Read Kahua 1 SAMUELE 28 Bible Online

1 SAMUELE 28 - Kahua bible

1 SAMUELE 28

¹Ki rârâ ma na Pilisitina ka unira haku na mane ni me iata, hanana viga meraheariha na Isiraelita. O Akisi ki vi tanga o Tavite, ki vi: “Go girara bâkoro nga, vi igo ma na me iamu kamu pane heniê inê igê na hearihatana.”

²O Tavite ki arami, ki vi: “Mako! Inê na kariamu. Igo maremu ko page bâsia na tarana gê page akê me igê.” O Akisi ki vi: “Koro era! Hoi, inê be kasigo ku vora re na mane ni anumasiha iaku mareku tare.”

³Hoi, o Samuele ki bani me, ma na Isiraelita ka bani angisia ma ka bani bagia i hinua iana i Rama. O Saulo ki bani paira hura na mane ni girarasiha ma ni matuha tenia i Isiraele.

⁴Na mane ni me na Pilisitina ka haku ma ka tênga hagarangia na hinua i Suneme. O Saulo ki hagahakura na me na Isiraelita ma ka tênga igê na hungana i Giliboa.

⁵Matena o Saulo ki bâsira na mane ni me na Pilisitina, ngaia ki magu bâraha.

⁶Tahema ngaia ki hagatea na Araha, vi na ta ke katoa. Ma na Araha ki pe aramia rârâ, henaka vi igê na maruteha, se vi igê na hê ni girarasiha, se vi na poropete.

⁷Vikê o Saulo ki bonasira na mane ni hagaotonga iana, ki vi: “Mu garia me na gete i girara i matu, hanana ve mehegirare.” Ngaira ka arami, ka vi: “I Enitore ki gâga igê tani.”

⁸Hoita, o Saulo ki tuguni bâ getea, hanana vi siana na enoni ka bâbâgirara. I bungi me ma ngaia ki mererârua na mane gi rua, hanana i hagatea na gete ngekana. Ngaia ki vi tanga, ki vi: “Gu matu ma ku hagarongoê, vi na ta kani page voravora me. Gu hagatea na atarona na mane gê visia tangago.”

⁹Na gete ki arami, ki vi: “Igo ko bani girara na tauhana na maneraha o Saulo. Ngaia ki bani paira hura na mane ni girarasiha ma ni matuha tenia i Isiraele. Tanu hega kanigo uhungia, vigo hagabekasiê? Go obania vari vigo nahuiê kê meme?”

¹⁰Hoi, o Saulo ki tohe renia na Araha, ma ki vi tanga, ki vi: “Inê kê tohe renia na Araha mamauri, vi i asa rârâ, vive hagaitangigo renia na tarana ngekana.”

¹¹Na gete ki hagatea, ki vi: “Ti kanigo obania vigê hagatea?” O Saulo ki arami, ki vi: “O Samuele.”

¹²Matena na gete ki bâsia râ o Samuele, ngaia ki bagangengere, ma ki vi tanga o Saulo, ki vi: “Tanu hega ko hagabekasiê? Na maneraha o Saulo kanigo!”

¹³Na maneraha ki vi tanga, ki vi: “Siana ko magu. Na ta kanigo bâsia?” Na gete ki arami, ki vi: “Inê kê bâsia na ataro i hurakê me i ano.”

¹⁴O Saulo ki hagatea, ki vi: “I bâ hega?” Na gete ki arami, ki vi: “Na meraha kani hurakê me. Ngaia ki aruha renia na tuguni na aruhana.” O Saulo ki kahu girara, vi ngaia ka no Samuele ma ki susure ki tube so i ano, hanana i hagahigasia.

¹⁵O Samuele ki vi tanga o Saulo, ki vi: “Tanu hega kanigo hagariteê? Tanu hega kanigo uniê me aporo?” O Saulo ki arami, ki vi: “Na tarana raha ki tarahuê ma kê tugupu ngavê. Na Pilisitina ka meêheariha ma God ki kasi reniê. Ngaia ki pe aramiê rârâ nikâ, henaka vi na poropete, se vi igê na maruteha. Tahema inê kê unigo me aporo, hanana vi go hagarongoê renia na tarana ta kani tuguhiê, vigê katoa.”

¹⁶O Samuele ki vi: “Tanu hega kanigo uniê me aporo? Bâ, na Araha ki kasi renigo ma ki merongasigo!

¹⁷Na Araha ki katoa tangago na marâ i bani visia i haraku. Ngaia ki bani hatungigo vigu maneraha ma ki bani kasia o Tavite ki maneraha urusigo.

¹⁸Igo ko aharêngia na ramata iana na Araha ma ko pe mutera ngavê na Amalekita henigi na nahuninga hato iata. Tahema na Araha ki nakagi na bagabevoani ngegê tangago i ngekê.

¹⁹Ngaia ki page tagarenigamu, igo ma na Isiraelita, tangara na Pilisitina. I gomaha, igamu igo ma o karemu, kamu page arâ me suriê. Na Araha ki page tagarenira nikâ na mane ni me na Isiraelita tangara na Pilisitina.”

²⁰Na tamasinga iana o Samuele ki hagamagusia ngavê o Saulo. Tahema ngaia ki parama ma ki vota so ma ki kuni oto i ano. Ngaia ki marusi na apena, suria i pe ngê rârâ igê na tangiana ma na bungiana hagenani.

²¹Na gete ki ura hagarangia râ ma ki bâsia i magu ngavê. Tahema ngaia ki vi tanga, ki vi: “Maneraha, inê kê kasi manavaku, suria gê katoa na tarana go nungia teniê, igo.

²²Hoi, go katoa tangê nogamu na tarana gê nungigo renia. Nakê be hagangêgo. Go ngêngê nga, hanana go gatagata tanga na raoha.”

²³O Saulo ki usi, ki vi: “Inê kê usi vi ve ngê.” Na kariana karu bonasia nogaterua vige ngê. Rârâ ma ngaia ki agana. Ngaia ki aharaga, ki râ ma ki oga i bea.

²⁴Na gete ki hata ni nahuia na karena na puruka, i bani hagatunutunumia. Hemuri ngaia ki tavogi na koni, ki hagarêgi ma ki hahi na bereti, ga pe ahunga renigi.

²⁵Ngaia ki naka na ngêra tangara o Saulo ma na kariana, ma ngaira ka ngê. Ma ngaira ka aporo igê nga na bungiana ngekana.