Read Kalanga Kutangisa 12 Bible Online

Kutangisa 12 - Kalanga bible

Kutangisa 12

¹Yahwe bakadwa Abhuramu bakati, “Bhuda mu shango ya kanyi kwenyu ne mu makamu awo ne mu nsha wa tate babo uyende ku shango yandinowokulakidza.

²“Ndowokuthama itjaba tjikulu, ndowokukombolela ne zina lilo ndowolithama gulu, kuti ube gombolelo.

³Ndowokombolela ibabo banokukombolela. Iye unokulonga bhiso ndowonlongabo bhiso. Ngekuko njudzi dzose dze shango ndowodzikombolela.”

⁴Ndizo Abhuramu kamilika kayenda se kwaakadwiwa ndi Yahwe, ngono Loti kayenda naye. Abhuramu wakabe ana makole ali makumi ali kutendeka ana makole ali mashanu (75) ha ebhuda mu Harani.

⁵Abhuramu katola nkadzi uwe Sarayi na Loti mwana we nnung'una uwe ne thundu yose yabakashaba ne balanda babakawana mu Harani, ngono bakamilika bakayenda ku shango ye Kanana. Bakati beswika mu Kanana,

⁶Abhuramu kayenda epalama shango kanoti ku Shekemu pa nti we pakayengemala wa More. Mu misi iyeyo Bakanana bakabe batjiyapo mu shango iyeyo.

⁷Ipapo Yahwe bakazwilakidza kuna Abhuramu ngono bakati kunli, “Zwizekugwana zwizo ndowozwipa shango iyeyi.” Ngono Abhuramu kabakila Yahwe ibo bazwilakidza kunli tjibeso tjinopisigwa zwibhayilo.

⁸Kudwa ipapo kayendila ku matombo ku bhezhuba kwe Bhetele, kabe ebaka nshasha uwe pakati kwe Bhetele ne Ai, nzi we Bhetele uli ku golombedzo, we Ai uli ku bhezhuba. Kabakila Yahwe tjibeso tjinopisigwa zwibhayilo ipapo, ngono kanamata Yahwe.

⁹Abhuramu kamilika kadwilidza gwendo gugwe akalinga ku Negebu.

¹⁰Ngono kukabe ne bhamba mu shango iyeyo. Ndizo Abhuramu kayenda ku Egipiti kunogalako kwe tjibakana, ngoti bhamba lakabe lili gulu mu shango.

¹¹Kukati babe pejo ne kuswika mu Egipiti, Abhuramu kadwa nkadzi uwe Sarayi kati, “Ndoziba kuti u nkadzi mbuya ngolingwa.

¹²Baegipiti banowoti bekubona banowoti, ‘Oyu nkadzi uwe.’ Ipapo banowondibulaya koga iwe banowokuletja ukatjila.

¹³Ubadwe uti u hazwadzi yangu kuti ndizo ndibhakhwe zubuyanana nge kuko nditjile.”

¹⁴Kukati Abhuramu eswika mu Egipiti, Baegipiti bakati bebona nkadzi bakati wakanaka kwazo.

¹⁵Hadzasha dza Faro dzikati dzimbona dzikanlumbidza kuna Faro, ngono kayisiwa ku ng'umba iye ye bushe.

¹⁶Ngono kabhata Abhuramu zubuyanana nge kukwe, Abhuramu kawana pkhwizi ne ng'ombe ne madonki malume ne makadzi ne balandalume ne balandakadzi ne dzikamela.

¹⁷Koga Yahwe bakaloba Faro ne be ng'umba iye nge njigwele dzakabangalala ngekwa Sarayi nkadzi wa Abhuramu.

¹⁸Ndizo Faro kadana Abhuramu kambhuzwa kati, “Ini kwawandithama kene? Ini usakandibudza kuti nkadzi uwo kene?

¹⁹Ini wakati i hazwadzi iyo, imi ndibe ndintola kube nkadzi wangu kene? Ngono hwoyu nkadzi uwo. Untole uyende.”

²⁰Ipapo Faro katuma bathu babe kuna Abhuramu ndizo bakampeleka ben'dusa mu shango iye ne nkadzi uwe ne tjimwe ne tjimwe tjaakabeanatjo.