Read Kalam Luk 3 Bible Online

Luk 3 - Kalam bible

Luk 3

¹Rom gapman biyomb yimb Siysa Taybiyriyas, miñmon okok kond mindek, simiy ak yin ayak anjip piskind ak. Pen nuk paryomb okok mindiy, bi kond mindep namb kayaŋ nuk gunap aŋgek, am miñmon sikoy gunap kond mindeyak. Binuk Ponsis Paylat, Jiwdiya biynimb gok kuyip kond mindek. Binuk Herot, Galiyliy biynimb gok kuyip kond mindek. Herot numam nuk Piyliyp, Yitiwriya biynimb gok sek, Trakonaytis biynimb gok sek kond mindek. Layseniyas, miñmon Abiyliyniy biynimb gok kuyip kond mindek.

²Pen won kun ak, binak Anas yip, Kayapas yip, biyomb Gor nup simboŋgep omiŋal ak Jerusalem minderik. Pen ñin namb kun ak, Sekaraya ñinuk Jon, biynimb kuŋay ma mindeyak namb okok kin mindakniŋ, Gor nup gos ñek,

³Joden ñiŋg gol okok amiy, biynimb gok kuyip minim aŋgñiyiŋg aŋgyiŋgip, “Tap siy tap timey gipim ak, yenen kun gipun aŋgiy kirgiy, Gor nup nep gosimb niŋem, nimbip ñiŋg pikñen mey; Gor niŋiy kirginiŋgamb aŋgyiŋgip.”

⁴Jon kuyip Gor minim aŋgñak kun ak, bi Gor minim aŋgep Asaya, giniŋgamb aŋgiy tikak rek nep gak. Asaya minim tikiy aŋgak:“Bi bap biynimb kuŋay ma mindpay namb okok meŋg miŋgan dand araniy aŋgniŋgamb, ‘Per, biyomb asaw aŋgiy, kinjeŋ pindrep giy kond mindpay.

⁵Kun ak, dum okok piŋiysak tep giy, giw miŋgan okok lum ñi tep giy, kinjeŋ tind mand giy mindonimuŋ gok; pind yipund giy, kamb gok diyok tep giy, tap siy tap timey gipim ak kirgiy, Biyomb anup kond mindenimimb.

⁶Kun giy mey, biynimb okok maŋgiysek, Gor binuk yokek biynimb diniŋgamb anup niŋrep giniŋgiy aŋgniŋgamb’ aŋgiy” tikak.

⁷Jon Asaya aŋgiy tikak rek aŋgakniŋ, biynimb kuŋaynep mindek ak apiy aŋgyak, “Chinup ñiŋg pikñan aŋgey,” kuyip aŋg giy aŋgak, “Siyŋ saraw ñapan nuk guniy. Yerip gos ak niŋiy pirik opim? ‘Ñiŋg pikon, Gor biynimb gunap kuyip aŋg giniŋgamb ñin ak, chinup ma aŋg giniŋgamb aŋgiy’ pirik opim?

⁸Ñiŋg pikniŋg, tap siy tap timey gipim gok yenen kun gipun aŋgiy kirgem mey, Gor nup gosimb niŋbay aŋgiy, nimbip ñiŋg pikñinim! Pen gos bap niŋiy, chin Ebraham ñapan nuk aŋgiy, Ebraham nup nep gos ak ma niŋnimimb. Nuk tikek, tikey wak gok chin mindpun apim ak, tap yikop. Gor kamb guniy diy, Ebraham ñapan nuk gunap giniŋg gipkop. Kun ak bi tep Ebraham tikek; tikey amiy apiy gek chinup tikpay apim ak, Gor niŋek minim rek ma apim.

⁹“Pen niŋrep ginimimb! Gor mon maŋgiy ma piyip gok timb daŋgiyniŋg, tiw ak mamb giy mindip aŋgak.”

¹⁰Jon minim kun ak rek aŋgakniŋ, nup pen aŋgniŋiy aŋgyiŋgipay, “Chinup yergiyaŋ aŋgiy apan?” Aŋgey, kuyip aŋgyiŋgip,

¹¹“Biynimb tiŋgliys omiŋal mindonimuŋ gok, bap biynimb tiŋgliys ma mindonimuŋ gok kuyip ñiniŋgiy. Pen biynimb tap keñmaŋgiy mindonimuŋ gok, gunap biynimb tap ma mindonimuŋ gok kuyip ñiniŋgiy aŋgak.”

¹²Pen bi takes dep gok, Jon chinup ñiŋg pikñaŋ aŋgiy, ap nup aŋgniŋiy aŋgyiŋgipay, “Tiysa. Chin yerginjun?”

¹³Aŋgey, kuyip aŋgyiŋgip, “Takes ak diniŋg, gapman kay apay rek nep dinimimb. Yesek gunap ma dinimimb aŋgyiŋgip.”

¹⁴Rom biynimb, amiybi kiyk ap poliys rek mindyiŋgipay gok, Jon nup minim kun ak rek nep aŋgniŋiy aŋgyiŋgipay, “Chin yerginjun?” Aŋgey, kuyip aŋgyiŋgip, “Biynimb gok kuyip timey ma giy, kor yesek giy maniy kuyip ak ma dinimimb. Woŋg gipim rek nep dinimimb aŋgyiŋgip.”

