Read Kahua 1 SAMUELE 9 Bible Online

1 SAMUELE 9 - Kahua bible

1 SAMUELE 9

¹Igê na apanena iana o Benamino ta na mane o Kise na atana ki oga i ngekana. Ngaia ki no karena o Abiele. O Serore ki no virana. Ngaia ki na raraha iana o Bekorate ta na apanena na hagosi ninuni iana o Apia. Ngaia ki ruruguha ma na enoni ka hagahigasia.

²O karena ki no Saulo. Ngaia ki na mane haoru, i bâkoro ma ki ramo. Mareha rârâ ta na enoni i Isiraele, vige bâkoro manga ngaia. Na ara ni enoni ka ura ka tariha ma i gaparana.

³Ta na tangiana tani na tonki iana o Kise ka tarupe. Tahema ngaia ki vi tanga o Saulo, ki vi: “Gu merâ na hitangita na mane tagara ma kamuru garira na tonki.”

⁴Ngairerua karu gari makira igê na hungani i Eparaimi ma i na apanena i Salisa, ma ki mareha vigaru tarahura. Vikê ngairerua karu gari makira i na apanena i Salimi ma na tonki ka mareha rârâ i ngekana nikâ. Hemuri ngairerua karu gari makira nikâ i na apanena iana o Benamino ma karu pe tarahura nikâ i ngekana.

⁵Matena garu tariha i na apanena i Supu, o Saulo ki vi tanga na kariana, ki vi: “Garu aporo i hinua, i era ma o vaemaku ki tako bâraha renigerua teharira na tonki.”

⁶Na kariana ki arami, ki vi: “Naka noga! I hinua garu hagarangia ki gâga igê na poropete. Na enoni hato ka hagahigasia bâraha, suria ga monari tare na tamasinga iana. Garu râ i pasina. Vari ngaia ki girara i visia tangagerua, vi i he karu garira garu page tarahura igê na tonki.”

⁷O Saulo ki hagatea, ki vi: “Manga garu arâ i pasina, na ta kanigaru page vatea? Na anga iakerua ka baguru renigi na ngêra. Igerua karu pe nahunia rârâ ta na marâ, hanana vigaru vatea renia, iê?”

⁸Na kariana ki arami, ki vi: “Inê kê nahunia na kere maana na siliva. Inê kê girara gê vatea renia, ma ngaia ki kahu hagarongogerua, vi i he kanigaru girara garu page tarahura igê.”

⁹O Saulo ki arami, ki vi: “E, na tarana koro ngekana! Nika râ!” Vikê ngairerua karu râ tanga na hinua i oga igê na poropete. Matena garu tagere vê tanga na hinua, ngairerua karu tarahura tani na kere gete, ga so me ka titi ve. Ngairerua karu hagatera na kere gete, karu vi: “I hega, na mane ni girarasiha ki gâga i hinua se i mareha?” Igê na mateni ngegana na poropete ka visia vi na mane ni girarasiha. Tahema manga vi ta na enoni ma ki obania vi hagate tarana ta na marâ i pasina God, ngaia ki vivi, ‘Gê râ i pasina na mane ni girarasiha.’

¹²Na kere gete ka arami, ka vi: “Ngaia kani gâga. Ngaia kani kahu râ ma me hagenago taramurua. Manga muru gapahuru, muru girara muru tarahua. Muru girara muru tarahua ototo râ i hinua, matena muru atata vê. Ngaia ki ata râ i hinua i ngekê, suria na enoni ka sugia ma vige vogasi igê na bea ni vogasiha igê na hungana. Na enoni ga guhira me ngaira ka bani naasia noga, hanana i hagapua na vogasiha ma ka kahu ngênge. Manga muru arâ i ngekê, igamurua kamuru page tarahua i nago tarana i tagere igê na hungana tanga i ngênge.”

