Read Kalanga Kutangisa 22 Bible Online

Kutangisa 22 - Kalanga bible

Kutangisa 22

¹Shule kwe zwithu izwezwi, Ndzimu ukashola Abhurahama kubona kuti nthu wakatini. Ukan'dana ukati, “Abhurahama!” Kadabila eti, “Ndipano.”

²Ndzimu ukabe uti, “Tola nkololo uwo, nkololo uwo uyega Isaki waunoda, uyende ku shango ye Moriya un'duse tjili tjibhayilo tjinopisiwa pezhugwi kwe limwe le matombo landinowokubudza.”

³Ndizo tjimuka Abhurahama kabinduka kathubulila hwuni dze tjibhayilo tjinopisiwa kadzibelesa donki iye, kabe etola balanda babe babili ne nkololo uwe Isaki, katola hwuni dze tjibhayilo tjinopisiwa ngono kamilika kayenda ku bugalo gwaakabe abudziwa nge Ndzimu.

⁴Mu zhuba le butatu Abhurahama kamilidza mesho kabona pathu ipapo patjikule.

⁵Ipapo Abhurahama kati ku balanda babe, “Salani ipapa ne donki, imi ne mbisana towoyenda apaje tinonamata Ndzimu tikobuya kumuli.”

⁶Abhurahama katola hwuni dze tjibhayilo tjinopisiwa kadzisengesa nkololo uwe Isaki, iye kasenga moto ne mpanga nge luboko gugwe. Ngono bakayenda bubili gwabo.

⁷Isaki kabe eti kuna tate babe Abhurahama, “Tate!” Ibo bakadabila beti, “Ukatini nkololo wangu?” Isaki kabe eti, “Bonani, tina moto ne hwuni, pkhwizana ye tjibhayilo tjinopisiwa ingayi?”

⁸Abhurahama kadabila eti, “Nkololo wangu, Ndzimu unowotipa pkhwizana ye tjibhayilo tjinopisiwa.” Ngono bubili gwabo bakayenda.

⁹Bakati beswika pathu paakabudziwa nge Ndzimu, Abhurahama kathama tjibeso tjinopisigwa zwibhayilo kayilikanya hwuni zubuyanana pezhugwi kwatjo. Kasunga nkololo uwe Isaki kambiga pezhugwi kwe hwuni.

¹⁰Ipapo Abhurahama katambunudza luboko gugwe katola mpanga kubulaya nkololo uwe.

¹¹Koga ntumwa wa Yahwe kadana ali kudzimu kati, “Abhurahama! Abhurahama!” Abhurahama kadabila kati, “Ndipano.”

¹²Ntumwa wa Yahwe kabe eti, “Usikubadze mbisana iwoyu kene kuli kunthama tjimwe. Ngwenu ndaziba kuti unotja Ndzimu ngoti ndabona usingalambe ne nkololo uwo uyega.”

¹³Abhurahama kamilidza mesho katjebuka ngono kabona nyundo yakabhakhwa nge nyanga mu ishaka. Kabe eyenda ku ili kaitola kaithama tjibhayilo tjinopisiwa mu bumo gwe nkololo uwe.

¹⁴Ndizo Abhurahama kadana pathu ipapo eti, “Yahwe banowopa.” Nanasi kutjayi, “Pezhugwi kwe dombo la Yahwe, banowopa.”

¹⁵Ntumwa wa Yahwe kadana Abhurahama gwe bubili ali kudzimu

¹⁶kati, “Ndotuna, koleba Yahwe, se wathama ikoku ukasilambe ne nkololo uwo uyega,

¹⁷ndowokukombolela kakale ndowowatsha ludzi gugo gukabe bunji se nyenyedzi dza pezhugwi ne nsetje mu tjekelo dze gungwa. Ludzi gugo gowotapa mizi ye zwita zwago.

¹⁸Zwitjaba zose zwe shango zowokombolegwa ngekwe bana babo ngoti wandihwa.”

¹⁹Ndizo Abhurahama kabgwilila ku balanda babe ngono bakamilika bose bakayenda ku Bheerisheba. Abhurahama kagala ku Bheerisheba.

²⁰Shule kwe zwithu izwezwi Abhurahama kahwa kuti Milikha na iyebo wakawanila Nahori nnung'una uwe bana be tjilisana.

²¹Mbano ili Uzi, etobegwa ndi Bhuzi kukoti Kemuele tate ba Aramu,

²²kutobela Kesedi na Hazori na Pilidashi na Jidilafu na Bhethuwele.

²³Bhethuwele iye wakazwala Ribeka. Milikha wakawanila Nahori nnung'una wa Abhurahama bakololo ibaba bali zhanakadzi (8).

²⁴Nahori kazwala bamwe bakololo ne nlongwana wakabe eyi Reuma. Mazina abo ndibo Teba na Gahamu na Tahashi na Maakha.