Read Kalanga Kutangisa 14 Bible Online

Kutangisa 14 - Kalanga bible

Kutangisa 14

¹Mu misi ya Amurafele mambo we Shinari na Ariyoki mambo we Elasari na Kedorilaomeri mambo we Elamu na Tidali mambo we Goyimu

²bakamusa ngwa, begwa na Bhera mambo we Sodoma na Bhisha mambo we Gomora na Shinabu mambo we Adima na Shemeberi mambo we Zeboyimi na mambo we Bhela (kene Zowa).

³Bomambo bakulu ibaba bashanu bakathama nshanganyila we ngwa bakashangana mu nkuku we Sidimu iwo ngwenu unodang'wa Gungwa le Mwenyu.

⁴Bakashingila Kedorilaomeri makole ali gumi lina makole ali mabili, koga mu gole le bugumi lina makole ali matatu bakapanduka.

⁵Mu gole le bugumi lina makole ali manna Kedorilaomeri na bomambo baakabe ana nshanganyila nabo bakabhuda bakanogwa ngono bakakunda Barafa mu Ashitirotekarinayimu ne Bazuzi mu Hamu ne Baemi mu Shave Kiriyathayimu

⁶ne Bahori mu shango ye matombo e Seiri bukule kunoti ku Eliparani mu hwunde ye tjilambanyika.

⁷Bakashanduka bakayenda ku Enimishipati (kene Kadeshi), ngono bakakunda ntuthu wose we Baamaleki ne Baamori bakabe begala mu Hazazonitamari.

⁸Ipapo mambo we Sodoma ne we Gomora ne we Adima ne we Zeboyimi ne we Bhela (kene Zowa) bakalulwamisila ngwa bakabhuda bakanokubungana mu nkuku we Sidimu,

⁹benogwa na Kedorilaomeri mambo we Elamu na Tidali mambo we Goyimu na Amurafele mambo we Shinari na Ariyoki mambo we Elasari. Bomambo bali banna begwa na bomambo bali bashanu.

¹⁰Ngono nkuku we Sidimu wakabe una makomba manjinji e ikontiri ngono kukati bomambo be Sodoma ne Gomora betizha, bamwe balume bakawila mu ali, bakasala bakatizhila ku matombo.

¹¹Bomambo ibaba banna bakatapa thundu yose ye Sodoma ne Gomora kose ne zojiwa, bebe beyenda.

¹²Ngono Loti mwana we nnung'una wa Abhuramu na iye bakantapabo ne thundu iye se akabe egala mu Sodoma.

¹³Mmwe nthu wakabe atizha, kanobudza Abhuramu we Nhebheru. Abhuramu wakabe egala pejo ne miti mikulu ye pakayengemala ya Mamure we ludzi gwe Baamori, nkulu wa Eshikolo na Anere. Bose ibaba bakabe bana nshanganyila na Abhuramu.

¹⁴Kukati Abhuramu ehwa kuti gamu lile latapiwa, kakubunganya balume bakazwaligwa mu nsha uwe bakadiyiwa ngwa bali mazana matatu ana gumi lina bali zhanakadzi (318) ngono kalonda bomambo ibaba banna bukule kunoti ku Dani.

¹⁵Abhuramu kathubukanya babhayani babe nge makupo busiku, iye ne balanda babe bakabagwisa bakabakunda bakatatana nabo kunoti ku Hoba ku bunandzwa gwe Damasiko.

¹⁶Kashanduka ne thundu yose yakabe yatapiwa ne gamu lile Loti ne thundu iye, kose ne bakadzi ne bamwe basungwa.

¹⁷Abhuramu kati ashanduka edwa kukunda Kedorilaomeri na bomambo bakabe bana nshanganyila naye, mambo we Sodoma kabhuda kunshanganidza mu nkuku we Shave (kene Nkuku wa mambo).

¹⁸Ipapo Melikizedeki mambo we Salema wakabe ali mpirisiti we Ndzimu Upezhugwi zhugwi kazhisa tjiwunga ne nkumbi we zhambi kuna Abhuramu,

¹⁹ngono kankombolela eti, “Ndzimu Upezhugwi zhugwi, Mbumbi we kudzimu ne shango, ngaukombolele Abhuramu!

²⁰Ngakulumbidziwe Ndzimu Upezhugwi zhugwi wakupa kukunda zwita zwizo!” Ngono Abhuramu kapa Melikizedeki tjebugumi tje tjimwe ne tjimwe.

²¹Mambo we Sodoma kati kuna Abhuramu, “Undipe bathu koga, thundu yose uizwitolegwe.”

²²Koga Abhuramu kashandula mambo we Sodoma eti, “Ndakatuna mbeli kwa Yahwe, Ndzimu Upezhugwi zhugwi, Mbumbi we kudzimu ne shango,

²³kuti akuna tjitjo tjandingatola nenguba ili thali kene ntjili we shangu kuti usitongoti ukadwa uti, ‘Ndimi ndakafumisa Abhuramu.’

²⁴Akuna tjitjo tjandingatola kuzhe kwe zwakajiwa ne babhayani bangu ne gobe le bandakabe ndayenda nabo, Anere na Eshikolo na Mamure. Ngabatole gobe labo.”