Read Kahua 1 SAMUELE 29 Bible Online

1 SAMUELE 29 - Kahua bible

1 SAMUELE 29

¹Na Pilisitina ka hagahakura na mane ni me hato iata i Apeke. Na Isiraelita ka tênga igê na ve banga igê na maruguna i Jeserele.

²Ngaira hato na maneraha gi rima na Pilisitina ka meratavo uga tatage: tani ka tangarê ma tani ka rehagaro na mane ni me. O Tavite ma na me iana ka tavo uga i muri tatare henia na maneraha o Akisi.

³Matena na Pilisitina, na mane ga bêngenira na mane ni me, ka bâsira râ na me iana o Tavite, ngaira ka hagate, ka vi: “Na Isiraelita ka râ me ikê tanga na ta?” O Akisi ki arami, ki vi: O Tavite ngekana. Ngaia ka na kariana o Saulo na maneraha i Isiraele. Ngaia ki bani oga me kere arihu heniê. Inê ki asa be hagagege rârâ renia, haganega me tenia na matena i râ me moramora i pasiku.”

⁴Ma na Pilisitina na mane ga bêngenira na mane ni me, ka mangariaga tanga o Akisi, ma ka vi tanga, ka vi: “Gu kasia aporo ke râ tanga na hinua, go bani haganahunia renia. Siana ko naka ki arâ henigami igê na hearihatana suria manga vi mutera na mane ni me iamami, ngaia ki girara i katoa na maneraha iana ki korokoro aporo tanga.

⁵Renia o Tavite kani ngaia. Na gete ka kiria, matena ga mâ, ka vi, ‘O Saulo ki mutera na rehagaro ma na rehagaro ma o Tavite na tangahuru ma na tangahuri rehagaro.’”

⁶O Akisi ki unia o Tavite ma ki vi tanga, ki vi: “Inê kê tohe renia God mamauri iata na Isiraelita, vi igo ko toto suriê tare. Inê kê obania, vi igo ko arâ me heniê tanga na hearihatana ngekana. Inê kê girara, vi igo ko pe erasia rârâ ta na marâ, haganega me tenia na matena go râ me moramora i pasiku. Ma na maneraha getera ka pe obania vikana.

⁷Gu aporo maninga ma. Siana ko hagamangarira.

⁸O Tavite ki arami, ki vi: “Maneraha, na ta kê erasia? Igo ko bani vi, vi inê kê pe erasia rârâ ta na marâ, haganega me tenia na matena gê tagara moramora tangago. Tanu hega kani bara vi ve râ henigo, maneraha iaku, hanana ve meraheariha na merongamu?”

⁹O Akisi ki arami, ki vi: “I monari, inê kê tongesurigo, manga vi igo ka na angero God ki kasia me. Ma na ani getera na maneraha ka bani vi, vi igo ki bara vigu râ me henigami tanga na hearihatana.

¹⁰Hoita, o Tavite, i gomaha mavoraro, igamu hato mu pania o Saulo ma kamu pane heniê, kamu bani riterite ma kamu aporo matena i tangitangi râ.”

¹¹Vikê o Tavite ma na me iana ka tavoraha, matena i tangi me, ma ka aporo tanga i Pilisitia. Na Pilisitina ka râ nga tanga i Jeserele.