¹⁴Hoita, o Saulo ma na kariana karu tagere tanga na hinua. Matena garu ata vê, ngairerua karu tarahua o Samuele i hura me ki tarahurerua, hanana vi arâ tanga na agua ni vogasiha.

¹⁵Hoi, igê na tangiana i hato, na Araha ki bani vi tanga o Samuele, ki vi:

¹⁶“I gomaha i na matena manga i ngekê inê kê page hagatorangenia tangago ta na mane tenia na varo ninuni iana o Benamino. Go monea, hanana i marungira na kariaku na Isiraelita. Ngaia ki page hagatahira tenira na Pilisitina. Inê kê bani giraragi na mamasiaganiha iata na kariaku ma kê bani rongogi na avarasiha iata.”

¹⁷Matena o Samuele ki bâsia o Saulo, na Araha ki vi tanga o Samuele, ki vi: “Nga na mane gê hagarongogo renia kani ikê. Ngaia ki page marungira na kariaku.”

¹⁸Hoi, o Saulo ki ura râ i pasina o Samuele, i oga hagarangia na maani para ni hinua, ma ki hagatea, ki vi: “Igo ko girara vari, vi i he kani gâga igê na mane ni girarasiha?”

¹⁹O Samuele ki arami, ki vi: “Inênga nga na mane ni girarasiha. Gu nanago taraku tanga na agua ni vogasiha. Igo ma na kariamu kamuru page ngêngê heniê i ngekê. I gomaha mavoraro inê kê page aramigi na hagatenga hato iamu ma kê kahu nakagamurua vê kamuru arâ.

²⁰Tangara na tonki, ga bani tarupe surigi me noga na tangiani gi oru, siana kamuru tako bâraha renira. Ngaira ka bani tarahura. Ma o ti kani page nahunia na marâ, na Isiraelita ka barigia bâraha ngavê? Igamu, igo ma na ahemata iana o vaemamu vari?”

²¹O Saulo ki arami, ki vi: “Inê kê tenia na varo ninuni iana o Benamino. Na raraha iana o Benamino ka pe rako ngavê i Isiraele, ma na apaparaha i râ me ki tarahuê ki pe nahuni ramoha rârâ mangara na apaparaha getera i rarona na varo ninuni iana o Benamino. Tanu hega kani go tamasi tangê vikana?”

²²Hoi, o Samuele ki mereruabanu o Saulo ma na kariana igê na ruma ni ngauha ma ki kasirerua karu oga so igê na bêna na vagatari henira na ararina na tangahuru gi oru na enoni ga guhira me.

²³O Samuele ki vi tanga na mane i hagamako, ki vi: “Torea me na mavorona na ganiana, gê bani vatego ko naka râ.”

²⁴Vikê na mane i hagamako ki torea me na êgana na otona na ganiana ma ki naka so tanga o Saulo. O Samuele ki vi: “Bâ, na êgana na ganiana ga naka râ tangago kani ikê. Gu ngêa. Inê kê naka ki oga karigo, hanana go ngaua i ngekê henira na enoni, gê guhira me.” Hoi o Saulo ki ngê henia o Samuele igê na tangiana ngekana.

²⁵Hemuri ngaira ka vato tenia na agua ni vogasiha tanga na hinua. Ngaira ka hagarêa na bea tanga o Saulo igê na gerina aberabera na ruma.

²⁶Ngaia ki mêru i ngekana. Matena i tangi me, o Samuele ki hagaritea o Saulo i mêru i gerina aberabera na ruma, ki vi: “Gu rite, be hagatorangenigo ku râ.” O Saulo ki rite, ma ngaia mo Samuele ngairerua karu hura i metara.

²⁷Matena garu râ karu tariha igê na sinopane na hinua, o Samuele ki vi tanga o Saulo, ki vi: “Gu vi tanga na kariamu ke nanago tarakerua.” Na kariana ki nanago. O Samuele ki vi tanga nikâ o Saulo, ki vi: “Gu ura so sisite, hanana ve hagarongogo renia na tamasinga iana God.”