¹⁵Pen kun gi mind dand amiy, biynimb gok gos ar bap niŋiy aŋgyak, “Bi biy, Kiyŋ yomb key yimb per kond mindpun ak rek ayip aŋgyak.”

¹⁶Aŋgey, nuk minim kun ak niŋiy kuyip aŋgak, “Yand nimbip yikop ñiŋg pikñimbiyn; Biyomb yimb ak kisen winiŋgamb. Nuk Biyomb yimb; yand bi yikop. Nup niŋen yip nambiŋ gip. Tomb tirup nup gok tuŋgasikyiŋg, tap nup gok marik ginim rek ma ayip. Nuk apiy, Gor Kawnan yipund giy, mon maŋlaŋ rek ak nimbip yokniŋgamb.

¹⁷“Pen nuk wiyt maŋgiy pikgek gipay rek ak giniŋgamb. Wiyt maŋgiy ñiŋemb gok key ay, wiyt cheŋg gok key ay giniŋgamb. Kun giy, wiyt maŋgiy ñiŋemb gok dand korip nuk amniŋgamb, cheŋg gok dam mon per yin mindip ak yokniŋgamb aŋgak.” Herot Jon Nup Kalambis Ayak

¹⁸Jon biynimb gok kuyip, Gor minim tep ak ar gunap aŋgen niŋrep giyaŋ aŋgiy, minim tep kun ak rek sikoy ma aŋgyiŋgip.

¹⁹Pen gapman biyomb Herot, tap siy tap timey okok gi dand amiy, numam Piyliyp biynuk Herodiyas nup kunep di gek, Jon, ak girep ma gip aŋgek, Herot niŋiy, nup dam kalambis ayak. Herot kisen timey gak ar bap mey kun ak. Jon Jiysis Nup Ñiŋg Pikñak

²⁰Pen Jon nup kalambis ma ayak won ak, biynimb gok kuyip ñiŋg pikñiyiŋgip. Jiysis nup kunep ñiŋg pikñek, nuk Nop Gor nup aŋgniŋ mindakniŋ, semb biyoŋ liŋg keykey amek, Gor Kawnan ak yakir kochir rek Jiysis ker wakniŋ, minim bap semb biyoŋ nimb apiy aŋgak, “Ñi tep yand! Nip niŋen yip tep yimb gip aŋgak.” Jiysis Nusind Sikop

²³Pen Jiysis simiy nuk ak ñin jiwiy, andikiy onep ar ak amnakniŋ, tikjak Nop Gor nup woŋg ak gak. Biynimb gok Jiysis nup aŋgniŋyak-eŋ, “Nop nuk mey; binak Josep aŋgniŋyak.” Josep nop ak Heliy.

²⁴Heliy nop ak Matat.Matat nop ak Liypay.Liypay nop ak Melkay.Melkay nop ak Janay.Janay nop ak Josep.

²⁵Josep nop ak Matatayas.Matatayas nop ak Emos.Emos nop ak Neyam.Neyam nop ak Eslay.Eslay nop ak Nagay.

²⁶Nagay nop ak Mat.Mat nop ak Matatayas.Matatayas nop ak Semen.Semen nop ak Josek.Josek nop ak Joda.

²⁷Joda nop ak Jowanan.Jowanan nop ak Resa.Resa nop ak Serababel.Serababel nop ak Siyaltiyel.Siyaltiyel nop ak Neray.

²⁸Neray nop ak Melkay.Melkay nop ak Eday.Eday nop ak Kosam.Kosam nop ak Elmandam.Elmandam nop ak Yer.

²⁹Yer nop ak Josiwa.Josiwa nop ak Eliysa.Eliysa nop ak Jorim.Jorim nop ak Matat.Matat nop ak Liypay.

³⁰Liypay nop ak Simiyon.Simiyon nop ak Jiwda.Jiwda nop ak Josep.Josep nop ak Jonam.Jonam nop ak Eliyakim.

³¹Eliyakim nop ak Meliya.Meliya nop ak Mena.Mena nop ak Matata.Matata nop ak Netan.Netan nop ak Depiyt.

³²Depiyt nop ak Jesiy.Jesiy nop ak Obet.Obet nop ak Bowas.Bowas nop ak Salmon.Salmon nop ak Nason.

³³Nason nop ak Amiynadap.Amiynadap nop ak Atmiyn.Atmiyn nop ak Anay.Anay nop ak Hesron.Hesron nop ak Peres.Peres nop ak Jiwda.

³⁴Jiwda nop ak Jekop.Jekop nop ak Aysek.Aysek nop ak Ebraham.Ebraham nop ak Tera.Tera nop ak Nowa.

³⁵Nowa nop ak Seruk.Seruk nop ak Reyiw.Reyiw nop ak Pelek.Pelek nop ak Ebey.Ebey nop ak Sela.

³⁶Sela nop ak Keynan.Keynan nop ak Apaksat.Apaksat nop ak Siyem.Siyem nop ak Nowa.Nowa nop ak Lamek.

³⁷Lamek nop ak Metiwsala.Metiwsala nop ak Yinok.Yinok nop ak Jaret.

³⁸Jaret nop ak Makalalel.Makalalel nop ak Keynan.Keynan nop ak Enos.Enos nop ak Set.Set nop ak Andam.Andam nup mey, Gor gayak.