Read Kahua 1 SAMUELE 31 Bible Online

1 SAMUELE 31 - Kahua bible

1 SAMUELE 31

¹Na Pilisitina ka meraheariha na Isiraelita igê na hungana i Giliboa. Na Isiraelita rako ka me ma na ani ga tahi râ henira na maneraha o Saulo ma o karena, ngaira ka gava.

²Ma na Pilisitina ka tarigenira ma ka nahuira ka me o karena gi oru o Saulo: o Jonatane, o Abinataba ma o Malakisua.

³Na hearihatana ki ama ni akê bâraha nga tanga o Saulo. Na mage iata na merongana ka takea, ma ki mamari ngavê.

⁴Ngaia ki vi tanga na mane haoru i toregi na tangaruha iana, ki vi: “Gu amuria na tatapa borahu iamu ma ku nahuiê be me, i era ma na ahuroto na Pilisitina ka hagamamasiagê ma ka nahuiê kê me.” Ma na kariana ki magu vige kato vikana. Vikê o Saulo ki têa na tatapa borahu iana marena ma ki suta marena igê.

⁵Na kariana ki bâsia vi o Saulo ki me. Vikê ngaia nogana ki suta marena igê na tatapa borahu iana ma ki me henia o Saulo.

⁶O Saulo mo karena gi oru ma na mane haoru ka me vikana. Na me hato iana o Saulo ka me igê nga na tangiana ngekana.

⁷Matena na Isiraelita i na apanena tarê na maruguna i Jeserele ma i kerekê i ve i Jotano ka rongo, vi na mane ni me na Isiraelita ka bani gava ma o Saulo mo karena ka bani me, ngaira ka gava panigi na hinua iata. Hemuri na Pilisitina ka râ me ma ka ogasigi.

⁸Na tangiana i murina na hearihatana na Pilisitina ka râ ka rurugu tenigi na gahuata na Isiraelita. Ngaira ka tarahugi na gahuata o Saulo mo karena gi oru, ga tâtâ igê na hungana i Giliboa.

⁹Ngaira ka retenguria na bêna o Saulo, ka tasigi na tuguni ni hearihatana iana ma ka hagatorangenirerua na mane tora tamasinga henigi suria i Pilisitia hagenani, hanana ga tarohenia na rongoha koro tangara na ataro iata ma tangara na enoni.

¹⁰Hemuri ngaira ka nakagi na tangaruha iana o Saulo igê na ngêsu iana ka Asetareta na ataro. Ngaira ka rapusia na gahuana o Saulo igê na para ni hinua i Betesane.

¹¹Matena na ai ni Jabesi i Giliata ka rongoa na tarana ga katoa na Pilisitina tanga o Saulo,

¹²na mane ni me ramo iata ka tavoraha ma ka tavo uga suria na bungiana hagenani tanga i Betesane. Ngaira ka tavogi so na gahuata o Saulo mo karena tenia na para ni hinua ma ka migiaporo tanga i Jabesi ma ka sungigi igê.

¹³Ngaira ka tora na surita ma ka ahunigi i mamarugana na apinige i hinua. Ngaira ka hari surigi na tangiani gi pi.