Read Kalanga Kutangisa 17 Bible Online

Kutangisa 17 - Kalanga bible

Kutangisa 17

¹Abhuramu wakati ana makole ali makumi ali zhanalume lina makole ali zhanalume (99), Yahwe bakazwilakidza kunli bakati, “Ndimi Ndzimu Masimbawose, tobela zila yangu ndizo usibe ne nlandu.

²Ndowothama tjidumano tjangu pakati kwangu nawe, ngono ndowowatsha zwizekugwana zwizo.”

³Abhuramu kathigama kakotamisa buso gugwe ngono Ndzimu ukati kunli,

⁴“Tjidumano tjangu nawe etji, unowobe tate be zwitjaba zwinjinji.

⁵Zina lilo alitjowobe litjayi Abhuramu, koga lowobe Abhurahama ngoti ndakuthama tate be zwitjaba zwinjinji.

⁶Ndowokuthama kuti ube ne mbeleko kwazo, ndowothama zwitjaba ndiwe, na bomambo banowodwa mukuli.

⁷“Ndowothama tjidumano tjangu pakati kwangu nawe ne bana babo kuyenda nge zwizekugwana zwabo zose, tjili tjidumano tjisingapele, ndibe Ndzimu uwo newe bana babo newe zwizekugwana zwabo zwinozha.

⁸Ndowokupa iwe ne zwizekugwana zwizo zwinozha shango iyeyi ya uli ntaya muili, shango ye Kanana inowobe shango ye bana babo nge kusingapele, ngono ndowobe Ndzimu wabo.”

⁹Ndzimu ukadwa Abhurahama ukati, “Iwe ulondolodze tjidumano tjangu, iwe ne bana babo ne zwizekugwana zwinowozha.

¹⁰Etji nditjo tjidumano tjangu tjamunowolondolodza pakati kwangu namwi ne bana babo ne zwizekugwana zwinowozha, we tjilume mmwe ne mmwe pakati kwenyu unowothumbigwa.

¹¹Mowothumbigwa ngono kuthumbigwa ikoku kowobe tjilakidzo tje tjidumano pakati kwangu namwi.

¹²Mwana mmwe ne mmwe we tjilume wazwagwa mu nzi kene ali wawakatenga nge mari awo mu bataya kene ali wazwagwa asi we zwizekugwana zwizo, athumbigwe ana mazhuba ali zhanakadzi (8).

¹³Bose bazwagwa mu nzi kene bali bawakatenga nge mari awo mu bataya kene bali bakazwagwa basi be zwizekugwana zwizo ngabathumbigwe. Ndizo tjidumano tjangu tjowobe mu mibili yenyu, tjili tjidumano tjisingapele.

¹⁴Nthu tjilume mmwe ne mmwe usakathumbigwa mu mbili uwe ngaadusiwe mu bathu bakanyi kwabo, ngoti watjuluka tjidumano tjangu.”

¹⁵Ndzimu ukati kuna Abhurahama, “Ngekwa Sarayi nkadzi uwo, autjon'dana uti Sarayi, koga Sara ndilo linowobe zina lile.

¹⁶Ndowonkombolela, tjikulu ndowokupa nkololo ndiye. Ndowonkombolela ngono unowobe mme be zwitjaba, bomambo be bathu banowodwa munli.”

¹⁷Abhurahama kathigama kakotamila pasi kaseka kazwidwa kati, “Apa mwana ungazwagwa nge nlume una makole ali zana (100) kene? Sara iye una makole ali makumi ali zhanalume (90) ungayita mwana kene?”

¹⁸Abhurahama kabe eti ku Ndzimu, “Dzene Ishimaele angatjilila mu mesho enyu!”

¹⁹Ndzimu ukabe uti, “Akuzojalo, nkadzi uwo Sara unowokuwanila nkololo, ngono iwe unowontumila zina uti Isaki. Ndowothama tjidumano tjangu naye kube tjidumano tjisingapele mu zwizekugwana zwizwe.

²⁰Ngekwa Ishimaele, ndakuhwa. Bona, ndowonkombolela anthama kabe ne mbeleko, ampa bana banjinji. Unowobe tate be batungamili bali gumi lina babili, ndowonthama itjaba tjikulu.

²¹Koga tjidumano tjangu ndowotjithama na Isaki waunowowanigwa ndi Sara gole linozha mu nsi iwoyu.”

²²Kukati Ndzimu wapedza kulebeleka na Abhurahama ukayenda pezhugwi udwa panli.

²³Ipapo Abhurahama katola mwana uwe Ishimaele ne balanda bose bakazwaligwa mu nzi uwe ne bakatengwa nge mari awe, kabathumbila mu zhuba ilelo sekwa akabe adwiwa nge Ndzimu.

²⁴Abhurahama wakathumbigwa ana makole ali makumi ali zhanalume ana makole ali zhanalume (99).

²⁵Nkololo uwe Ishimaele wakathumbigwa ana makole ali gumi lina ali matatu (13).

²⁶Mu zhuba ilelo Abhurahama ne nkololo uwe Ishimaele bakathumbigwa,

²⁷ne balume bose be nzi uwe, balanda bakazwaligwa mu nzi ne bakatengwa nge mari mu bataya bakathumbigwa naye.