Read Kalanga Kutangisa 16 Bible Online

Kutangisa 16 - Kalanga bible

Kutangisa 16

¹Sarayi nkadzi wa Abhuramu wakabe asingan'wanile bana. Koga wakabe ana nlandakadzi wakabe edang'wa Haga we Egipiti,

²ngono Sarayi kadwa Abhuramu kati, “Yahwe bakandinyima bana, nginani mu ng'umba ye nlandakadzi wangu, pamwe ndowowana bana ndiye.” Ngono Abhuramu kadumana ne tjakalebgwa ndi Sarayi.

³Ndizo Abhuramu kati agala makole ali gumi mu shango ye Kanana, nkadzi uwe Sarayi katola Haga we N'egipiti nlandakadzi uwe kampa nlume uwe Abhuramu kube nkadzi uwe.

⁴Abhuramu kangina mu ng'umba na Haga ndizo Haga kazwisenga. Kukati Haga ebona kuti wazwisenga kadeelela tetshikadzi uwe Sarayi.

⁵Ndizo Sarayi kati kuna Abhuramu, “Nlandu nge wenyu muna tjandinothamiwa tjisakanaka. Ndakamupa nlandakadzi wangu mu maboko enyu, koga wati ebona kuti wazwisenga kandideelela. Yahwe ngabasumikilise pakati kwenyu nami.”

⁶Ngono Abhuramu kadwa Sarayi kati, “Nlandakadzi u pasi kuko, shinga tjaunoda ndiye.” Ndizo Sarayi kadziyidza Haga, ngono Haga katizha kadwa pana Sarayi.

⁷Ntumwa wa Yahwe kawana Haga pa nsenya we vula mu tjilambanyika, nsenya upa hwunde ye zila inoyenda ku Shuri.

⁸Ngono Ntumwa wa Yahwe kati kunli, “Haga nlandakadzi wa Sarayi, wadwa ngayi uyenda ngayi?” Haga kashandula eti, “Ndotizha tetshikadzi wangu Sarayi.”

⁹Ipapo ntumwa wa Yahwe kati kunli, “Bgwilila kuna tetshikadzi uwo uzwiyise pasi kukwe.”

¹⁰Ntumwa wa Yahwe kapapha kati, “Ndowowatsha zwizekugwana zwizo kwazwisingake zwikabalika nge bunji.”

¹¹Ntumwa wa Yahwe kandwa kati, “Bona, wakazwisenga ngono unowowana mwana we tjilisana, unowontumila zina uti Ishimaele ngobe Yahwe bahwa tjililo tjitjo.

¹²Unowobe donki ye shango, tjiazha tjitje tjowobe tjibhayana ne mmwe ne mmwe ne tjiazha tje mmwe ne mmwe tjowobe tjibhayana naye. Unowogala emukilana ne be ludzi gugwe.”

¹³Ndizo Haga kapa Yahwe ibo bakalebeleka naye zina eti, “Mu Ndzimu unobona,” ngoti wakati, “Apa ndabona Ndzimu kene, iwo unondibona kene?”

¹⁴Ndizo tshime ilelo lakatumigwa kuyi Bheerilahairoyi kodwiwa kuti tshime le wabona katjila. Lipakati kwe Kadeshi ne Bheredi.

¹⁵Haga kawanila Abhuramu mwana we tjilisana, ngono Abhuramu katumila mwana uwe waakawanigwa ndi Haga zina eti, Ishimaele.

¹⁶Abhuramu wakabe ana makole ali makumi ali zhanakadzi ana makole ali matathatu (86) paakazwaligwa Ishimaele ndi Haga.