Read Kalanga Kutangisa 21 Bible Online

Kutangisa 21 - Kalanga bible

Kutangisa 21

¹Yahwe bakakombolela Sara sekwa bakaleba, bakashingikadza tjabakan'gadzabgwe.

²Sara kazwisenga kawanila Abhurahama mwana we tjilisana nge tjibaka Ndzimu tjawakaleba mu nsi wawakalebeleka naye. Abhurahama wakabe akwegula.

³Abhurahama katumila mwana uwe zina waakawana na Sara eti Isaki.

⁴Ngono Abhurahama kathumbila Isaki nkololo uwe ana mazhuba ali zhanakadzi (8) sekwa akadwiwa nge Ndzimu.

⁵Abhurahama wakabe ana makole ali zana (100) ha kuzwagwa Isaki nkololo uwe.

⁶Ipapo Sara kati, “Ndzimu wandizhisila kushatha, ndizo mmwe ne mmwe unowohwa ikoku unowoshatha nami.”

⁷Ngono kapapha kati, “Ndiani wakabe angadwa Abhurahama kati, ‘Sara unowomwisa bana?’ Ngono yezo, ndan'wanila nkololo mu kukwegula kukwe.”

⁸Mwana kakula kadusiwa mu zhamu, ngono Abhurahama kathama nzano nkulu mu zhuba lakadusiwa Isaki mu zhamu.

⁹Limwe zhuba Sara kabona nkololo wa Haga we Egipiti waakawana na Abhurahama edadila mwana uwe Isaki.

¹⁰Ngono kadwa Abhurahama kati, “Tata nlandakadzi ne nkololo uwe, ngobe nkololo we nlandakadzi aatogala thaka ne nkololo wangu Isaki.”

¹¹Ndebo iyeyi ikadziyidza Abhurahama kwazo ngekwe nkololo uwe.

¹²Koga Ndzimu ukati kuna Abhurahama, “Usidziyidzike ngekwe mbisana ne ngekwe nlandakadzi uwo, tjimwe ne tjimwe Sara tjaanokudwa utjishinge ngekuti ludzi gugo gowodang'wa nge zina la Isaki.

¹³Ngekwe mwana we nlandakadzi, ndowothama ludzi gugwe gukabe itjaba ngoti na iyebo nkololo uwo.”

¹⁴Ndizo Abhurahama kabinduka tjimuka katola zojiwa ne ikuyu tje vula kazwipa Haga, kankhiga izo kantata kati ayende ne mbisana. Kayenda kanodzungayila mu tjilambanyika tje Bheerisheba.

¹⁵Vula ikati yapela mu ikuyu kagadza mbisana kusi kwe limwe denjana.

¹⁶Haga kayenda thambgwana, bukule gungaposiwa nsebe ukanobhayapo. Kazwidwa kati, “Andingatubule kulinga mwanangu efa.” Kati atjigele ipapo mwana kamilidza hwi kalila.

¹⁷Ndzimu ukahwa tjililo tje mbisana ngono ntumwa we kudzimu ukabhuzwa Haga uli kudzimu ukati, “Ini tjakudziyidza Haga? Usitje ngoti Ndzimu wahwa tjililo tje mbisana.

¹⁸Milika utole mbisana umbhate nge luboko ngekuti ndowonthama itjaba tjikulu.”

¹⁹Ipapo Ndzimu ukazhula mesho awe ngono kabona tshime le vula. Kayenda kanozhadza ikuyu nge vula kapa mbisana kang'wa.

²⁰Ndzimu ukabe ne mbisana ngono mbisana kakula. Kagala mu tjilambanyika kabe nyambi ye kushingisa dati ne misebe.

²¹Kagala mu tjilambanyika tje Parani ngono mmeyabe bakanshakila nkadzi ku Egipiti.

²²Nge tjibaka itjetjo Abimeleki ana Fikoli nlauli we babhayani ba Abimeleki bakadwa Abhurahama bakati, “Ndzimu unawe mu tjimwe ne tjimwe tjaunoshinga.

²³Ngwenu ndizo tuna nge Ndzimu kuti aungandithamile bupitipiti imi ne bana bangu nenge zwizekugwana zwangu. Undilakidze buthu gunonga gwandakakulakidza ubuye ugulakidze shango iyeyi yaunotjila muili.”

²⁴Abhurahama kabe eti, “Ndotuna.”

²⁵Ipapo Abhurahama kayisa ng'ong'olo kuna Abimeleki ngekwe tshime le vula lakatapiwa ne balanda ba Abimeleki.

²⁶Abimeleki kati, “Anditoziba kuti ndiani wakathama kuthu ikoku. Auzotongo ndibudza, naiko andizotongo hwa nge kwako kuswikila nasi.”

²⁷Ndizo Abhurahama katola pkhwizi ne ng'ombe kadzipa Abimeleki ngono balume ibaba babili bakathama tjidumano.

²⁸Abhurahama katheula pkhwizana hadzi dzili kutendeka.

²⁹Abimeleki kabhuzwa Abhurahama kati, “Pkhwizana idzedzi dzili kutendeka dzawatheula dzodwani?”

³⁰Abhurahama kabe eti, “Amutjila pkhwizana idzedzi dzili kutendeka, kube tjilakidzo tje butendeki gwe kuti ndimi ndakatsha tshime ileli.”

³¹Ndizo magalo iyawo kadang'wa kuyi Bheerisheba[2] ngobe bose bubili gwabo bakatunilana ikoko.

³²Ndizo bakathama tjidumano ku Bheerisheba, Abimeleki na Fikoli nlauli we babhayani bakamilika bakabgwilila ku shango ye Bafilisitiya.

³³Abhurahama kadzwala nti we ntamarisiki mu Bheerisheba ngono kanamata Yahwe, Ndzimu we kusingapele.

³⁴Abhurahama kagala mu shango ye Bafilisitiya tjibaka tjilefu.