Read Kalanga Kutangisa 27 Bible Online

Kutangisa 27 - Kalanga bible

Kutangisa 27

¹Kukati Isaki akwegula asingatjabonesese ku mesho, kadana nkololo uwe we mbano Esau kati kunli, “Nkololo wangu!” Esau kadabila eti, “Ndipano.”

²Isaki kabe eti kunli, “Bona, imi ndakwegula, zhuba le kufa kwangu anditoliziba.

³Ndizo ngwenu wali tola mathumo awo ne misebe ne dati uyende ku shango unondivimila phuka,

⁴ube undibhikila zojiwa zwinozipa zwandinoda, uzwizhise kundili ndije ndizo ndikokukombolela ndisathu afa.”

⁵Ribeka wakabe akahwilila Isaki elebeleka ne nkololo uwe Esau. Kukati Esau ayenda ku shango kunovima phuka,

⁶Ribeka kabe eti kuna Jakubo, “Ndahwa tate babo bedwa nkulu uwo Esau beti,

⁷‘Undizhisile phuka undithamile zojiwa zwinozipa ndije ndizo ndikukombolele mbeli kwa Yahwe ndisathu afa.’

⁸Ndizo mwanangu undihwilile uthame tjandinokudwa.

⁹Yenda ku danga undizhisile mbudzana mbili dzakakola, ndizo ndibhikile tate babo zojiwa zwinozipa zwe moyo wabo.

¹⁰Ukozwitola unobapa kuti baje ndizo bakokukombolela basathu bakafa.”

¹¹Jakubo kashandula Ribeka mmeyabe eti, “Nkulu wangu Esau nthu una mmbethe mu mmbili wose, koga imi andina mmbethe.

¹²Pamwe tate banowondiambamba ngono bakaziba kuti ndobatjebela bebe bendilonga bhiso pana kuti bandikombolele.”

¹³Koga mmeyabe bakati kunli, “Mwanangu, bhiso ilelo ngalibe mu ndili. Iwe shinga tjandinoleba koga. Yenda unondizhila idzo.”

¹⁴Ndizo Jakubo kayenda kanodzibhata kabuya nadzo kuna mmeyabe. Mmeyabe bakabhika zojiwa zwinozipa nge zila inodiwa ndi tate babe.

¹⁵Ribeka katola zwiambalo zwe mwana uwe hwola Esau zwakanaka zwakabe zwili mu ng'umba kazwiambadza mwana uwe ntjetjana Jakubo.

¹⁶Kaambadza Jakubo makanda e mbudzana mu maboko ne mu ntshibha paakabe asina mmbethe.

¹⁷Ribeka kapa Jakubo zojiwa zwinozipa ne tjiwunga tjaakabe abhika.

¹⁸Jakubo kayenda kuna tate babe kati, “Tate!” Ibo bakati, “Ndipano! Ndiwe ani mwanangu?”

¹⁹Jakubo kabe eti kuna tate babe, “Ndimi Esau mbano yenyu. Ndashinga sekwa mandidwa. Mukani zwenyu mugale muje nyama ye phuka yandabuya nayo mundikombolele.”

²⁰Isaki kabhuzwa nkololo uwe eti, “Waiwana tjini nge kulibilidza kungapa mwanangu?” Jakubo kashandula eti, “Yahwe Ndzimu wenyu bandiwanisa iyo.”

²¹Isaki kadwa Jakubo kati, “Sedzela pejo ndikubhate mwanangu kuti ndizibe kuti ndiwe nkololo wangu Esau kene aa.”

²²Jakubo kasedzela kuna Tate babe Isaki bakambhata ngono bakati, “Hwi nde la Jakubo, koga maboko nde a Esau.”

²³Ngono bakasinzibe ngoti maboko awe ana mmbethe se e nkulu uwe Esau, ndizo bakankombolela.

