Read Kalanga Kutangisa 18 Bible Online

Kutangisa 18 - Kalanga bible

Kutangisa 18

¹Yahwe bakaboneka kuna Abhurahama ali gele pa nkoba we nshasha uwe upa miti mikulu ye pakayengemala ya Mamure masikati zhuba lipisa.

²Kati emilidza mesho kabona balume bali batatu bali mile pejo naye. Kati ebabona kalabuka kunobashanganidza edwa pa nkoba we nshasha uwe ngono kabathigamila.

³Kabe eti, “She wangu, ha kuamutjilika, musindinyenyeledze imi nlanda wenyu.

⁴Imani kuzhisiwe vula shomanana mungule makumbo enyu, ngono munyaluluke kusi kwe nti.

⁵Mume ndizhise tjiwunga kuti muje, se mazha pa nlanda wenyu, shule kwa ikoko mungapinda zwenyu.” Ndiko bakabe beti, “Shinga sekwa waleba.”

⁶Ngono Abhurahama kalibilidza kangina mu nshasha kuna Sara ebe eti, “Tola zwiyelo zwitatu zwe bgwisa ulibilidza uvange ubhike tjiwunga.”

⁷Abhurahama kalabukila ku ng'ombe kashalula ikondolo tjibuyanana katjipa nlanda wakati kalibilidza kutjibhaya ne kubabhikila itjo.

⁸Ngono ipapo kazhisa mashwe ne nkaka mmbisi ne nyama ye ikondolo yabhikiwa kabapa izo. Bakati beja iye kabe ali mile pejo nabo kusi kwe nti.

⁹Balume ibabo bakambhuzwa beti, “Sara nkadzi uwo ungayi?” Abhurahama kadabila eti, “Umu nshasha.”

¹⁰Yahwe bakati, “Ndolebesa ndowobuya ku kuli gole linozha mu nsi iwoyu, Sara nkadzi uwo unowowana mwana we tjilisana.” Sara wakabe akahwilila ali tjemukati kwe nkoba we nshasha shule kwa Abhurahama.

¹¹Abhurahama na Sara bakabe bakwegula batjikula kwazo. Sara wakabe apinda misi ye kuwana bana.

¹²Ndizo Sara kaseka tjemu moyo eti, “Shule kwe ndakwegula ne nlume wangu akwegula ndingawana kushatha kene?”

¹³Yahwe bakati kuna Abhurahama, “Ini Sara aseka eti, ‘Apa ndingawana mwana dumbu ndakwegula kene?’

¹⁴Apa tjimwe tjiyapo tjakasimila Yahwe kene? Ndowobuya ku kuli nge tjibaka tjakabigwa mu gole linozha ngono Sara unowobe ne mwana we tjilisana.”

¹⁵Sara kalandula kati, “Andizoseka,” ngoti wakabe etja. Yahwe bakati, “Waseka.”

¹⁶Balume ibabo bakamilika bakayenda bakalinga ku Sodoma, ngono Abhurahama kabapeleka.

¹⁷Yahwe bakati, “Apa ndingasumbikila Abhurahama tjandinowoshinga,

¹⁸koga ndiziba kuti Abhurahama unowobe itjaba tjikulu tjakasima ne kuti zwitjaba zose zwe shango zowokombolegwa ndiye kene?

¹⁹Aa, ngoti ndakanshalula kuti alaye bana babe ne nsha uwe kun'yedza kulondolodza zila ya Yahwe ngoshinga ndulamo ne ndingisanyo kuti ndizo Yahwe bathamile Abhurahama tjabakan'gadzabgwe.”

²⁰Ipapo Yahwe bakati, “Tjililo ngekwe Sodoma ne Gomora tjikulu ne jinyo labo lapindilila.

²¹Ndoyenda kunobona kene bakashinga kunoyendidzana ne tjililo itjetji tjakaswika kundili, ngono akusakajalo ndowoziba.”

²²Ndizo balume ibabo bakafupatila bakayenda bakalinga ku Sodoma, Abhurahama kasala ali mile mbeli kwa Yahwe.

²³Ipapo Abhurahama kasedzela pana Yahwe kabhuzwa eti, “Apa mungalobesa balulwami kang'ompela ne babi kene?

²⁴Ngatitini pamwe kuna balulwami bali makumi mashanu (50) mu nzi iwoyo, apa mowoulobesa musingautjidze ngoti una balulwami bali makumi mashanu kene (50)?

²⁵Ngakube kutjena namwi kuthama tjakajali, kubulaya balulwami kang'ompela ne babi, kubhata balulwami kunofanana ne babi. Ngakube kutjena namwi ikoku. Apa nsumikilisi we shango yose aangashinge tjakalulwama kene?”

²⁶Ngono Yahwe bakati, “Ha ndingawana bathu bakalulwama mu nzi we Sodoma bali makumi mashanu (50), ndowotjidza magalo iyawo wose nge kwabo.”

²⁷Abhurahama kati, “Bonani, ndazwipa kulebeleka na She nenguba ndisi tjimwe ndili hwuluba ne nlota koga.

²⁸Ngatitini pamwe kwasheteka bali bashanu kuti balulwami babe makumi mashanu (50), mungalobesa nzi wose ngoti basingaswike nge bathu bali bashanu kene?” Ngono Yahwe bakati, “Andingaulobese ha ndingawana bali makumi manna ana bashanu (45).”

²⁹Kapapha kalebeleka nabo kati, “Ha kungawang'wa bali makumi manna (40) koga kee?” She kadabila eti, “Ha ndingawana makumi manna (40) andingaulobese.”

³⁰Ipapo Abhurahama kati, “She ngabasigwadze moyo, imani ndilebeleke kakale. Ngatitini ha kungawang'wa makumi matatu (30) kee?” She kati, “Andingakushinge ha ndingawana makumi matatu e bathu (30).”

³¹Ipapo Abhurahama kati, “Ndazwipa kulebeleka na She. Ha kungawang'wa makumi mabili kee?” She kati, “Andingaulobese ha ndingawana makumi mabili (20) e balulwami.”

³²Ipapo Abhurahama kati, “She ngabasigwadze moyo, ndowolebeleka kakale gwe bupelo. Ha kungawanika bali gumi koga kee?” She kashandula eti, “Ha ndingawana bali gumi andingaulobese.”

³³Yahwe bakati bapedza kulebeleka na Abhurahama bakayenda zwabo, Abhurahama kabgwilila ku nzi uwe.