Read Kahua 1 SAMUELE 6 Bible Online

1 SAMUELE 6 - Kahua bible

1 SAMUELE 6

¹Matena na Bokesi na Suruheri iana na Araha ki bani oga me i Pilisitia surigi na hageha gi pi,

²na enoni ka unira me na mane ni vogasiha ma na mane ni girarasiha, ma ka hagatera, ka vi: “Gami henaka na Bokesi na Suruheri iana na Araha? Manga vigami kasia aporo tanga na agua i râ me tenia, na ta kanigami kasia henia?”

³Ngaira ka arami, ka vi: “Manga mu kasia aporo na Bokesi na Suruheri iana God iata na Isiraelita, hoi, siana kamu kasia aporo ngaia getea. Mu kasigi nga hete henia na votovoto meni na bagaparongami. Vikana igamu kamu page mavomavo ma kamu page girara, vi tanu hega ngaia kani ama ni hagaitangigamu nga.”

⁴Na enoni ka hagatera, ka vi: “Na ani ta na votovoto kanimi hagaguhi tanga?” Ngaira ka arami, ka vi: “Na golo gi rima na nununi na garu ma na golo gi rima na nununi na kiki, suria na maneraha i Pilisitia ka vora gi rima ma. Na garu ki tarahugamu hato, igamu ma na maneraha gi rima.

⁵Mu tagarahigi nga na nununi na garu ma na nununi na kiki, ga erasia na apanena iami, ma kamu hagahigasia nga na God iata na Isiraelita renigi. Vikana ngaia ki hato, vige page hagaitangigamu vari, igamu, na ataro iami ma na apanena iami.

⁶Siana kamu guguruga manga na maneraha i Esipito henira na kariana! Takusia manga i he God ki hagaitangira na ai ni Esipito mataro me ka nakara na Isiraelita ka hura pania i Esipito.

⁷Hoita, mu tagarahia na kati haoru. Mu hagarêrerua na puruka, garu hagasusu kareterua, ma ki mamênga vige hagatagarahirerua. Mu kuharenia na kati igê na totora i rioterua. Mu purusirerua aporo na kareterua igê na ruma ni puruka.

⁸Mu naka na Bokesi na Suruheri iana na Araha igê na kati. Na golo na nununi, mu hagaguhi tanga na Araha meni na bagaparongami, kamu nakagi igê na bokesi getea, ma kamu naka igê nikâ na kati. Mu kasia vê na kati ki arâ marena.

⁹Mu bâsia maninga i he ki arâ igê. Manga vi ngaia ma ki arâ tanga na hinua i Bete Semesi, hoi, ngaia ki vi, vi God iata na Isiraelita kani hagaitangigia ngavê vikana. Ma ki manga i mareha, hoi, igia ka kahu girara, vi ngaia ki mareha vige hagaitangigia renia na garu. Ngaia ki ata ni vora ma me vikana.”

¹⁰Hoi, ngaira ka râ surigi na tamasinga iata. Ngaira ka hagarêrerua na puruka gi rua ma ka kuharenia na kati tangarerua ma ka purusirerua banu na kareterua igê na ruma ni puruka.

¹¹Ngaira ka naka na Bokesi na Suruheri igê na kati henia na bokesi ga oga igê na golo na nununi na kiki ma na garu.

¹²Na puruka karu oto râ igê na tara tanga i Bete Semesi ma karu râ suria, mareha vi garu aharoharo rârâ. Ngairerua karu angi gogogo matena garu râ. Na maneraha gi rima iata na Pilisitina ka râ hagêrurerua mataro me ka tariha igê na pereperegana i Bete Semesi.

¹³Na ai ni Bete Semesi ka ruguni na koni igê na maruguna. Ngaira ka ahaukê ma ka kone, matena ga bâsia na Bokesi na Suruheri. Ngaira ki koro ngavê na apeta, matena ga bâsia.

¹⁴Na kati ki râ me i mu iana na mane ga hêtana vi o Josua. I pasina kani i Bete Semesi. Na kati ki tâ so hagarangia na bagahê raha. Na enoni ka hogea na kati tangagi na ario, ka nahuirerua karu me na puruka ma ka susu tanga na Araha renirerua.

¹⁵Na mane ni hagarahenga ka bani ragererua râ na Bokesi na Suruheri iana na Araha ma na bokesi ga oga igê na golo na nununi ma ka nakarerua so igê na bagahê raha. Na me i Bete Semesi ka vogasia na Araha ma ka susu tanga.

¹⁶Na maneraha gi rima iata na Pilisitina ka bâsira râ ga kato vikana ma ka kahu aporo i Ekeroni igê nga na tangiana ngekana.

¹⁷Na Pilisitina ka hagatorangenigi na golo gi rima na nununi na garu tanga na Araha meni na bagatauhata, na ani gi tage tenia na ara ni hitangini na hinua i Asetote, i Gasa, i Asekeloni, i Gate me Ekeroni.

¹⁸Ngaira ka hagatorangenigi na golo na kiki nikâ. Na golo na kiki ka vora gi rima, na ani gi tage tenia na ara ni hitangini na hinua, na maneraha iata na Pilisitina ka tonganigi ka bâsurigi, na ani ga tonga renigi na para ma na ani i mareha. Na bagahê raha i mu iana o Josua ni Bete Semesi, ga naka igê na Bokesi na Suruheri iana na Araha, ngaia ki gâga mênga i ngekana. Ngaia ki na girarana mênga na tarana ngekana.

¹⁹Na Araha ki nahuira ka me na tangahuru gi pi na mane ni Bete Semesi, suria ga pe hagahigasia na Bokesi na Suruheri ma ka bâ i rarona. Na enoni ka angi maramara, suria na Araha ki mutera rako na hitangita.

²⁰Na ai ni Bete Semesi ka vi: “Ti ki girara i rêra i maana na Araha God i apuna ngavê? I he kaniga girara ga kasia râ igê tenigia?”

²¹Vikê ngaira ka hagatorangenira na mane tora tamasinga tangara na ai ni Kiriata Jearimi, ka vi: “Na Pilisitina ka bani hagapurusia me na Bokesi na Suruheri iana na Araha. Râ me kamu torea.”