Read Kahua 1 SAMUELE 3 Bible Online

1 SAMUELE 3 - Kahua bible

1 SAMUELE 3

¹O Eli ki hagaotoa na kare mane o Samuele igê na tagaraha ni vogasiha tanga na Araha. I na mateni ngegana na Araha ki tamasi ma ki hagamarutera na enoni i ta na matena ma.

²O Eli ki sugi vahagaga ngavê na maana. I ta na bungiana ngaia ki mêru i na kiboru iana.

³O Samuele ki mêru i na kiboru apuna i oga igê na bokesi na suruheri iana God. Matena igê na hagahogotana ngavê matena na laiti ki tarê mênga,

⁴na Araha ki unia o Samuele. O Samuele ki arami, ki vi: “Oi, Araha!”

⁵Ngaia ki tango râ i pasina o Eli ma ki vi: “Igo kanigo uniê? Inê ikê!” O Eli ki arami, ki vi: “Inê kê pe unigo. Aporo ku mêru.” Vikê o Samuele ki aporo ki mêru.

⁶Na Araha ki unia nikâ o Samuele. Vikê o Samuele ki aharaga, ki râ i pasina o Eli ma ki vi: “Igo kanigo uniê? Inê ikê!” Ma o Eli ki arami, ki vi: “Mareha, kareku. Inê kê pe unigo. Aporo ku mêru.”

⁷Na kere mane o Samuele ki pe girara, vi na Araha kani unia, suria ngaia ki na matena na Araha ki kahu tamasi moramora tanga igê.

⁸Na Araha ki unia o Samuele na oruta na matena. O Samuele ki aharaga, ki râ i pasina o Eli ma ki vi: “Igo kanigo uniê? Inê ikê!” Hoi, o Eli ki kahu tahetara, vi na Araha nga kani unia na kere mane.

⁹Tahema ngaia ki vi tanga, ki vi: “Aporo ku mêru! Ma ki manga vi unigo nikâ, go vivi, ‘Araha, gu tamasi. Na kariamu kani inê gê karingago.’” Vikê o Samuele ki aporo ki mêru.

¹⁰Na Araha ki râ ki ura so i ngekana ma ki unia nikâ manga i nago, ki vi: “Samuele! Samuele!” O Samuele ki arami, ki vi: “Araha, gu tamasi. Na kariamu kani inê, gê karingago.”

¹¹Na Araha ki vi tanga, ki vi: “I ta na tangiana inê kê page katoa ta na tarana tangara na Isiraelita. Na tarana ngekana ki page hagamagusira ngavê. Na ani mavê na enoni i rongoa ki page anumanuma ngavê.

¹²I ngekana inê kê page hagamonarigi tangara na ahemata iana o Eli na ara ni hinarunga hato iaku, mareha vige hitahita râ tani.

¹³Inê kê bani vi tanga o Eli, vi inê kê page hagaitangia na ahemata iana tare ki bê ki arâ, suria o karena karu tamasi erasiê. O Eli ki bani girararerua garu kato vikana ma ki pe ura pusirerua.

¹⁴Tahema inê kê tohe, vi i mareha rârâ na vogasiha se vi na votovoto, ge girara vige hagamagahurua tenira na ahemata iana o Eli na hagaitangiha meni na bagatauhata.”

¹⁵O Samuele ki tâ so i banana mataro me ki tangi. Hemuri ngaia ki aharaga ma ki tangahigi na maani ruma i ruma iana na Araha. Ngaia ki magu, hanana vige hagarongoa o Eli renia na maruteha iana.

¹⁶O Eli ki unia, ki vi: “Kareku Samuele.” O Samuele ki arami, ki vi: “Oi, inê akê.”

¹⁷O Eli ki hagatea, ki vi: “Na ta ki visia tangago na Araha? Siana ko pinihia ta na marâ teniê. God ki page hagaitangigo ngavê, manga vigo pinihia ta na marâ teniê.”

¹⁸Vikê o Samuele ki hagarongoa renigi na ara ni marâ hato. Ngaia ki pe pinihia rârâ ta na marâ. O Eli ki vi: “Na Araha ngekana. Ngaia ki page katogi na tarani i takusigi vi oto ngavê.”

¹⁹O Samuele ki raha ki râ. Na Araha ki ngahisia ma ki hagamonarigi na ara ni marâ i visigi o Samuele.

²⁰Vikana na Isiraelita hato suria na apanena hagenani ka girara, vi i monari o Samuele ki na poropete iana na Araha.

²¹Na Araha ki ama ni voravora nga me i Silo i na agua i bani vora me igê tanga o Samuele ma ki bani tamasi igê tanga. Matena i tamasi o Samuele, na Isiraelita hato ka karinga maninga.