Read Kalanga Kutangisa 25 Bible Online

Kutangisa 25 - Kalanga bible

Kutangisa 25

¹Abhurahama kalobola mmwe nkadzi wakabe eyi Ketura.

²Ketura kan'wanila Zimurani na Jokoshani na Medani na Midiyani na Ishibhaka na Shuwa.

³Jokoshani kazwala Sheba na Dedani. Bana ba Dedani bakabe bali bo Ashurimu na Letushimu na Leumimu.

⁴Bakololo ba Midiyani bakabe bali bo Efa na Eferi na Hanoki na Abida na Elida. Ibaba bose bakabe bali bana ne bana be bana ba Ketura.

⁵Ngono Abhurahama wakasiyila Isaki thundu iye yose,

⁶koga wakati atjatjila kapa bana be balongwana zwipo ngono kabafulusila ku shango dze ku bhezhuba ebadusa pa nkololo uwe Isaki.

⁷Abhurahama wakatjila makole ali zana lina makole ali makumi ali kutendeka ana makole ali mashanu (175).

⁸Abhurahama kakula ngono katjinyika akwegula nge buzhalo ana makole manjinji, ngono kafa.

⁹Isaki na Ishimaele bakololo babe bakambiganya mu guwu le Makipela mu nnda wa Efuroni nkololo wa Zohari we Nhiti ku bhezhuba kwe Mamure.

¹⁰Nnda iwoyo wakabe watengwa ndi Abhurahama mu Bahiti. Ndipo pakabiganyiwa Abhurahama ne nkadzi uwe Sara.

¹¹Shule kwe lufu gwa Abhurahama, Ndzimu ukakombolela Isaki nkololo uwe wakabe egala ku Bheerilahairoyi.

¹²Ogu ndigo ludzi gwa Ishimaele nkololo wa Abhurahama na Haga we Egipiti nlandakadzi wa Sara.

¹³Awa ndiwo mazina e bakololo ba Ishimaele etobedzana ngozwagwa kwabo, kuyendidzana ne zwizekugwana zwabo: Mbano ya Ishimaele yakabe ili Nebayoti, banung'una babe betobedzana sahwoku, Kedari na Adibhele na Mibisamu,

¹⁴kuzha Mishima na Duma na Masa na

¹⁵Hadade na Tema na Jetu kukoti Nafishi na Kedema.

¹⁶Ibaba ndibo bakololo ba Ishimaele, mazina iyawa ndiwo mazina e batungamili be njudzi dzili gumi lina mbili kuyenda nge mituthu yabo nenge mizi yabo.

¹⁷Ishimaele wakatjila makole ali zana lina makole ali makumi matatu ne makole ali kutendeka (137). Katjinyika ngono kabiganyiwa kwakabe kubiganyiwa bakanyi kwabo.

¹⁸Ludzi gwa Ishimaele gwakabe gugala kudwila mu Havila kunoti ku Shuri pejo ne Egipiti kuyendila ku Asiriya. Ndiko kwaakagala asingawililane ne bana ba tate babe.

¹⁹Eyi i ndongoloso ngekwe ludzi gwa Isaki nkololo wa Abhurahama. Abhurahama wakazwala Isaki.

²⁰Isaki kati ana makole ali makumi manna (40) kalobola Ribeka nkololokadzi wa Bhethuwele we N'aramu we Padani Aramu hazwadzi ya Labani we N'aramu.

²¹Isaki katembezela Yahwe ekumbilila nkadzi uwe ngoti wakabe asina mbeleko. Yahwe bakadabila ntembezelo uwe ngono Ribeka kazwisenga mabili.

²²Ngono phulu dzikagwisana mu ntumbu uwe, ngono iye kabe eti, “Ha kwakajali ndotjililani?” Ndizo kayenda kunobhuzwa Yahwe.

²³Ngono Yahwe bakati kunli, “Njudzi mbili dzi mu ntumbu uwo, Unowosununguka ukawana njudzi mbili dze bathu banonyanyayidzana. Ludzi gumwe gowobe gwakasima kupinda gumwe, Hwola inowoshingila ntjetjana.”

²⁴Ngono kwakati tjibaka tje kusununguka tjaswika, kukawanika dumbu akabe akazwisenga mabili e balisana.

²⁵We kutanga kazha ali nshaba, mmbili uwe wose una mmbethe unga tjiambalo tje bukuse, ndizo bakantumila beti Esau.

²⁶Shule kukazha nnung'una uwe akabhata Esau nge itshitshino ndizo katumigwa kuyi Jakubo. Isaki wakabe ana makole ali makumi matathatu (60) tjibaka tjabakazwagwa.

²⁷Balisana ibaba bakakula, Esau kabe ndzimba[3] nkulu, nthu we shango, koga Jakubo wakabe ali nthu wakatebama egala mu mishasha.

²⁸Isaki wakabe eda Esau ngoti wakabe empa nyama yaanoda ye phuka, koga Ribeka wakabe eda Jakubo.

²⁹Limwe zhuba Jakubo kati atjakabhika nyemba, Esau kazha edwa ku shango akabhakhwa nge zhala.

³⁰Esau kadwa Jakubo kati, “Undipebo nyemba idzedzi shaba dzawabhika ngoti ndafa nge zhala.” Ndizo Esau akadang'wa kuyi Edomu.[4]

³¹Jakubo kashandula eti, “Unditengesele fanilo dzidzo dze bumbano kutanga.”

³²Esau kati, “Bona, ndipejo ngofa, fanilo dze bumbano dzina bhatsho yeni mundili kene?”

³³Jakubo kabe eti, “Tuna takhwa.” Esau kabe etuna etengesa fanilo dze bumbano gugwe kuna Jakubo.

³⁴Ndizo Jakubo kabe epa Esau tjiwunga ne nyemba. Kaja kang'wa ngono kamilika kayenda. Esau kalengudza fanilo dze kuzwagwa kukwe ali mbano.