Read Kalanga Kutangisa 26 Bible Online

Kutangisa 26 - Kalanga bible

Kutangisa 26

¹Kukabe ne bhamba mu shango, bhamba lipoga lisi ilelije lakatongobepo mu misi ya Abhurahama. Ngono Isaki kayenda ku Gera kuna Abimeleki mambo we Bafilisitiya.

²Yahwe bakaboneka kuna Isaki bakandwa bakati, “Usitongoyenda ku Egipiti, gala mu shango yandinokubudza.

³Gala mu shango iyeyi, imi ndowobe nawe akukombolela. Ndowokupa shango idzedzi dzose iwe ne bana babo. Zwandakatuna ndigadzabgwe tate babo Abhurahama ndowozwithama.

⁴Ndowothama kuti bana babo babe banji se nyenyedzi dze zhuzhugwi. Ndowobapa shango idzedzi dzose. Njudzi dzose dze shango dzowokombolegwa ngekwe bana babo,

⁵ngekuti Abhurahama wakabe endihwa, ethama zwandakandwa, ehwa ndayo dzangu, elondolodza ndaulo dzangu ne milayo yangu.”

⁶Ndizo Isaki kagala mu Gera.

⁷Balume be magalo iyawo bakati bembhuzwa ngekwe nkadzi uwe kabadwa kati, “I hazwadzi yangu,” ngoti wakatja kuti, “Nkadzi wangu.” Wakabe ekumbula eti, “Balume be magalo iyawa bangana bakandibulaya ngekwa Ribeka, ngoti wakanaka.”

⁸Kwakati Isaki agala tjibaka tjilefu ikoko, Abimeleki mambo we Bafilisitiya kati elinga kuzhe nge fesitere kabona Isaki ebhatabhata nkadzi uwe Ribeka ezana naye.

⁹Ipapo Abimeleki kadana Isaki kati kunli, “Nkadzi uwo iwoyu. Ini tjakayita kuti uti i hazwadzi iyo?” Isaki kadabila eti, “Ngoti ndakakumbula kuti ndowodwa ndibulawa ndibulaigwa iye.”

¹⁰Abimeleki kabe eti, “Ini ikoku kwawatithamila? Mmwe ha angabe akabe akalala ne nkadzi uwo, ungabe wakabe watiwanisa nlandu.”

¹¹Ndizo Abimeleki kadwa bathu babe kati, “Iye unowoti kathamila mbipo nlume iwoyu kene nkadzi uwe unowobulawa.”

¹²Isaki kalima mu shango iyeyo ngono mu gole ilelo kavuna zwidzwalo zwakawanda ngoti Yahwe bakankombolela.

¹³Ngono kafuma, fumwa iye ikadwilila iwanda kuswikila ebe nfumi nkulu.

¹⁴Wakabe akafuma pkhwizi ne mbudzi ne ng'ombe, ana balanda banjinji ngono Bafilisitiya bakanthamila fupa.

¹⁵Ndizo Bafilisitiya bakabe bavukidza matshime wose akabe atshiwa ne balanda ba Abhurahama tate babe misi ya bakabe batjatjila.

¹⁶Abimeleki kadwa Isaki kati, “Tjidwazo patili ngoti wabe ne masimba kutipinda.”

¹⁷Ndizo Isaki kafuluka kanobiga mishasha iye mu nkuku we Gera ngono kagalako.

¹⁸Isaki kavukula matshime akabe atshiwa ndi tate babe Abhurahama akabe avukidziwa ne Bafilisitiya shule kwe kufa kwa Abhurahama. Ngono kaadana nge mazina aakabe adang'wa ndiwo ndi tate babe.

¹⁹Balanda ba Isaki bakatsha tshime mu nkuku ngono bakapubula vula.

²⁰Koga balisi be mu Gera bakalongelana nabo zhoba beti, “Vula iyeyi nge yedu.” Ndizo Isaki katumila tshime ilelo eti, “Eseki” ngoti bakalongelana naye zhoba.

²¹Balanda ba Isaki bakatsha limwe tshime ngono bakalilongelana zhoba nge kwalo kakale. Ndizo kalidana eti, “Lubengo.”

²²Isaki kadwa ipapo kanotsha limwe tshime ngono bakasililongelane zhoba. Kalitumila kati, “Rehoboti” eti, “Ngwenu Yahwe batipa magalo akazhuka kuti tiwande mu ali.”

²³Kudwa ipapo Isaki kayenda ku Bheerisheba.

²⁴Mu busiku igogo Yahwe bakazwilakidza kunli ngono bakandwa bakati, “Ndimi Ndzimu wa tate babo Abhurahama. Usitje, ngoti ndi nawe, ndowokukombolela awatsha ludzi gugo ngekwe nlanda wangu Abhurahama.”

²⁵Isaki kathama tjibeso tjinopisigwa zwibhayilo ngono kanamata Yahwe. Kabaka mishasha iye ipapo ngono balanda babe bakatsha tshime.

²⁶Ipapo Abimeleki kayenda kuna Isaki edwa ku Gera ana Ahuzati nkumbuludzi uwe na Fikoli nlauli we babhayani ba Abimeleki.

²⁷Isaki kababhuzwa kati, “Mabingani ngeno? Atenti mondishima makanditata pamuli?”

²⁸Bakadabila beti, “Tobona zubuyanana kuti Yahwe banawe, ndizo tabe titi ngakube ne tjidumano tje mbakisano pakati kwedu nawe,

²⁹tjekuti usitongo tithamila tjimwe tjakabipa se naswi tisakakuthamila tjimwe tjakabipa, takakuyendisa nge mbakiso. Nasi wakombolegwa ndi Yahwe.”

³⁰Isaki kabathamila nzano we zojiwa ngono bakaja bakang'wa.

³¹Tjimuka mangwanana bakatunilana. Isaki kabapeleka, ngono bakansiya nge mbakiso.

³²Mu zhuba ilelo balanda ba Isaki bakazha bakambudza ngekwe tshime labakatsha. Bakati, “Tapubula vula.”

³³Kalitumila eti Shiba[5] kuswikila mu zhuba lino zina le nzi iwoyo lodang'wa Bheerisheba.

³⁴Esau wakati ana makole ali makumi manna (40) kabe ekotosa Juditi nkololokadzi wa Bheeri na Bhasemati nkololokadzi wa Eloni be Tjihiti.

³⁵Ngono bakabipisa butjilo gwa Isaki na Ribeka.