Read Kalam Kolosi 1 Bible Online

Kolosi 1 - Kalam bible

Kolosi 1

¹Yand Pol. Bapiy Gor yip ñinen aŋgek, bi Jiysis Krays nup minim dand amemb ak mindpiyn. Pen miñiy mam chin Timotiy yip mindiy, nimb biynimb Krays nup chiŋgrep gipim gok minj tiksipur. Bapiy Gor, nimbip mam ay Kolosiy mindpim gok simb niŋiy, kond mindrep ginimuŋ. Pol Gor Nup Lotiw Giy Tep Aŋgak

²Pen chir minim bap niŋbur ak, nimbip apay, “Jiysis Krays nup gosimb niŋiy, biynimb nup gok maŋgiysek wasemb aypay apay.” Kun aŋgey, chir niŋiy, per Biyomb chin Jiysis Krays Nop nup, nimbip nen aŋgniŋyiŋg, tep apur.

⁵Yenen: Jiysis Krays minim tep yipul yimb ak, miñmon nimbip okok amek dipik ak mey, chinup simb niŋiy dip rek, direp giniŋgamb miñmon nuk biyoŋ aŋgiy, niŋrep giy gos sek kond mindpim.

⁶Pen minim tep kun ak miñmon nimbip okok nep ma dand ambay; miñmon okok kind kind amjap. Amnakniŋ mey, kiyk kunep niŋiy, miñ tep gipim rek ak gispay.

⁷Bi tep chin Epapras, woŋg yand gipiyn rek giyiŋg, nimbip Krays minim tep aŋgñimb ak, biy apiy aŋgak,

⁸“Gor Kawnan ak kiy yip mindakniŋ, Krays biynimb nuk gunap kuyip wasemb aypay aŋgak.” Pol Gor Nup Aŋgniŋiy Aŋgak, Nand Gey Nip Chiŋgrep Giniŋgiy Aŋgak

⁹Aŋgek, Timotiy chir niŋiy, nimbip nen Gor nup per aŋgniŋbur. Pen chinup tep giniŋgamb ak mey, Gor Kawnan ak nimbip gos tep yimb ñonimuŋ, niŋrep giy, gos nuk ñiniŋgamb ar ak nep giniŋgambim.

¹⁰Nimbip gos tep kun ak ñek, Gor miñ tep nup ak niŋrep giy mey, Biyomb chin anup tep giniŋgamb ar ak gem amniŋgamb.

¹¹Pen Biyomb yimb ak nimbip kond mindek, miker gunap apek gos kun ak ma niŋiy, chinup dek biynimb nuk mindpun aŋgiy gos sek mindiy, nup tep aŋgyiŋg nep mindenimimb.

¹³Seytan, bi kisyim kind okok ken mindip ak, chinup tiwniŋg wos yimb giyiŋgip ak pen; Gor Ñi tep nuk ak chinup wisik yokek, miñiy biynimb nuk mindiy, melik kind okok ken mindpun.

¹⁴Nuk nep mey, chinup nen kumiy, tap siy tap timey ginuk gach ak wiykyokak. Gor Ñinuk Biyomb Yimb

¹⁵Nop Gor nup miseŋ niŋjun rek ma ayip ak pen; Ñinuk mey Nop rek mindip. Biynimb tap okok maŋgiysek kayaŋ rek mindip; Jiysis nuk koyoŋ mindiy mey, tap kun gok maŋgiysek kond mindip.

¹⁶Tap semb biyoŋ, man biy; tap windin niŋbun gok, windin ma niŋbun gok; enjol, Seytan, chip kawnan, chipday, malñiluk, kichekiy tap okok maŋgiysek nuk nep gayak. Gayak kun ak yimb nuk araniŋgamb.

¹⁷Miñmon ma alwol gayak ñin ak, nuk mindek. Miñiy nuk yip jimñiy, biynimb tap yerip okok mindrep giniŋgamb.

¹⁸Nuk jun won rek mindamb, chin biynimb nuk gok, ñin kind tomb kind nuk gok rek mindpun. Nuk kiñiŋ giy kumiy tip tikjakak ak mey, tap yerip yerip mindip gok kayaŋ rek mindip; nuk Biyomb yimb koyoŋ mindip.

¹⁹Yenen: Gor gos nuk key niŋiy gek, Ñinuk nundkaw rek nep mindiy,

²⁰mon kiros bak biyoŋ likañ yapek kumiy, biynimb akaŋ, tap yerip yerip semb biyoŋ man biy mindip gok, Gor yip jimñinimuŋ rek ayip.

²¹Nimb nind tap siy tap timey giy, paryomb okok rek mindiy, Gor biynimb ñaŋgep nuk mindyiŋgipim.

²²Miñiy pen Ñinuk kumak rek, nimbip di jimñiy ayek, Gor niŋek minim bap ma mindip; biynimb suŋ-tep nuk gok mindpim.

²³Pen nimbip diniŋgamb minim tep ak ma kirgiy, direp gipim rek di mindiy, nup pisnep chiŋgiy gem amniŋgamb ak; biynimb tep nuk anep mindeniŋgambim. Minim tep nimbip aŋgey niŋbim kun ak, nimbip nep mer, biynimb miñmon okok kind kind aŋgñey amnak. Yand Pol kunep woŋg ar kun anep gipiyn. Pol Kolosiy Biynimb Kuyip Woŋg Giñak

²⁴Yand nimbip nen woŋg kun ak gen yip kalambis aypay ak, minim ma mindip; Krays chinup diniŋg, yiwur yomb yimb ak diy kumak. Kun ak chin kiñiŋ nokom mindpun rek, yand biynimb nup ker mindpay gok kuyip, woŋg aŋgayak rek giy miker diniŋgayn ak, minim ma mindip.

²⁵Gor nep yip aŋgek, nimbip biynimb Krays ker mindpim gok, direp giniŋg minim tep nup ak aŋgñirep gipiyn.

²⁶Minim teprep kun ak ma niŋyiŋgipay ak pen; miñiy Gor gos nuk key niŋiy, biynimb nup ker gok gos ñek; Krays chin yip nep mindeniŋgamb rek, chin am nuk yip mindrep giniŋgambun minim ak niŋrep giy mey, yip aŋgek nimbip biynimb Jiwda mer gok sesek aŋgñimbun.

²⁸Kun ak mey, biynimb okok monmon, Krays biynimb tep nuk mindey, Gor ñin ar ak ayjun aŋgiy, kuyip minim yipul kun ak aŋgñirep gipun.

²⁹Ar kun ak nep, Gor yip kond mindakniŋ, kilis giy woŋg gi mindpiyn.