha tangahuru matara ono.

⁸Suria na matena ngekana o Tavite ma na me iana ka taharira tare igê na enoni getera: na Gesurita, na Girisita ma na Amalekita, ga bani oga me arihu i na apanena ngekana. Ngaia ki rurugua na apanena iata, ki têa râ i Telama i Sure ma tanga i Esipito.

⁹Ngaia ki mutera na mane ma na gete hato ma ki henahuraura na sipi, na puruka, na tonki, na kamele ma na gahu nikâ. I murina i na ara ni matena i rurugu igê, ngaia ki aporo i pasina o Akisi.

¹⁰O Akisi ki hagatea tare, ki vivi: “I he kanigo râ nikâ ko rurugu igê?” Ma o Tavite ki hagarongoa, vi ngaia ki rurugu i Negeve i Juta, se i na apanena iata na raraha iana o Jeragamele, se i na apanena iata na Kenita.

¹¹O Tavite ki mutera na enoni hato, na mane ma na gete. Tahema ki asa ta na enoni vige râ i Gate, hanana vige hagarongo renia igê na tarana ga katoa ngaia ma na me iana. Ngaia nga ka na tauhana o Tavite, matena i oga i Pilisitia.

¹²O Akisi ki tongesuria o Tavite ma ki tako i obana, ki vi: “Na Isiraelita na goana ka kitenia ngavê. Tahema ngaia ki gâga tare heniê, hanana i tagara tangê.”