Read Kalanga Kutangisa 23 Bible Online

Kutangisa 23 - Kalanga bible

Kutangisa 23

¹Sara wakatjila makole ali zana lina makole ali makumi mabili ana makole ali kutendeka (127).

²Sara wakafila ku Kiriyatiaribha (Heburoni) mu shango ye Kanana ngono Abhurahama kalilila Sara kabuya kan'galila tjililo.

³Abhurahama kamilika kasiya itumbu tje nkadzi uwe kayenda kunolebeleka ne Bahiti. Kabadwa kati,

⁴“Imi ndi nzhi ne ntaya ugele pakati kwenyu. Mundipeni pandingabiganya nfi wangu.”

⁵Bahiti bakashandula Abhurahama bakati,

⁶“Mutihwilileni tetshi wedu, mu ntungamili wakasima pakati kwedu. Biganyani nfi wenyu pamashalula, akuna wedu ungamudzibisa kubiganya.”

⁷Ndizo Abhurahama kamilika ngono kazwiyisa pasi mbeli kwe beni be shango Bahiti.

⁸Kalebeleka nabo kati, “Ha muda kuti ndingabiganya nfi wangu, mundihwilileni, mu ndikumbilile Efuroni nkololo wa Zohari

⁹kuti anditengesele guwu lile le Makipela liku misholo ye nnda uwe. Lebelekani naye anditengesele ilo nge themba izhele mu mesho enyu, libe ipo pandinobiganyilapo.”

¹⁰Ngono Efuroni we Nhiti wakabe aliyapo ipapo ngono kashandula Abhurahama mu zebe dze Bahiti bose bakabe bazha ku nkoba we nzi eti,

¹¹“Aa, tetshi wangu, mundihwilile. Ndomupa ntuthu iwoyo ne guwu limuuli. Ndomupa iwo mbeli kwe bakanyi kwedu. Biganyani nfi wenyu.”

¹²Ipapo Abhurahama kazwiyisa pasi mbeli kwe beni be shango.

¹³Ngono kadwa Efuroni mbeli kwe lubazhe gwe beni be shango kati, “Koga undihwilile, ndowokulipa themba ye ntuthu iwoyo, uiamutjile kuti ndibiganye nfi wangu ko.”

¹⁴Efuroni kashandula Abhurahama eti,

¹⁵“Munditeedzeni tetshi wangu, themba ye ntuthu iwoyu i shekele dze siliva dzili mazana manna (400), ngono koga ikoku ini pakati kwangu namwi? Biganyani nfi wenyu.”

¹⁶Abhurahama kadumana na Efuroni, ndizo Abhurahama kayelela Efuroni themba ye shekele dze siliva yaaleba mu zebe dze Bahiti, mazana manna (400) e shekele dze siliva kuyendidzana ne zwiyelo zwe batengesi be misi iyeyo.

¹⁷Ndizo ntuthu wa Efuroni mu Makipela ku bhezhuba kwe Mamure, ntuthu ne guwu lakabe lili muuli ne miti yose yakabe ili muuli, midzibo yawo yose,

¹⁸yakapiwa Abhurahama kube iye mu mesho e Bahiti ne bamwe bose bakabe bazha ku lubazhe gwe nzi uwe.

¹⁹Shule kwa ikoku Abhurahama kabiganya Sara nkadzi uwe mu guwu le ntuthu we Makipela kulingisana ne Mamure ku Heburoni mu shango ye Kanana.

²⁰Bahiti bakapa Abhurahama ntuthu ne guwu lakabe lili muuli kube paanobiganyila bafi babe.