Read Kalam Rom 9 Bible Online

Rom 9 - Kalam bible

Rom 9

¹Yand Krays binuk mindpiyn rek, yesek ma aŋgniŋgayn. Gor Kawnan ak namb yip biyaŋ, “Niŋind nep aŋgniŋg gispan aŋgip.”

²Biynimb yand Yisrel kay, Krays nup ma dipay gok, kisen kor giy yiwur yomb diniŋgambay ak, yip simb timey giy gos kun anep ayip. Minim kun ak niŋind nep aspiyn. Kinjeŋ mindek, yand kuyip nen yiwur den, kiy pen kim ambiyap.

⁴Pen Gor Yisrel kay kuyip, ñapan yand mindeyaŋ aŋgiy gek, kiyk low minim ak niŋiy, melik tep nup ak niŋiy, kuyip minim giniŋgayn aŋgiy aŋgayak gok niŋiy, nup aŋgniŋep ar ak niŋiy gipay.

⁵Basind chin Ebraham, Aysek, Jekop Gor nup gosimb niŋyak gok, tik dand amiy apiy giy kuyip tikyak. Kiñiŋ nokom kun anep tik dand amiy apiy giy, Krays nup biyimb rek tikayey, nuk Biyomb yimb mindiy, biynimb maŋgiysek kond mindip! Kun ak yimb nup ak nep dand aranemb! Tep.

⁶Gor Yisrel biynimb gok kuyip diniŋg aŋgak ak pen, gunap nup kirgey, biynimb nuk rek ma ayip.

⁷Kiyk apay, “Basind yes chin Ebraham kiñiŋ nuk mindpun rek, Gor chinup diniŋgamb apay” ak pen; kuyip ma diniŋgamb. Gor Ebraham nup minim aŋgay aŋgak, “Simiy kisen ak, biyn nand Sera ñi bap tikniŋgamb aŋgek,” niŋind aŋgip aŋgiy niŋmindiy, aŋgak rek ñi ak tikrik. Kisen nup minim ar nokom kun anep minim aŋgayiŋg aŋgak, “Nak sek, ñapan nak gok sek biynimb yand mindeniŋgambim aŋgak.” Pen ñapan nuk tikek tikey amnak gok kuyip maŋgiysek ma aŋgak. Yenen; minim bap aŋgak, “Ñinak Aysek tikek tikey amniŋgamb gok nep, Ebraham ñapan nuk aŋgniŋgambay aŋgak.” Kun ak niŋbun: minim giniŋgayn aŋgiy aŋgayak kun ak, basind yes Ebraham tikek tikey wip gok kuyip maŋgiysek ma aŋgak; Ebraham Gor nup gosimb niŋak rek niŋbay biynimb gok kuyip nep aŋgak.

⁸Pen biynimb gok low ar ak gey niŋiy akaŋ; ar gunap gey niŋiy kuyip ma dip; biynimb nuk key simb niŋimb gok kuyip dip. Wosrey Aysek biynuk Rebeka, ñi pireŋgiy ma tikak won ak, Gor nup aŋgak, “Ñi nand nind tikniŋgamban ak, biyomb rek ma mindeniŋgamb; nuk ñinak kisen ak nup woŋg giñiniŋgamb aŋgak.” Pen minim bap Baybol buk ak tikiy aŋgyak, “Yisow nup niŋen yip tep ma gip; Jekop nup niŋen yip tep gip aŋgyak.” Gor Yipund Giy Nep Gip

¹⁴Kun ak Gor yipund giy ma gip aŋgjun? Mer! Nuk yipund giy nep gip.

¹⁵Nuk Mosis nup aŋgak,“Biynimb mapin niŋniŋg mapin niŋniŋgayn. Simb niŋniŋg gos yand key niŋiy simb niŋniŋgayn aŋgak.”

¹⁶Kun ak niŋbun; nuk biynimb gok diniŋg, gipay ar ak niŋiy akaŋ; biynimb gunap aŋgey ma dip; nuk key simb niŋimb rek kuyip dip.

¹⁷Baybol buk minim bap tikyak ak; Yijip nimb biyomb Perow; Yisrel biynimb kuyip won ak ‘Amniŋgambim’ won ak ‘Ma amniŋgambim’ aŋgiy aŋgek aŋgek, Gor Perow nup gos timey ak ñinen ñek kindiy amek aŋgak, “Kun gipan ak nip timey gen, yip Biyomb yimb ak niŋiy minim kun ak aŋg amiy apiy gey, yimb yip ak miñmon okok maŋgiysek amniŋgamb aŋgak.”

