Read Kahua 1 SAMUELE 8 Bible Online

1 SAMUELE 8 - Kahua bible

1 SAMUELE 8

¹Matena o Samuele ki merahaga, ngaia ki kasirerua o karena, karu mane ni hagaotonga i Isiraele.

²O karena hagenago ka no Joele ma o karena hagemuri ka no Abia. Ngairerua karu mane ni hagaotonga i Bereseba.

³Ngairerua karu pe râ suria na parongana o vaematerua. Ngairerua karu vanasigi ma na haga. Tahema ngairerua karu aganarigi na vatevate ma karu pe surira na enoni igê na otoha.

⁴Tahema na enoni raha hato iata na Isiraelita ka haku ma ka râ i Rama i pasina o Samuele.

⁵Ngaira ka vi tanga, ka vi: “Bâ, igo ko merahaga ma o karemu karu pe râ suria na parongamu. Hoita, gu kasia ta na mane ke maneraha, hanana ge marungigami. Vikana igami kami nahunia na maneraha mangagi na agua getigi.”

⁶Na nungiha iata ngekana o Samuele ki pe obania. Tahema ngaia ki nungi ki rongo tarana i pasina na Araha.

⁷Na Araha ki vi tanga, ki vi: “Gu aganarigi na ara ni marâ na enoni ka obanigi. I mareha vi igo kaniga usitenigo. Ngaira ka usiteniê inê hete na Araha iata.

⁸Haganega me tenia na matena gê bêngenira hura igê tenia i Esipito, ngaira ka bani murisigeê tare ma ka bani vogasira tare na ataro. I ngekê ngaira ka katogo manga inê ga bani katoê me vikana.

⁹Hoi, gu aganaria na obaniha iata. Gu haganunura maninga ma ko ramatenia tangara ka girara, vi manga i he ki mataku tangara viga gâga i ruguhana na maneraha.”

¹⁰O Samuele ki hagarongora na enoni ga obania na maneraha renigi na ara ni marâ na Araha ki bani visigi tanga.

¹¹O Samuele ki ramatenira, ki vi: “Na maneraha iami ki page katogamu vikê. Ngaia ki page torera o karemi tenigamu, hanana ga voravora re na mane ni me. Tani na hitangita ka page mane ni me igê na kati ni me iana; tani ka page mane ni me igê na hosi iana ma tani ka page tavotavo uga ka nanago tarani na kati ni me iana.

¹²Tani na hitangita ngaia ki page nakara ka bêngenira na rehagaro na mane ni me, ma tani ngaia ki page nakara ka bêngenira na tangahuru gi rima na mane ni me. O karemu ka page tagarahigi na mu iana, ka page ruguni haku me na ngêra tanga, matena ga mêa na mu ma ka page tagarahigi na tangaruha iana ma na marâ tangagi na kati ni me iana.

¹³Ka karemi ka page tagarahigi tanga na marâ i sigini koro, ka page hagamako ngêra tanga ma ka page hahahi na bereti tanga.

¹⁴Ngaia ki page taugi tenigamu na mako koro iami, na pariki koro ni vaini iami, ma na pariki koro ni olive iami, ma ki page haganahunira na mane igê na gavumane iana renigi.

¹⁵Ngaia ki page tavotavo tenigamu na ara ni tangahuruta na koni ma na vaini iami tangara na enoni ni tagaraha i ruma raha iana.

¹⁶Ngaia ki page torera vê tenigamu na enoni ni tagaraha iami, na ani koro na puruka ma na tonki iami, hanana ga tagara tanga ma ngaia.

¹⁷Ngaia ki page tavotavo tenigamu na tangahuruta na sipi ma na goti iami. Ma igamu maremi kamu page voravora re na kare rakuraku iana.

¹⁸Hoi, vikana igamu kamu page hagagege ngavê renia na maneraha iami, mu atea maremi. Ma na Araha ki asa vige botage renigamu.”

¹⁹Na enoni ka pe tê ringena o Samuele. Ngaira ka vi: “Mareha vê! Igami kami obania nga na maneraha,

²⁰hanana mi mangara na enoni igê na agua getigi. Igami kami obania nga na maneraha iamami maremami, hanana i bêngenigami igê na hearihatana ma ki ngahisigami igê na henahuita.”

²¹Matena o Samuele ki karingagi hato na tamasinga iata, ngaia ki râ ki hagarongoa na Araha renigi.

²²Na Araha ki arami, ki vi: “Gu aganaria na obaniha iata ma ku kasia ta na mane ke maneraha tangara.” Hemuri o Samuele ki vi tangara na Isiraelita hato ka aporo i pasita.