Read Kalam Repelesin 7 Bible Online

Repelesin 7 - Kalam bible

Repelesin 7

¹Pen tip ak niŋnik: enjol onep tiŋgawip ak; pinim diy, mankumb, ñiŋg solwara, mon, tap okok timey ma ginimuŋ aŋgiy; day keykey tim giyak.

²Enjol bap pen pumb lim gip okok nimb, Gor tap kil tikayep nuk ak dand apiy, biynimb nuk gok kuyip kil tikayniŋg, enjol pinim gey winiŋg gek gok kuyip aŋgak, “Aland gim! Biynimb Gor nup direp gipay gok maŋgiysek, kil nup ak awinbeŋ kuyip biyoŋ tikayonjun; kisen pinim ak yepyem, ap ñiŋg solwara, mankumb, mon tap gok gi timey ginimuŋ aŋgak.”

⁴Pen minim bap aŋgyak: biynimb Gor kil nuk awinbeŋ biyoŋ tikayniŋgambay kun gok, Yisrel biynimb kiñiŋ keykey gok jimñiy, wan handret powtiy pow tawsin rek.

⁵Biynimb kun gok, Jiwda kiñiŋ ak nimb 12,000;Riwbiyn kiñiŋ ak nimb 12,000;Gat kiñiŋ ak nimb 12,000;

⁶Esa kiñiŋ ak nimb 12,000;Naptalay kiñiŋ ak nimb 12,000;Manase kiñiŋ ak nimb 12,000;

⁷Simiyon kiñiŋ ak nimb 12,000;Liypay kiñiŋ ak nimb 12,000;Ayseka kiñiŋ ak nimb 12,000;

⁸Sebyiwlan kiñiŋ ak nimb 12,000;Josep kiñiŋ ak nimb 12,000;Benjamen kiñiŋ ak nimb 12,000 ak mey, jimñiy wan handret powtiy pow tawsin rek.

⁹Pen tip ak niŋiy niŋnik: Biyomb siya kiyŋ yomb bisgak ak sek, Siypsiyp Ñiluk ak sek mindrikniŋ, biynimb kuŋaynep ap windin yirik ar kuyip siŋak mindeyak. Biynimb kun gok, miñmon keykey ayak rek, kiñiŋ keykey ayak rek, wak keykey ayak rek, minim yimb keykey apay rek, okok nimb okok nimb apiy mindeyak. Biynimb ñin paŋgep rek ma mindek kun gok, maŋgiysek chech tund nep ay, alband kas di mindyiŋg,

¹⁰Gor nup yimb ak dand aranyiŋg, suk yomb aŋgiy aŋgyak, “Biyomb siya kiyŋ bisgip ak sek, Siypsiyp Ñiluk ak sek chinup tawasikrik rek mey, kim amniŋgambun aŋgyak.”

¹¹Enjol gok maŋgiysek ap, bi siya kiyŋ yomb bisiŋg mindek ak sek, bi minim tuŋgasikep gok sek, tap kim mindep onep tiŋgawip gok sek kuyip piŋiy kus kus giy, apyap koŋgim yimiy, jiy kuyaŋgiy, Gor nup yimb ak dand aranyiŋg,

¹²aŋgyak:“Niŋind yimb aspun!Gor Biyomb chin ak, yimb nup ak perper nep dand aranjun.Nuk Biyomb yimb;Bi gos tipaŋgiy niŋimb.Nup tep aŋgiy,yimb dand aranyiŋg,chinup kond mindonimuŋ aŋgey mey,biynimb gok kuyip perper nep kond mindonimuŋ.Nimbip niŋind yimb aspun aŋgyak.” Tip Ak Yiwur Ma Diniŋgambay

¹³Pen biyomb kun gok bap, yip aŋgniŋiy aŋgak, “Biynimb chech tund teprep aypay kun gok nand niŋban? Pen kiyk akay nimb opay?”

¹⁴Aŋgek aŋgnik, “Biyomb. Yand ma niŋbiyn; yip aŋgñan aŋgrik.” Kun aŋgen, yip aŋgak, “Biynimb guniy kuyip miker ñey, kosyam yimb mindiy opay. Pen kiyk Siypsiyp Ñiluk likañ ak diy, chech kiyk gok wasyim gey, tund gip.

¹⁵Kun ak mey, kiyk Gor siya kiyŋ kiñiŋ namb siŋak mindyiŋg, pumbnamb kisyimken korip nup aŋgniŋep miŋgan ak woŋg giñiyiŋg, yimb nup dand aranyiŋg gipay. Bi siya kiyŋ bisgip kun ak, kuyip kond mind tep yimb giniŋgamb.

¹⁶Kuyip yiwan ma giniŋgamb, ñiŋg nen ma giniŋgamb, pumb sinjrimey niŋiy yiwur ma giniŋgamb.

¹⁷Yenen: Siypsiyp Ñiluk siya kiyŋ kiñiŋ yimb siŋak mindip ak, kuyip kond mindrep giniŋgamb. Kuyip poŋind ñiŋg kilam jiwniŋgamb okok amek, ñiŋg permindep ak ñiŋniŋgambay. Pen Gor siy ñiŋg kuyip ak maŋgiysek, wiykyokniŋgamb aŋgak.”