Read Kalanga Kutangisa 2 Bible Online

Kutangisa 2 - Kalanga bible

Kutangisa 2

¹Ndizo kubumbiwa kwe kudzimu ne shango ne zwithu zose zwimu zwili kukapedziwa.

²Ngono mu zhuba le butendeka Ndzimu ukaligila nshingo wawo wawakabe ushinga, ngono ukanyaluluka mu zhuba le butendeka mu nshingo wose wawakabe washinga.

³Ndzimu ukakombolela zhuba le butendeka ukaliyengemadza, ngoti Ndzimu wakanyaluluka mu lili mu nshingo wose we kubumba wawakathama.

⁴Edzi ndidzo thawu ngekwe kudzimu ne shango pazwakabumbiwa. Mu zhuba Yahwe Ndzimu labakabumba shango ne kudzimu,

⁵kwakabe kusina zwakamela mu shango. Kwakabe kusina ndodwa ne ntinyana wakamela ngoti Yahwe Ndzimu bakabe basathu bakanisa vula mu shango. Kwakabe kusathu kukabe ne nthu unolima,

⁶koga fulele yakabe imilika ikadilidzila pasi kose.

⁷Yahwe Ndzimu bakabumba nthu nge hwuluba ye mavu, ngono bakafemela meya ye bupenyu mu zwimilo zwizwe, ndizo kabe nthu unotjila.

⁸Yahwe Ndzimu bakabiga nnda mu Edeni ku bhezhuba, bakabe belonga nthu wabakabumba muuli.

⁹Ngono Yahwe Ndzimu bakathama kuti miti yose mibuya ngolingwa, kakale yakalulwamila jiwa imele pasi. Pakati kwe nnda kwakabe kuna nti we bupenyu ne nti we luzibo gwe bubuya ne mbipo.

¹⁰Gwizi gwakabe guwunga gudwa mu Edeni gudilidzila nnda, kudwa ipapo gwakabe gupalalana gube njizi dzili nna.

¹¹Zina le gwe kutanga ndi Pishoni, gwakabe guwunga gupoteleka shango yose ye Havila kuna golide.

¹²Golide ye shango iyeyo yakanaka, motsha unoyi bedeliumi ne mabgwe akanaka anoyi onikisi, zowang'wabo ikoko.

¹³Zina le gwizi gwe bubili ndi Gihoni, igo gopoteleka shango yose ye Khushi.

¹⁴Zina le gwizi gwe butatu koyi Tigirisi, ogu gowungila ku bhezhuba kwe Asiriya. Gwizi gwe bunna ndi Yufuratesi.

¹⁵Yahwe Ndzimu bakatola nthu bakanlonga mu nnda we Edeni kulima muuli ne kuutjengeta.

¹⁶Ngono Yahwe Ndzimu bakadwa nthu bakati, “Ungaja ntjelo we nti mmwe ne mmwe mu nnda wakasununguka,

¹⁷koga usitongoja ntjelo we nti we luzibo gwe bubuya ne mbipo, ngoti zhuba launouja, nge malebeswa unowofa.”

¹⁸Yahwe Ndzimu bakabe beti, “Akuzonaka kuti nthu agale ega, ndowonthamila mbhatshi wakanlingisana.”

¹⁹Ndizo Yahwe Ndzimu bakathama phuka dzose dze shango ne nyuni dzose dze phepo nge vu. Bakadzizhisa ku nthu kubona kuti unowodzitumila mazina eitini, ngono zina limwe ne limwe nthu laakapa itjili tjimwe ne tjimwe lakabe ilo zina latjo.

²⁰Ndizo nthu kapa zwithuwo zose mazina ne nyuni dzose dzinowuluka mu phepo ne phuka dzose dze shango, koga nthu iye kukawanika kusina mbhatshi wakanlingisana.

²¹Yahwe Ndzimu bakathama kuti nlume abhakhwe nge hwope hwulu, ngono kati atjakaizela, bakabe bedusa gumwe lubadu mu mbadu dze nlume, bebe bezwina pagwadwa nge nyama.

²²Ipapo Yahwe Ndzimu bakabe bebumba nkadzi nge lubadu gwabadusa mu nlume, bebe benzhisa ku nlume.

²³Nlume kabe eti, “Eli i fupa le mafupa angu, ne nyama ye nyama yangu. Unowodang'wa kuyi, ‘Nkadzi’ ngoti wadusiwa mu nlume.”

²⁴Ngekwa ikoku, nlume unowosiya tate babe na mmeyabe kabhatana ne nkadzi uwe, ngono banowobe tjithu tjing'ompela.

²⁵Nlume ne nkadzi uwe bakabe basakaambala bose, koga basina shoni.