Read Kalam 1 Korid 3 Bible Online

1 Korid 3 - Kalam bible

1 Korid 3

¹Mam ay sikop. Nind nimb yip mindenik ñin ak, Krays biynimb nuk mindyiŋgipim ak pen; gos yomb nimb ak amyiŋgip tap man ar biy ker gok. Ñapan ŋaŋ tiy ñiŋemb rek ak mindyiŋgipim: biynimb yomb tap key ñimbay rek ma mindyiŋgipim. Kun ak nimbip Gor minim gunap aŋgñinik, gunap aŋgñen ma niŋnimimb rek ayek ma aŋgñinik. Mindpun ñin biy kunep, tap lum ar biy gos niŋyiŋg nep mindpim rek, Gor nup gosimb niŋbim ak, ñapan ŋaŋ gosimb niŋbay rek nep niŋbim.

³Miluk niŋiy, penpen aŋgiy mindpim ak; biynimb yikop gok gipay rek gipim.

⁴Gunap, “Apolas biynimb nuk mindpun apim;” gunap, “Pol biynimb nuk mindpun apim,” Kun ak nimb biynimb yikop gipay rek gipim.

⁵Apolas chirmiŋay biyomb yerip rek mindor, minim kun ak apim. Chir bi yikop omiŋal ak pen; Gor aŋgek, minim tep nup ak aŋgñor niŋiy nup dipik. Pen chirupmiŋay woŋg ar keykey aŋgayak rek gipur.

⁶Yip aŋgek, miñmon nimb ak amiy tap yiŋ ak yimnik. Apolas nup aŋgek kisen amiy, ñiŋg am mal dap, tap yimnik kun ak soŋgak. Pen Gor nuk nep gek jakak.

⁷Kun ak, chir bi yikop tap yiŋ yimiy, ñiŋg soŋgiy gipur ak, yimb chirup ma dand aranimimb. Gor gek jakak rek, yimb nup ak dand aranimimb.

⁸Biynimb tap yiŋ yimbay gok, biynimb ñiŋg dap sopay gok woŋg ar nokom yimb gipay ak mey, woŋg gipay gipay rek niŋiy, kuyip pey ñiniŋgamb.

⁹Chirmiŋay Gor woŋg ak jimñiy gipur; woŋgday nuk ak nimb mindpim. Gor Korip Nuk Gayak Ak Nimb Mindpim Pen minim bap: nimb biynimb Gor ker mindpim gok, Gor korip nuk rek mindpim.

¹⁰Yip simb niŋiy dek, bi korip nup gep ak mindiy, korip sap yomb namb biyaŋ ak piŋiyen, biynimb gunap apiy day day mindip gok kisen gispay. Pen ap korip kun ak giniŋg, niŋrep giy nokom giniŋgiy.

¹¹Gor korip nuk ak, Jiysis Krays nup sap yomb namb biyaŋ pisnep piŋiyip ak; biynimb gunap tuŋgjiw yokiy, kisenimb bap piŋiyniŋgiy rek ma ayip.

¹²Pen korip day day mindek gispay ak, biynimb gunap gol, siylpa, kamb teprep dapiy giniŋgambay; gunap mon alik tap tiŋiy monmon okok dapiy giniŋgambay.

¹³Pen woŋg yerip yerip giniŋgambay ak; Krays apiy sup ñek yinek, maŋgiysek niŋniŋgambay.

¹⁴Korip day kilis mindeniŋgamb gok pey ñiniŋgamb.

¹⁵Day pisnep yinpaŋg yowniŋgamb gok pey ma ñiniŋgamb. Biynimb korip yinpaŋg yowniŋgamb day kun gok giniŋgambay gok, nuk yip kim mindeniŋgambay ak pen; simbgeprek korip yinek, tap ma mindip rek gok mindeniŋgambay.

¹⁶Gor Kawnan nimb yip nep mindip ak, korip ñiluk miŋgan tep nuk ak rek mindpim!

¹⁷Biynimb gunap Gor korip ñiluk miŋgan nuk asikrep gep ak, gi timey geniŋgambay, kuyip pen kunep gi timey giniŋgamb. Chin Nep Biynimb Gos Niŋep Mindpun Aŋgiy, Ma Aŋgnimimb

¹⁸Niŋrep ginimimb. Nimb gunap gos yomb biynimb yikop gok piyow niŋbay rek nep niŋiy, biynimb gos niŋep mindpun aŋgniŋgambim ak pen; sakiy ayek kun aŋgniŋgambim. Biynimb sakiy sek mindpun aŋgiy mey, gos tep ak piyow niŋniŋgambim.

¹⁹Pen biynimb yikop minim yomb yomb rek aŋgiy niŋbay gok, Gor niŋek sakiy minim rek ayip. Baybol buk ak tikiy aŋgyak, “Biynimb gos tipaŋgiy niŋiy; niŋrep gipun apay gok, Gor gek pisnep apyap pikniŋgambay aŋgyak.”

²⁰Pen minim bap sek tikiy aŋgyak, “Biynimb yikop gos tipaŋgiy niŋbun apay gok, Biyomb ak niŋek, minim junj bap ma mindip; yesek apay aŋgyak.”

²¹Kun ak biynimb gunap kuyip, biynimb yomb mindpay aŋgiy yimb ma dand aranimimb. Pen biynimb akaŋ, tap yerip yerip mindip gok, Gor nimbip niŋiy gayek mindip.

²²Yand Pol, Apolas, Siypas; mankumb biy; tap yerip yerip okok maŋgiysek; miñiy mindpim ak, kisen mindeniŋgambim ak, akaŋ kumniŋgambim ak Gor nimbip niŋiy gek mey; kun giy mindiy, kun giy giniŋgamb.

²³Pen nimbik Krays ker mindpim; Krays nuk Nop Gor ker mindip.