Read Kalam Mak 4 Bible Online

Mak 4 - Kalam bible

Mak 4

¹Jiysis Galiyliy chemb gol ak amiy, biynimb gok kuyip tip ak minim aŋgñi mindakniŋ, biynimb kuŋaynep ap nan-giyak. Kun geyak, Jiysis bot ar ak bisgiy, am ñiŋg namb siŋak mindyiŋg, kuyip minim aŋgñak.

²Minim kun gok paydoŋ ay, ar keykey nep aŋgñak.

³Ar bap paydoŋ ay aŋgak, “Minim aŋgniŋg gispiyn ak niŋim! Bi bap woŋgday nuk ak piken piŋiy gayrep giy, wiyt maŋgiy dam diyokek amnakniŋ,

⁴gunap kinjeŋ kosemb ar ak yapeniŋgamb, yakir gok ap ñiŋniŋgambay.

⁵Gunap kamb ar man siskoy ayniŋgamb okok yapiy jakniŋgamb ak pen;

⁶kindiy paryomb ma amnak rek, pumb niŋiy milip giniŋgamb.

⁷Gunap kikasik dindbiliŋ mindeniŋgamb namb okok yapiy jakniŋgamb ak pen, kikasik dindbiliŋ gok pik ñimbek maŋgiy ma piyniŋgamb.

⁸Pen gunap man tep ar ak yapiy, jakrep giy, maŋgiy piyrep yimb giniŋgamb. Gunap maŋgiy ñin jiwiy rek piyniŋgamb, gunap maŋgiy ñin jiwiy omiŋal rek piyniŋgamb; gunap ñin jiwiy onep tiŋgawip ak rek piyniŋgamb aŋgak.”

⁹Jiysis minim kun ak aŋgjiwyiŋg aŋgak, “Nimb biynimb gos timund sek mindenimimb gok, minim aspiyn biy niŋnimimb aŋgak.” Minim Paydoŋ Ayak Kiñiŋ Ak

¹⁰Biynimb Jiysis minim aŋgakniŋ, ap niŋmindeyak kun gok keykey amniyakniŋ, binuk onep wimiŋgan ak sek, biynimb nuk gunap sek nup aŋgyak, “Minim paydoŋ ay apan kiñiŋ ak yerip aŋgyak.”

¹¹Aŋgeyak aŋgak, “Gor biynimb diy kond mindeniŋgamb minim ma niŋyiŋgipay ak; nimb niŋiy niŋniŋgambim ak pen; biynimb gunap minim nup ma niŋjun apay rek, kuyip paydoŋ ay nep aŋgñimbiyn.

¹²Kiyk Asaya aŋgak rek:‘Windin niŋbay ak pen, tap gunap ma niŋbay. Minim niŋbay ak pen, minim kiñiŋ aŋgip kun aŋgiy ma niŋbay. Niŋrep gipyap rek, Gor nup aŋgniŋembiyap, tap siy tap timey gipay ak niŋiy kirgipkop’ aŋgak.” Paydoŋ Ayak Minim Junj Ak Aŋgñak

¹³Jiysis kun aŋgiy kuyip aŋgak, “Minim paydoŋ ay aŋgen ma niŋbim kun ak; yergiy kisen minim paydoŋ ay aŋgeniŋgayn niŋniŋgambim?

¹⁴Wiyt yiŋ ak, Gor minim nup ak aŋgiy apiyn.

¹⁵Maŋgiy gunap kinjeŋ yomb ar ak yapek, yakir gok ap ñiŋniŋgambay apiyn ak; biynimb gok Gor minim niŋbay ak pen, won ak Seytan ap gek, sakiy gipay aŋgiy apiyn.

¹⁶Pen gunap kamb ar man siskoy ayniŋgamb okok yapiy jakniŋgamb ak pen, kindiy am wos ma gek, pumb niŋiy milip giniŋgamb apiyn ak; Gor minim ak kisen won ak niŋey tep gakniŋ diniŋgambay ak pen, yep won bap mindiy, biynimb gunap minim aŋgey niŋiy akaŋ, miker gunap apek, minim nup ak kirginiŋgambay aŋgiy apiyn.

¹⁷Pen kikasik dindbiliŋ namb ak yapiy jakiy maŋgiy ma piyniŋgamb rek mey; biynimb Gor nup minim niŋniŋgambay ak pen; woŋg wariy, korip minj kinemb, tiw minan, maniy, tap okok gosimb niŋiy, aŋgip rek ma giniŋgambay.

