Read Kahua 1 SAMUELE 4 Bible Online

1 SAMUELE 4 - Kahua bible

1 SAMUELE 4

¹I na matena ngekana na Pilisitina ka haku tanga viga meraheariha na Isiraelita. Tahema na Isiraelita ka tavo uga ka meraheariha. Na Isiraelita ka tênga i Ebenesere ma na Pilisitina ka tênga i Apeke.

²Na Pilisitina ka taharira na Isiraelita. Na hearihatana ki ramo. Ngaira ka teharira na Isiraelita ma ka nahuira ka me na ararina na 4, 000 na mane ni me igê na agua ga heariha igê.

³Matena na ani ga tahi ka aporo igê na tênga, na enoni raha iata na Isiraelita ka vi: “Tanu hega na Araha ki nakara na Pilisitina ka teharigia i ngekê? Nika ge râ i Silo ma ke torea na bokesi na suruheri iana na Araha, hanana ngaia ke ngahisigia ma ke hagatahigia tenira na merongaka.”

⁴Vikê ngaira ka hagatorangenira na mane tora tamasinga ka râ i Silo ma ka torea me na Bokesi na Suruheri iana na Araha raramohaga hunia, i avorata na angero. O Gopini mo Pinegasi karena o Eli karu merâ me na Bokesi na Suruheri.

⁵Matena i ata me na Bokesi na Suruheri, na Isiraelita ka kasi mamava ni vagevageha. Tahema na mako ki angingi.

⁶Na Pilisitina ka rongoa na mamavaniha ma ka vi: “Rongo! Na Isiraelita ka kasi mamava igê na tênga iata. Ta na tarana vari?” Matena ga girara vi na Bokesi na Suruheri iana na Araha ki ata me igê na tênga iata na Isiraelita,

⁷ngaira ka magu. Ngaira ka vi: “E, ta na ataro kani râ me igê na tênga iata. Igia ka hatohato nge! I mareha rârâ ta na tarana vikana vige bani tarahugia me i nago!

⁸Ti kani girara ki hagatahigia tenira na ataro raramohaga vigana? Ngaira ka na ataro ga mutera na ai ni Esipito igê na bagamasusu raha!

⁹Igia na Pilisitina ke uhungia nga ke ramo! Ke meraheariha manga vi na mane kani igia, i era ma ka vora re na kare rakuraku iata na Isiraelita, manga ngaira ga vora re hagenago na kare rakuraku iaka. Hoi, ge meraheariha manga vi na mane kani igia!”

¹⁰Na Pilisitina ka meraheariha ramo na Isiraelita ma ka teharira. Na Isiraelita ka gava ka aporo i pasita. Na henahuita ki raha ngavê. Na 30,000 na mane ni me na Isiraelita ka me.

¹¹Na Pilisitina ka henahuraua na Bokesi na Suruheri iana God ma ka nahuirerua karu me o Gopini mo Pinegasi karena o Eli.

¹²Ta na mane tenia na varo ninuni iana o Benamino ki gava tenia na agua ga heariha igê tanga i Silo igê nga na tangiana ngekana. Ngaia ki tarisigi na tuguni iana ma ki makomakoga na bêna, suria i hetaki bâraha.

¹³O Eli ki oga igê na âgâga iana i na akerena na tara, ki naasia na rongoha renia na Bokesi na Suruheri, suria i tako bâraha renia. Na mane ki hagarongo rârâ suria na hinua hagenani. Na enoni hato ka magu ma ka heangisi.

¹⁴O Eli ki rongora ma ki hagate, ki vi: “Tanu hega kaniga heangisi?” Na mane ki tango râ tanga o Eli ma ki hagarongoa.

¹⁵O Eli ki tonga na 98 harisi iana ma ki sugi vahagaga ngavê na maana.

¹⁶Na mane ki vi: “Inê kê gava tenia na hearihatana ma kê tango tare me ikê i ngekê.” O Eli ki hagatea, ki vi: “Kareku, na tarana ta ngekana?”

¹⁷Na mane tora tamasinga ki arami, ki vi: “Na Isiraelita ka gavatenira na Pilisitina. Ngaira ka tê erasigami ngavê. Ngaira ka nahuirerua nikâ o karemu o Gopini mo Pinegasi, ma ka henahuraua na Bokesi na Suruheri iana God tenigami.

¹⁸Matena na mane ki visia na Bokesi na Suruheri, o Eli ki apuri hagarenga igê na âgâga iana hagarangia na maani para ni hinua. Ngaia ki merahaga ma ki biga ngavê. Tahema ki manguri na riona, matena i vota, ma ki me. Ngaia ki bani hagaotora me na Isiraelita surigi na tangahuri harisi ge he.

¹⁹Ka hungâna o Eli, kaniana o Pinegasi, ki obara ma ki sugia ma vige apara. Matena i rongoa, vi na Pilisitina ka bani henahuraua na Bokesi na Suruheri iana God ma o hungâna ma o vaniana karu bani me, ngaia ki parama ma ki riki na gerina ma ki apara.

²⁰Matena i meme noga, na gete ga hagapara ka vi tanga, ka vi: “Gu ramo! Na kare mane kanigo apara!” Ma ngaia ki pe karingara ma ki pe aramira.

²¹Ngaia ki hêtana na kare mane vi o Ikabote, i vi raramohana God ki hato tenia i Isiraele. Ngaia ki takusia na Bokesi na Suruheri ga henahuraua ma o hungâna ma o vaniana garu me.

²²Na raramohana God ki hato tenia i Isiraele, suria na Pilisitina ka henahuraua na Bokesi na Suruheri iana God.