Read Kalanga Kutangisa 19 Bible Online

Kutangisa 19 - Kalanga bible

Kutangisa 19

¹Batumwa babili bakaswika ku Sodoma madekwana. Loti wakabe ali gele pa nkoba we Sodoma. Kati ebabona kamilika kubashanganidza, kakotamisa nsholo.

²Kabe eti, “Botetshi bangu, ndomukumbila, yendani ku ng'umba ye nlanda wenyu mupitshe busiku muili, mungule makumbo enyu. Mowomuka mangwana mudwilidza gwendo gwenyu.” Koga ibo bakati, “Aa, iswi towolala mu zila.”

³Koga wakabakumbila akasimisa ngono bakayenda naye bakangina mu ng'umba iye. Kababhikila zojiwa, kabhika tjiwunga tjisina mbidzo ngono bakaja.

⁴Kwakati basathu bakaizela, balume be nzi iwoyo we Sodoma, bose bazhuzha ne balumetate, balume bose kusina wasala, bakakomba ng'umba iyeyo.

⁵Bakadana Loti bakati, “Bangayi balume ibaba baswikila pakuli madekwana iyawa? Ubazhise ku tili tibathame bakadzi bedu.”

⁶Loti kabhuda mu ng'umba kazhalila nkoba kayenda ku balume ibabo.

⁷Kati ku bali, “Ndomukumbila zwikamu zwangu, musithame mbipo ingapa.

⁸Bonani, ndina baanadi babili basathu bakaziba balume, imani ndibazhise kumuli mushinge sekwa munoda ndibo. Musithame tjimwe balume ibaba ngoti baswikila mu ng'umba yangu.”

⁹Koga ibo bakati, “Idwa ipapa!” Bakapapha bakati, “Nthu iwoyu uipapano se nzhi ngono wozwithama nsumikilisi! Ngwenu wali towokushinga zwakabipa kupinda tjatingabashinga.” Bakatshindika Loti bakasedzela pa dendele le ng'umba kulipkhwanya.

¹⁰Koga balume bamu ng'umba bakadusa maboko abo bakakwebela Loti mukati bakazhalila nkoba.

¹¹Ngono bakapofupadza balume bakabe bali pa nkoba we ng'umba, bose batukunu ne bakulu, ndizo bakazwinyadza ngoambaamba beshaka nkoba.

¹²Ipapo balume ibabo babili bakabhuzwa Loti bakati, “Ungabo una bamwe bathu baunabo imomu kene? Bakwasha kene bakololo kene bakololokadzi kene mmwe koga mu nzi iwoyu, ubaduse mu magalo iyawa,

¹³ngoti tabe pejo ngolobesa magalo iyawa. Tjililo ngekwe matjinyo e bathu bawo tjabe tjikulu mbeli kwa Yahwe. Ndizo Yahwe batituma kuwoalobesa.”

¹⁴Ndizo Loti kabhuda kanodwa bakwasha babe bakabe bewolobola bakololokadzi babe kati, “Milikani mudwe mu magalo iyawa, ngoti Yahwe bapejo ngolobesa nzi iwoyu.” Koga bakwasha babe bakantola se unosoma.

¹⁵Kukati kubamba kuyedza, batumwa be kudzimu bakakulumbidza Loti beti, “Milika utole nkadzi uwo ne bakololokadzi babo babili ibaba baipapa uyende, kuti ndizo usilobe ha nzi ulobgwa shamu.”

¹⁶Koga Loti kanonoka, ndizo balume ibabo bakambhata nge luboko, bakabhata maboko e nkadzi uwe ne e bakololokadzi babe bakabakwebela kuzhe kwe nzi, ngobe Yahwe banhwila ngoni.

¹⁷Ngono bakati babadusila kuzhe bakabadwa bakati, “Tizhani ndizo mutjile, musitongo tjebuka shule ne kuma musitongo yita pa munoma mu lubala igogu, tizhilani ku matombo, kusajalo mowolobesiwa.”

¹⁸Ngono Loti kati ku bali, “Aa, botetshi bangu,

¹⁹bonani, nlanda wenyu manhwila ngoni, mandithamila lubu lukulu mukubakilila bupenyu gwangu. Koga andingatizhile ku matombo, ngoti mbatsha dzingadwa dzindibhata mu zila ndibe ndifa.

²⁰Bonani nzi wouje, upejo tjose kutizhila kuuli, na iko nzi ntukununu. Imani nditizhile kuuli. Apa auteli ntukununu kene? Ndowotjila.”

²¹Ntumwa we kudzimu kabe eti kunli, “Kwakalulwama, tjililo tjitjo ndatjihwa, ndizo anditowokolomodza nzi wawaleba.

²²Tizhilako ulibilidza, akuna tjandinowothama kuswikila waswikako.” Ndizo zina le nzi iwoyo lakabe lidang'wa kuyi Zowa.

²³Zhuba lakabe labhuda Loti eswika mu Zowa.

²⁴Ipapo Yahwe bakanisa sibabuli ne moto mu Sodoma ne Gomora kudwa kuna Yahwe kudzimu,

²⁵ngono bakakolomodza mizi iyeyo ne nkuku wose ne bagali bose be mizi iyeyo ne zwakamela pasi.

²⁶Koga nkadzi wa Loti wakabe ali shule kukwe katjebuka shule ngono kashanduka kabe gaa le mwenyu.

²⁷Kukati tjimuka mangwanana Abhurahama kayenda kwaalala ali mile na Yahwe.

²⁸Kalinga pasi ku Sodoma ne Gomora ne ntuthu wose we lubala ngono, bonani, kabona busi gumilika mu shango se busi gwe bibi.

²⁹Ndizo kwakajalo, Ndzimu wakati ukolomodza mizi ye lubala, ukakumbula Abhurahama ukadusa Loti mu golomodzo pawakakolomodza mizi Loti yaakabe egala muili.

³⁰Loti kabhuda mu Zowa kanogala ku matombo ne bakololokadzi babe babili ngoti wakabe etja kugala mu Zowa. Ndizo kagala mu guwu ne bakololokadzi babe babili.

³¹Nkololokadzi hwola kadwa nnung'una uwe kati, “Tate bedu bakwegula, ngono akuna nlume mu shango ungashangana naswi se kunoyitiwa mu shango yose.

³²Ngating'wise tate nkumbi we zhambi tilale nabo ndizo titjengete lutshinga gwedu gusife.”

³³Mu busiku igogo bakang'wisa tate babo nkumbi we zhambi ngono nkololokadzi hwola kangina kuna tate babo kalala nabo. Tate babo bakasitongo ziba kulala nabo kukwe kene kubhuda kukwe pabali.

³⁴Tjimuka nkololokadzi hwola kadwa nnung'una uwe kati, “Bona, ndakalala na tate mu busiku gwapinda, ngatibang'wise nkumbi we zhambi muna igogu busikubo, ungine ku bali ulale nabo ndizo tidwilidze lutshinga gwedu.”

³⁵Ndizo bakang'wisa tate babo nkumbi we zhambi muna igogo busikubo, ngono nkololokadzi ntjetjana kanolala nabo, koga bakasitongo ziba kulala kukwe ne kumuka kukwe.

³⁶Ndizo bakololokadzi ba Loti bubili gwabo bakazwisengeswa ndi tate babo.

³⁷Nkolokadzi hwola kawana mwana we tjilisana kantumila eti Moabu, ndiye batategulu be Bamoabu kuswikila nasi.

³⁸Nnung'una na iyebo kawana mwana we tjilisana kantumila eti Bhenami, ndiye batategulu be Baamoni kuswikila nasi.