Read Kalanga Kutangisa 24 Bible Online

Kutangisa 24 - Kalanga bible

Kutangisa 24

¹Abhurahama wakabe atjikwegula kwazo abe ne makole manjinji, Yahwe bakabe bankombolela mu zwithu zose.

²Abhurahama kadwa nlanda uwe nkulu pa bamwe bose mu nsha uwe, iye wakabe ali ntjengeti we thundu iye yose kati, “Milidza luboko gugo,

³ndoshaka kuti utune na Yahwe, Ndzimu we kudzimu ne shango, kuti autowoshakila mwanangu nkadzi mu bakololokadzi be Bakanana bandigele pakati kwabo.

⁴Koga unowoyenda ku shango ya kanyi kwedu ku ludzi gwangu unoshakila nkololo wangu Isaki nkadzi ko.”

⁵Nlanda kabhuzwa eti, “Pamwe nkadzi iwoyo ungasada kuzha nami ku shango ino. Ha kwakajalo ndibgwilize nkololo wenyu ku shango yamakadwa kene?”

⁶Abhurahama kadabila kati, “Aa, ubone kuti autowobgwiliza nkololo wangu ikweno.

⁷Yahwe Ndzimu we kudzimu, ibo bakandidusa mu nsha wa tate ne mu shango yandakazwaligwa muili, bakalebeleka nami, bakandigadzabgwe ngotuna beti, ‘Ludzi gugo ndowogupa shango iyeyi,’ banowotuma ntumwa wabo kukutungamila, ndizo wali unotolela nkololo wangu nkadzi ikweno.

⁸Koga ha nkadzi iwoyo asingade kubuya nawe unowosununguka mu kutuna kwangu ikoku, ngono tjikulu usitongobgwiliza nkololo wangu ikweno.”

⁹Ndizo nlanda kamilidza luboko gugwe katuna edumana na tetshi uwe Abhurahama muna ikoku.

¹⁰Ipapo nlanda katola kamela dza tetshi uwe dzili gumi ne zwipo zwakasiyasiyana zwibuya ngono kamilika kayenda ku nzi wakabe udang'wa Nahori ku bunandzwa gwe Misopotamiya.

¹¹Kwakati mu matewuko kathama kuti kamela dzilale pasi pa tshime lakabe lili kuzhe kwe nzi nge tjibaka tjinobhuda bakadzi benotjela vula.

¹²Ngono katembezela kati, “Yahwe Ndzimu wa tetshi wangu Abhurahama, mundiwatshe ndiwane tjandazhila nasi, mulakidze lubu kuna tetshi wangu Abhurahama.

¹³Bonani, ndimile pa nsenya we vula, baanadi be nzi banobhuda kuwotjela vula.

¹⁴Itani kuti mwanadi wandinowoti kunli, ‘Undipebo vula nding'we,’ iye ebe eti, ‘Ing'wani, kakale ne kamela dzenyu ndowodzing'wisa.’ Ngaabe iye wamashalulila nlanda wenyu Isaki. Ikoku kowondilakidza kuti malakidza tetshi wangu lubu.”

¹⁵Kati asathu kapedza kutembezela Ribeka kazha akabiga hali iye pa thudzi. Wakabe ali nkololokadzi wa Bhethuwele, Bhethuwele ali nkololo wa Milikha nkadzi wa Nahori nnung'una wa Abhurahama.

¹⁶Mwanadi iwoyo wakabe ali mmbuya kwazo, ali mwanadi usathu kaziba nlume. Kayenda ku tshime ngono kazhadza hali iye nge vula kabhuda.

¹⁷Nlanda kalabuka kunonshanganidza kankumbila kati, “Ndokumbila, undipebo vula shomanana mu hali iyo nding'we.”

¹⁸Mwanadi kabe eti, “Ing'wani zwenyu tetshi wangu.” Ndizo katula hali iye kayibhata nge maboko kampa vula kang'wa.

¹⁹Kati asinompa vula kandwa kati, “Ndowotjelelabo kamela dzenyu kuti dzing'we dzigukhwe.”

²⁰Ndizo kadila vula yose imu hali iye mu n'goro kalabukila ku tshime kunotjela imwe vula. Katjelela kamela dzidze dzose vula kuswikila dzagukhwa.

²¹Nlume iwoyo kalingilila mwanadi nge tjitu koga kubona kuti kene Yahwe bawatsha gwendo gugwe kene aa.