²⁰Wiyt maŋgiy man tep ar ak yapiy jakrep giy, maŋgiy ñin jiwiy akaŋ, ñin jiwiy gunap rek piyniŋgamb apiyn ak; biynimb Gor minim niŋiy nup pisnep chiŋgipay gok apiyn. Gunap nup direp gipay; gunap nup direp yimb gipay; gunap nup direp giyiŋg, ar kun ak key yimb gipay aŋgiy apiyn aŋgak.” Lam Ak Daŋgiy Ar Siŋbiyoŋ Tik Ayep

²¹Jiysis pen tip ak, minim bap paydoŋ ay aŋgak, “Lam ak daŋgiy, boŋg molik okok akaŋ, tiyn miŋgan okok ma aypay. Melik ginimuŋ aŋgiy, ar siŋbiyoŋ tik aypay.

²²Kun ak rek, minim yerip yerip miñiy weygiy mindip gok, kisen Gor gek miseŋ niŋniŋgambay.

²³Nimb biynimb gos timund sek mindenimimb gok minim aspiyn biy niŋrep ginimimb aŋgak.”

²⁴Kuyip minim bap aŋgak, “Minim niŋsipim ak niŋiy, niŋrep ginimimb. Biynimb minim yiñrimey rek aŋgniŋgambay gok, Gor kuyip kunep yiñrimey rek aŋgniŋgamb. Biynimb minim sayn rek aŋgniŋgambay gok, Gor kuyip kunep minim sayn rek aŋgniŋgamb.

²⁵Biynimb minim niŋiy niŋdiniŋgambay gok, Gor kuyip gos tep ñek gunap sek niŋniŋgambay; pen ma niŋniŋgambay gok, kiyk siskoy niŋbay ak niŋek tap rek ma ayek, yiwur yomb ñiniŋgamb aŋgak.” Gor Biynimb Nuk Diy Kond Mindeniŋgamb

²⁶Minim bap pen aŋgak, “Gor biynimb diy kond mindeniŋgamb ak, bi woŋg nop gok wiyt maŋgiy jakaŋ aŋgiy, dam woŋgday kiyk okok yokey jakip rek nep giniŋgambay.

²⁷Wiyt maŋgiy woŋgday okok yokiy, kin taŋgyakniŋ, gup giy jakniŋgamb ak pen; yergiy jakip aŋgiy ma niŋniŋgambay;

²⁸man ak key gek jakiy, maŋgiy piy, pik giniŋgamb.

²⁹Pen woŋgday nop nimb ak pikgek niŋiy, tik dand wep ñin ak wip aŋgiy, tik dand winiŋgamb aŋgak.” Biynimb Kuŋay Miñmon Keykey Okok Gor Aŋgip Rek Niŋdiniŋgambay

³⁰Jiysis kun aŋgiy aŋgak, “Gor biynimb diy kond mindeniŋgamb ak, kesim yerip rek ak diy aŋgen niŋniŋgambim?

³¹Mey, mon mastet yiŋ rek ak aŋgnim. Tap yiŋ gunap yomb yimbay gok sikoy jakip, pen mastet yiŋ ak sikoy yimb yimey jak yomb giy, alik pikek, yakir gok ap sisiy kun okok aymindpay aŋgak.” Jiysis Minim Paydoŋ Ay Aŋgyiŋgip

³³Jiysis biynimb gok kuyip minim paydoŋ ay kun gok rek kuŋaynep aŋgñiyiŋgip.

³⁴Minim miseŋ aŋgñen ma diniŋgambay aŋgiy, paydoŋ ay nep aŋgñiy, kisen binuk gok yip key mindyiŋg, minim junj gok aŋgñirep giyiŋgip. Jiysis Aŋgek Yiŋgen Ak Kirgak

³⁵Ñin kun anep duŋgep won ak, Jiysis binuk gok kuyip aŋgak, “Kind bindoŋ amnun aŋgak.”

³⁶Kun aŋgiy, binuk gok yip biynimb kuŋaynep ap mindeyak gok kuyip kirgiy, bot Jiysis mindek miŋgan ak amiy, bot gunap mindakniŋ, kiyk saŋdiyak.

³⁷Namb amniyakniŋ, day yiŋgen yindmund apiy, ñiŋg siy paŋg bot miŋgan ak amiy, poŋgek yowniŋg rek gak.

³⁸Jiysis nuk pen bot miŋgan day akneŋ ken, piylow jun ay kinakniŋ; binuk gok nup am kikawin giy aŋgyak, “Tiysa, chin maŋgiysek kumniŋg gispun gos ak ma niŋban?”

³⁹Aŋgeyak, Jiysis tikjakiy, yiŋgen yindmund dek ak sek, ñiŋg siy paŋg apek ak sek aŋgek kirgak.

⁴⁰Pen binuk gok kuyip aŋgak, “Yenen pirikpim? Gor chinup ma kond mindip aŋgiy niŋbim?”

⁴¹Aŋgek, kiyk wal aŋgiy, pen aŋgniŋek pen aŋgniŋek giy aŋgyak, “Bi kun biy an? Yergiy aŋgamb yiŋgen yindmund ak sek, ñiŋg paŋg apamb ak sek aŋgip rek gip aŋgyak.”