Read Kahua 1 SAMUELE 7 Bible Online

1 SAMUELE 7 - Kahua bible

1 SAMUELE 7

¹Hoi na ai ni Kiriata Jearimi ka torea na Bokesi na Suruheri iana na Araha ma ka naka i ruma iana o Abinataba, i oga igê na hungana. Ngaira ka hagapua o Eleasare o karena ki bâsuria.

²Na Bokesi na Suruheri iana na Araha ki oga arihu i Kiriata Jearimi, na ararina na harisi tangahuru gi rua. Surigi na matena ngegana na Isiraelita hato ka avarasia igê na Araha.

³O Samuele ki vi tangara na Isiraelita, ki vi: “Manga mu aharia na Araha i mêrihami hagenani, ki tuguhigamu, vigamu kasigi râ na nunuta hato na ataro, na ani mane ma na ani hehene, mu toregi tenira na enoni getera. Mu nakagamu maremi ngavê tanga na Araha ma kamu vogasia ngaia getea ma. Vikana ngaia ki page hagatahigamu tenia na raramohata na Pilisitina.

⁴Hoita na Isiraelita ka kasigi râ na nunuterua o Bala ma ka Asetareta ma ka rahesia ma na Araha.

⁵Hemuri o Samuele ki vi: “Igamu na Isiraelita hato mu hakuhaku me nga i Misipa. I ngekana inê kê page nungia igê na Araha tangagamu.”

⁶Vikê ngaira hato ka haku i Misipa. Ngaira ka titi ve ma ka karangigi manga na vogasiha tanga na Araha. Ngaira ka hari igê na tangiana hagenani ngekana, ma ka vi: “Igia ka haritohea na Araha.” O Samuele ki hagaotogi na berarogata na Isiraelita i ngekana i Misipa.

⁷Matena na Pilisitina ka rongo, vi na Isiraelita ka haku i Misipa, na maneraha gi rima iata ka tavo uga henira na mane ni me iata, hanana ga taharira. Na Isiraelita ka rongo vikana ma ka magu.

⁸Ngaira ka vi tanga o Samuele, ka vi: “Gu ama ni avarasia nga na Araha God iaka, ke hagatahigia tenira na Pilisitina.”

⁹O Samuele ki nahuia na karena sipi ma ki susu renia hagenani tanga na Araha. Hemuri ngaia ki avarasia na Araha tangara na Isiraelita ma na Araha ki aganaria na avarasiha iana.

¹⁰Matena i vogasi mênga o Samuele, na Pilisitina ka sugarira na Isiraelita. Igê nga na matena ngekana na Araha ki katoa na gugusuhia hurira. Ngaira ka bagatatako ngavê ma ka tupugu. Ngaira ka gava.

¹¹Na Isiraelita ka tavo uga hura i Misipa ma ka tarigenira na Pilisitina, ka râ ka tariha i Betekare ma ka nahuira gogogo i tara.

¹²Hemuri o Samuele ki torea na hê ma ki hagêrasia i berarogaterua i Misipa me Sene, ma ki vi: “Na Araha ki tamanigia tare rârâ ma ki mataro me i ngekê.” Tahema ngaia ki hêtana na hê ngekana vi ‘na hê ni hetamaniha.’

¹³Vikê na Pilisitina ka vato ma na Araha ki hagabarasira, vi siana ka bêbanu igê na apanena iata na Isiraelita mataro me ki me o Samuele.

¹⁴Na ara ni hinua hato i berarogaterua i Ekerone me Gate na Pilisitina ka bani henahuraugi, ngaigi ki aporo me hato tangara na Isiraelita. Vikê na Isiraelita ka nahunia aporo na apanena iata hagenani. Ma ki oga nikâ na marapeha i berarogata na Isiraelita ma na Kananita.

¹⁵O Samuele ki hagaotoa i Isiraele mataro me ki me.

¹⁶I na ara ni harisi ngaia ki vatugigi igê na hinua i Betele, i Gilegale me Misipa ma ki hagaotogi na berarogata na enoni igê.

¹⁷Hemuri ngaia ki aporo i pasina i Rama, ma i ngekana nikâ ngaia ki hagaotogi igê na berarogata na enoni. Ngaia ki tagarahia i Rama na bea ni vogasiha tanga na Araha.