²²Kukati kamela dzang'wa dzagukhwa nlume iwoyo katola ng'ina le golide linoambagwa mu tjimilo le themba ipezhugwi ne maseka e golide mabili mapabi e themba ipezhugwi kwazo.

²³Ngono kabhuzwa kati, “Undibudze kuti u nkololokadzi waani? Kuna bulalo kene ku nzi wa tate babo patingalonga nsholo?”

²⁴Iye kan'dabila eti, “Ndi nkololokadzi wa Bhethuwele nkololo wa Nahori na Milikha.”

²⁵Ngono kapapha eti, “Tina bushwa gwakatjekegwa zwithuwo ne zojiwa zwakalizana ne bulalo guyapobo.”

²⁶Ipapo nlume iwoyo kathigama enamata Yahwe,

²⁷ngono kabe eti, “Ngakukudziwe Yahwe, Ndzimu wa tetshi wangu Abhurahama, ibo basaletja kulakidza lubu gwabo ne kugagwabgwe kwabo kuna tetshi wangu. Kundili nge kwangu, Yahwe banditungamila mu gwendo kunoswika ku nzi we bazwagwa ba tetshi wangu.”

²⁸Mwanadi kalabuka kanobudza nsha wa mmeyabe ngekwe zwithu izwezwi.

²⁹Ribeka wakabe ana hazwadzi iye yakabe idang'wa Labani wakati kalabukila ku nlume iwoyo ku tshime.

³⁰Wakati ebona ng'ina ne maseka mu maboko e hazwadzi iye kakale ehwa matama a Ribeka hazwadzi iye eleba tjaabudziwa nge nlume iwoyo, kabhuda kayenda ku nlume iwoyo kawana alimile pa kamela pa tshime.

³¹Labani kandwa kati, “Nginani mu nzi, imwi makombolegwa ndi Yahwe, mutjimilileni kuzhe kene? Ndamululwamisila ng'umba ne pamungatethela kamela dzenyu.”

³²Ndizo nlume iwoyo kayenda ku nzi. Labani kabelesenula kamela kadzipa bushwa ne zojiwa. Kapa nlume iwoyo ne baanabo vula ye kungula makumbo abo.

³³Ipapo bakapiwa zojiwa, koga nlume iwoyo kati, “Imi andingaje kuswikila ndaleba tjandazhila.” Labani kati kunli, “Dwililani mulebeleke.”

³⁴Ndizo kati, “Ndi nlanda wa Abhurahama.”

³⁵“Yahwe bakakombolela tetshi wangu kwazo kafuma. Bakampa pkhwizi ne ng'ombe ne kamela ne madonki, bakampa siliva ne golide ne balandalume ne balandakadzi.

³⁶Sara, nfumakadzi wa tetshi wangu nenguba akabe atjikwegula, wakawanila tetshi wangu mwana we tjilisana, ngono tetshi wangu wakampa tjimwe ne tjimwe tjaanatjo.

³⁷Tetshi wangu wakathama kuti ndin'gadzebgwe nge kutuna, eti, ‘Usitongoshakila mwana wangu nkadzi mu bakololokadzi be Bakanana be shango yandigele muili,

³⁸koga yenda ku ludzi gwa tate bangu, ku makamu angu ushakile nkololo wangu nkadzi ko.’

³⁹Ngono ati kuna tetshi wangu, ‘Pamwe nkadzi iwoyo unowolamba kubuya nami.’

⁴⁰Tetshi wangu kashandula eti, ‘Yahwe bandinohwa mu bupenyu, banowotuma ntumwa wabo we kudzimu kuyenda nawe kuti tjaunoyendila tjibhudilile uwanile nkololo wangu nkadzi mu makamu angu mu ludzi gwa tate.

⁴¹Koga ha ungati uswika ku makamu angu bakalamba kukupa nkadzi, unowobe wasununguka mu tjidumano tjangu.’ ”

⁴²“Ndati nasi ndiswika pa tshime, abe nditi, Yahwe, Ndzimu wa tetshi wangu Abhurahama, mundiwatshe mu zila yandinoyenda.

⁴³Ndimile pano pa tshime ileli, itani kuti mwanadi unowotjela vula, iye wandinowoti kunli, ‘Ndokukumbila, undipebo vula nding'we,’

⁴⁴ngono iye ebe eti, ‘Ing'wani ne kamela dzenyu ndowodzitjelelabo vula,’ ngaabe iye washalugwa ndi Yahwe kube nkadzi we nkololo wa tetshi wangu.

