Read Kalam Hibru 1 Bible Online

Hibru 1 - Kalam bible

Hibru 1

¹Gor basind apis ikop kuyip minim aŋgniŋg, bi minim nup aŋgep gok gek, minim nup ar ak wisin niŋiy akaŋ, day niŋiy akaŋ, gos kiyk namb okok niŋiy aŋgñiyiŋgipay.

²Nind kun giy gek, biynimb gok kuyip aŋgñiyiŋgipay ak pen, ñin kisen mindpun biy, Ñinuk ak key yokek apiy, chinup minim aŋgñak. Pen Ñinuk nuk key ma mindip: Nop mindip rek nep mindip. Nuk kunep Gor ak mey, chinup sup melik puŋgyomimb. Nop aŋgek, Ñinuk miñmon tap okok maŋgiysek alwol gayek mey, miñiy maŋgiysek kond mindip. Nuk nep minim aŋgek, miñmon tap okok timey ma gip, mindep nep mindip. Tap siy tap timey gach chinup ak nep aŋgiy, kumiy tip ak tikjakiy, am Nop ñin yipund kind okok ken mindiy, woŋg jimñiy gipiyr. Enjol Gok Kayaŋ Rek Mindpay; Jiysis Mey Biyomb Yimb Mindip

⁴Nuk enjol gok rek mer: nup Gor Ñinuk apay rek, nuk Biyomb yimb. Yimb nuk yiy ar biyoŋ mindip.

⁵Gor enjol nuk gok kuyip, bap minim aŋgiy apkop, “Miñiy nup dipiyn ak, yip ‘Nop nuk;’ yand nup ‘Ñiyand’ aŋgiy” ma aŋgak. Akaŋ pen: “Yip ‘Nap nak;’ yand nip ‘Ñiyand’ aŋgiy,” ma aŋgak. Ñinuk nup nep, minim kun ak rek aŋgak.

⁶Pen Ñinuk key yimb ak, mankumb biy yokniŋg, enjol gok yimb nup dand araniŋgiy aŋgak.

⁷Pen enjol gok kuyip, minim ak aŋgiy aŋgak, “Enjol nuk gok gek, key yimb mindiy, yiŋgen rek diy opay aŋgak.”

⁸Pen Ñinuk nup minim ak aŋgiy aŋgak:“Gor. Nand kiyŋ gunap monmon gipay rek ma giniŋgamban; suŋ-tep mindiy, biynimb gok perper kond mindeniŋgamban.

⁹Mindrep gipay ak nip tep gip, pen mindrep ma gipay ak nip tep ma gip. Kun ak nip aŋgen, Biyomb key yimb mindpan. Kun ak buŋgiy nand gok, beŋ nip okok mindpay; nand mey Biyomb yimb mindpan aŋgak.”

¹⁰Minim gunap sek aŋgiy aŋgak, “Nand Biyomb wosrey kondoŋ okok mindiy,mankumb biy sek, semb biyoŋ sek alwol gaynak.

¹¹Tap kun gok mindiy, kurginiŋgamb rek ayip ak pen;nand mindnep mindeniŋgamban.Tap kun gok, chech wor ay yapek,tuŋgasik key siŋak ay,kisenimb aypay rek giniŋgamb ak pen;nand Biyomb chin ak, kun ak rek ma giniŋgamban.Nak mindpan rek nep mindeniŋgamban aŋgak.”

¹³Pen Ñinuk nup minim bap sek aŋgak:“Nand ñin yipund kind yand akniy bisiŋg mindey, tap yerip yerip nip miluk niŋbay gok maŋgiysek, talak miŋgan nip okok ayniŋgayn aŋgak.” Pen enjol gok kuyip, Ñinuk nup aŋgak kun ak rek, ma yimb aŋgak.

¹⁴Kun ak enjol gok yerip rek mindpay? Kiyk Gor nup woŋg giñemb gok mindyiŋg, biynimb nuk perper mindeniŋgambay aŋgiy niŋimb gok kuyip, kond mindpay.