¹⁸Kun ak niŋbun: Gor gos nuk key niŋimb rek, biynimb gunap kuyip simb niŋiy dip; biynimb gunap kuyip ñinen gek, gos timey kiyk niŋbay ak kindiy amek, nup ma dipay.

¹⁹Nimb gunap Gor gip kun ak rek niŋiy aŋgniŋgambim, “Nuk nep gek gos kiyk ak kindiy amek, yenen pen mindrep ma gipim aŋgiy kuyip minim yomb aŋgniŋgamb aŋgniŋgambim.”

²⁰Kun aŋgniŋgambim ak pen; nimb Biyomb an rek mindiy, minim nup ak day diniŋgambim? Bi bap man ak diy, siŋgey tiyn ak gayek, yip yenen kun giy gaypan aŋgiy ma aŋgniŋgamb. Mer yimb!

²¹Bi siŋgey tiyn giniŋgamb ak, nup key niŋek tep giniŋgamb rek giniŋgamb. Man band nokom bap tuŋgrik dand apiy, tiyn tep bap, tiyn monmon bap giniŋg giniŋgamb. Ak minim ma mindip.

²²Kun ak rek mey Gor gip. Nuk biynimb tap timey gi mindpay gok niŋek, yiruk yimb gek, kilis nuk mindip ak niŋyaŋ aŋgiy, kuyip timey ginimuŋ ak pen; biynimb gunap diniŋg niŋayak rek, kuyip kasek kun ma gip.

²³Pen nuk bi tep biynimb simb niŋimb ak, biynimb niŋyaŋ aŋgiy; chinup diniŋg niŋayak gok simb niŋiy diniŋgamb ak; gos nuk key niŋimb rek giniŋgamb.

²⁴Chinup diniŋg niŋak kun ak, Jiwda gok nep mer: biynimb Jiwda mer gok kunep diniŋg niŋak.

²⁵Minim ar kun ak rek, Hoseya Gor minim aŋgiy aŋgak:“Toymenik, biynimb yand ma aŋgyiŋgipiyn gok kuyip, biynimbyand aŋgniŋgayn. Pen wasemb ma ayiŋgipiyn gok, kisen wasembyimb ayniŋgayn.

²⁶Nind biynimb yand mindpim aŋgiy aŋgen,ma niŋyiŋgipay miñmon okok, kisen Gor Biyomb permindep ak,ñapan nuk mindpay aŋgniŋgambay aŋgak.”

²⁷Pen bi Gor minim aŋgep Asaya minim bap tikiy aŋgak:“Yisrel kay, kamb kilup rek kuŋaynep mindeniŋgambay ak pen;yep kaw bap nep kim amniŋgambay.

²⁸Yenen: ñin kun ak apek, Gor biynimb man ar biy mindiy timey gipay gok kuyip, pen giniŋgamb ak; kasek gi day jiwñiniŋgamb aŋgak.”

²⁹Giniŋgamb kun ak, Asaya nind aŋgak:“Biyomb sikerek ak, chinup Jiwda biynimb yep kaw bap nep kirginiŋgamb. Nuk biynimb simb niŋimb rek, gunap mindeniŋgambun; yikop ak Sodom Gomora biynimb kuyip pisnep yin simbok amnak rek ak, chinup gipkop aŋgak.” Jiwda Kay Jiysis Nup Gosimb Ma Niŋyak

³⁰Kun ak niŋim! Biynimb Jiwda mer gok nind, mindrep giy Gor yip jimñiy mindenjun aŋgiy gos ak ma niŋyak ak pen; miñiy nup gosimb niŋiy, nuk yip jimñiy mindpay.

³¹Pen Jiwda biynimb nind Gor low minim ak diy, aŋgip aŋgip rek ginjun aŋgyak ak pen; miñiy nuk yip jimñiy ma mindpay.

³²Yenen: Gor nup gosimb niŋiy mer; chin key ar gunap giy, nuk yip jimñiy mindeniŋgambun aŋgiy, kamb tep ayak ar ak amniŋgiy rek mindakniŋ, tomb kiyk ak aldek apyap pikpay.

³³Minim kun ak rek Baybol buk ak tikiy aŋgyak:“Niŋim! Yand miñmon Sayon kamb tep ak ayen, biynimb gok tomb kiyk ak ar kun ak aldek, apyap pikniŋgambay; pen biynimb nup gosimb niŋniŋgambay gok, kor giy nambiŋ ma diniŋgambay aŋgyak.”