⁴⁵Ndati ndisathu apedza kutembezela mu moyo wangu Ribeka kazha akabiga hali iye ye vula pa thudzi. Kayenda pa tshime katjela vula, ngono andwa ati, ‘Undipebo vula nding'we.’

⁴⁶Katjimbidza kadelusa hali iye pa thudzi lile kati, ‘Ing'wani ne kamela dzenyu ndowodzitjelelabo vula.’ Ngono ang'wa, kabuya kang'wisa kamela dzangubo.

⁴⁷Ambhuzwa ati, ‘U nkololokadzi waani?’ Ngono kadabila eti, ‘Ndi nkololokadzi wa Bhethuwele nkololo wa Nahori na Milikha.’ Abe ndimbadza ng'ina mu tjimilo ne maseka mu maboko.

⁴⁸Ndakati athigama anamata Yahwe. Akudza Yahwe, Ndzimu wa tetshi wangu Abhurahama ibo bakanditungamila mu zila yakalulwama kuti ndinotolela nkololo uwe nkololokadzi we gamu lile.

⁴⁹Ndizo ngwenu mundilakidze ha muna lubu ne kugalikabgwe muna tetshi wangu, ha musina ndibone tjandingashinga.”

⁵⁰Ipapo Labani na Bhethuwele bakashandula beti, “Kuthu ikoku kwadwa kuna Yahwe, iswi akuna tjatingaleba.

⁵¹Ribeka hwoyoyu, untole uyende naye, anobe nkadzi we nkololo wa tetshi uwo, Yahwe sekwa balakidza.”

⁵²Nlanda wa Abhurahama kati ehwa matama abo, kanamata Yahwe.

⁵³Nlanda iwoyo kadusa golide ne siliva ne ndalama ne zwiambalo kapa Ribeka. Kadusa zwipo zwinodika kapabo Labani hazwadzi iye na mmeyabe.

⁵⁴Ngono ipapo nlanda iwoyo ne balume baakabe anabo bakaja bakang'wa bakabuya bakalala ikoko. Bakati bemuka tjimuka nlanda kati, “Imani ndibgwilile kuna tetshi wangu.”

⁵⁵Koga hazwadzi ya Ribeka na mmeyabe bakati, “Imani abe naswi tjibakana kene mazhuba ali gumi, ndizo ekoyendazwe.”

⁵⁶Koga kabadwa kati, “Musindibhatilile. Se Yahwe bakathama kuti ndibhudilile mu zila yangu, imani ndibgwilile kuna tetshi wangu.”

⁵⁷Ipapo bakati, “Letjani tidane mwanadi timbhuzwe nge kwako.”

⁵⁸Ndizo bakadana Ribeka bakambhuzwa beti, “Unoda kuyenda ne nlume iwoyu kene?” Iye kadabila eti, “Ee ndoda.”

⁵⁹Ngono bakaletja Ribeka ne nleli uwe kayenda ne nlanda wa Abhurahama ne balume baakabe anabo.

⁶⁰Ngono bakayemulila Ribeka zwakanaka beti, “Hazwadzi yedu, ube mme be bunjinji. Ludzi gugo gutape zwita zwago.”

⁶¹Ipapo Ribeka ne babhatshi babe bakalulwamisa bakatatha kamela kuyenda ne nlume iwoyo. Ndizo nlanda iwoyo na Ribeka kayenda.

⁶²Isaki wakabe azha kudwa ku Bheerilahairoyi egala mu Negebu.

⁶³Ngono Isaki kabhuda kuli madekwana kuzwilobesa phepo, ngono kati emilidza mesho kabona kamela dzibuya.

⁶⁴Ribeka kati emilidza mesho kabona Isaki ngono kadeluka kamela

⁶⁵kabhuzwa nlanda kati, “Iwouje nlume unothubulidza nge shango kutishangamidza ndiani?” Nlanda kashandula eti, “Ndi tetshi wangu.” Ndizo Ribeka katola tyali kazwikwididza ndiyo.

⁶⁶Ipapo nlanda kabudza Isaki zose zwaakashinga.

⁶⁷Ndizo Isaki katola Ribeka kan'yisa mu nshasha wakabe uli wa Sara, mmeyabe, ngono kanlobola. Kabe nkadzi uwe ngono Isaki kan'da ndizo kanyaladzika shule kwe lufu gwa mmeyabe.