Read Kalam Pilipai 2 Bible Online

Pilipai 2 - Kalam bible

Pilipai 2

¹Krays nimbip simb niŋiy dek mey, gos kuŋay ma niŋiy, mindrep gipim. Kawnan nuk ak yip mindiy, mam ay gok kuyip wasemb aypim.

²Kun ak gi tep gipim ak pen, gos ar nokom niŋiy, jimñiy mindem mey, yip tep yimb giniŋgamb.

³Chin nep biynimb yomb mindiy, mindrep ginjun aŋgiy gos ak ma niŋnimimb; biynimb gunap kunep mindrep giyaŋ aŋgiy gos ak niŋnimimb. Nimb pen, biynimb tam okok rek mindiy, biynimb gunap kuyip yimb ak dand aranimimb. Krays Yimb Nuk Key Ma Dand Aranak

⁵Kun ak biynimb yomb mindon aŋgiy ma aŋgnimimb; Krays gos niŋiy gak rek ak ginimimb.

⁶Jiysis Krays Gor mindip rek mindip ak pen, nuk Nop nup nembnemb giy, andip andip mindor aŋgiy ma gak.

⁷Nuk bi yikop woŋg giñemb rek minden aŋgiy mey, aŋgek; Gor Kawnan ak gek, biyn Mariya nup tikak. Tikek yomb giy, gos yand key niŋiy giyn aŋgiy ma gak;

⁸Nop aŋgak rek nep gi dand amnakniŋ, nup bi timey tap yikop bap rek, mon kiros bak biyoŋ ñaŋgrimbik ayeyak kumak.

⁹Gak kun ak, Nop nup dand miñmon nuk biyoŋ amiy, yimb nup ak dand yiy ar biyoŋ aranak ak mey;

¹⁰kisen biynimb maŋgiysek: semb biyoŋ, man biy; kumyak gok, mindeniŋgambay gok; enjol, kichekiy, tap gok koŋgim yimiy,

¹¹Nop nup yimb ak dand aranyiŋg, Ñinuk nup Biyomb mindip aŋgiy miseŋ aŋgniŋgambay. Sup Melik Rek Mindonjun

¹²Kun ak Piyliypay biynimb Krays ker mindpim gok. Nimb yip mindiy, minim aŋgen niŋiy giyiŋgipim rek, miñiy akniy mindpiyn ak, kunep ginimimb. Nuk nep nimbip kond mindakniŋ, nup tep giniŋgamb ar ak gun aŋgiy gipim ak mey; niŋrep yimb giy, Biyomb nimbip dip anup ma kirginimimb.

¹⁴Miluk ma niŋiy, penpen ma aŋgnimimb; kapkap jimñiy mindem mey;

¹⁵biynimb yikop mindrep ma gipay gok kuyip, minim tep ak aŋgem, niŋind yimb apay aŋgniŋgambay. Kun ak Krays andkind winiŋgamb ñin ak, Gor minim tep nimbip per aŋgñimbiyn ak, aŋgen pikiy pikek ma amimb, niŋiy ar kun ak gipay aŋgiy, miñmiñ yimb giniŋgayn.

¹⁷Nimb Gor nup gosimb niŋbim ak, nup tap simboŋg ñey tep gip rek ak gip. Pen nimbip per aŋgñimbiyn ak niŋiy, yip pikayey likañ yowniŋgamb ak, minim ma mindip. Ak yikop chin Jiwda biynimb ñiŋg wayn ak diy, tap pik nup simboŋgipun ar ak soŋgon amek, Gor nup sesek simboŋg ñon, nup tep gip rek giniŋgamb ak niŋiy, miñmiñ giniŋgayn.

¹⁸Kun ak yip pikayeniŋgiy, nimb kunep, miñmiñ giyiŋg tep gakniŋ mindenimimb. Timotiy Mindpim Ak Niniŋgamb Aŋgak

¹⁹Nimb mindrep gipim akaŋ, yergiy rek mindpim ak ma niŋbiyn. Biyomb Jiysis yaw aŋgek, Timotiy nup yoken am nimbip niŋiy apiy, minim kun ak aŋgek, yip tep ginimuŋ.

²⁰Timotiy bi tep, yand nimbip simb niŋbiyn rek niŋimb.

²¹Bi gunap kun ma gipay; gos kiyk keynep niŋiy, Jiysis Krays nup gosimb ak ma niŋbay.

²²Pen nimb niŋbim: Timotiy bi tep yimb. Nuk yip kondek, bi apiymiŋay rek Jiysis minim tep ak aŋgñirapur.

²³Maŋ mindip kalambis mindpiyn ak; minim aŋgey niŋiy, yip yerer giniŋgambay minim ak nup aŋgen, am nimbip aŋgñiniŋgamb.

²⁴Pen yand niŋbiyn ak maŋ mindip, Biyomb ak yip kond mindakniŋ, yand kunep mindpim ak niniŋgayn. Epaprodaytas Mindpim Ak Niniŋgamb Aŋgak

²⁵Pen nimb mam chin Epaprodaytas nup aŋgyokem apiy, yip kond mindakniŋ, Gor woŋg ak jimñiy gipur. Pen miñiy tapin mindpur aŋgiy, nup aŋgyoken tip ak andkind jap.

²⁶Nuk nimbip am niŋiyn aŋgiy, simb niŋimb ak pen; nup simb gip ak mey; nup tap gip aŋgey niŋbik ak.

²⁷Nup tap yomb gek, mer kumak kun ak, Gor nup simb niŋiy, gek jak amnak. Pen nup nep mer; yip kunep simb niŋak ak mey, gek jakamnak. Mam bap kumbikop ak, yip simb yimb gakniŋ mindembinip.

²⁸Kun ak, Epaprodaytas nup kasek yoken amjakek, nimbip tep gakniŋ mey, gos kuŋay niŋbiyn rek ma niŋnim.

²⁹Nimb nind paryomb okok mindem, bi yip kondep bap ma mindek, bi nimb kun ak aŋgenbik, Krays woŋg ak giyn aŋgiy, ap yip kond mindiy, mer kumak. Kun ak amjakek, Gor nup woŋg gip mam ak asaw aŋgiy, nup miñmiñ yimb ginimimb.