²⁴Bakabhuzwa bakati, “Apa ndiwe dumbu nkololo wangu Esau kene?” Kashandula kati, “Ndimi.”

²⁵Isaki kabe eti, “Undipe nyama ye phuka iyo yawabulaya ndije ndiko kukombolela.” Jakubo kazhisa nyama ne nkumbi kunli ndizo Isaki kaja kang'wa.

²⁶Ipapo tate babe Isaki bakati kunli, “Sedzela ngeno mwanangu undipute.”

²⁷Kayenda pabali kabaputa. Isaki kati ehwa nnuhwo we zwiambalo zwizwe kankombolela eti, “Kunuhwa kwe nkololo wangu konga kunuhwa kwe shango yakakombolegwa ndi Yahwe.

²⁸Ndzimu ngaukupe khawa ye kudzimu ne fumwa ye shango bawatshe zwidzwalo zwizo ne nkumbi uwo.

²⁹Bathu ngabakushingile ne zwitjaba ngazwikuthigamile. Ube she we bana ba tate babo ne bakololo ba mmeyabo bakuthigamile. Banokuyemulila bhiso, bhiso ngaliwile ibo, banokukombolela ngabakombolegwe.”

³⁰Kukati Isaki apedza kukombolela Jakubo, Jakubo atjadwa koga pana tate babe, Esau kaswika edwa kuvima.

³¹Na iye kabhikabo zojiwa zwinozipa ngono kazwiyisa kuna tate babe. Ngono kati ku bali, “Tate, mukani mugale muje nyama ye phuka yandabuya nayo ndizo mu kondikombolela.”

³²Tate babe Isaki bakambhuzwa beti, “Ndiwe ani?” Esau kashandula eti, “Ndimi Esau nkololo wenyu we mbano.”

³³Isaki katetema kwazo ngono kabhuzwa kati, “Ndiani iwoyu wanovima phuka kaizhisa kundili? Ndaija usathu ukabuya ngono ndankombolela, nge malebeswa unowokombolegwa.”

³⁴Esau kati ehwa matama a tate babe kaphutuka nge tjililo tjikulu tjinogwadza. Kadwa tate babe kati, “Mundikombolele, namibo mundikombolele tate bangu.”

³⁵Isaki kadabila eti, “Nnung'una uwo wazha nge bupitipiti ngono katola kukombolegwa kuko.”

³⁶Esau kabe eti, “Zina linoyi Jakubo lonfanila. Wanditjebela mu thambo idzedzi mbili dzose. Wakanditolela fanilo dze kuzwagwa kwangu ndili mbano, ngwenu wanditolela kukombolegwa kwangu. Akuna kukombolegwa kwa mandisiyila kene?”

³⁷Isaki kadabila Esau eti, “Ndanthama she uwo ne ludzi gugo gose ndaguthama balanda babe ngono ampa mathunde ne nkumbi. Ndizo ini wali tjandingakuthamila mwanangu?”

³⁸Esau kati kuna tate babe, “Mungabe muna tjing'ompela koga tjamungandikombolela nditjo kene tate? Mundikombolelebo tate bangu!” Ngono Esau kalila kwazo.

³⁹Ipapo tate babe Isaki bakan'dabila beti, “Magalo awo anowobe kule ne fumwa ye shango, Anobe kule ne khawa ye kudzimu.

⁴⁰Iwe unowotjila nge thumo. Unoshingila nnung'una uwo. Koga tjibaka tjaunowopanduka, Unowosununguka mu kulaula kukwe.”

⁴¹Esau kabenga Jakubo embengela kukombolegwa ndi tate babe. Kakumbula eti, “Mazhuba ekulilila tate abe pejo, kudwa ipapo ndowobulaya nnung'una wangu.”

⁴²Ribeka kati ahwa mano anolukwa ndi Esau nkololo uwe hwola kadana Jakubo nkololo uwe ntjetjana kandwa kati, “Nkulu uwo Esau unozwinyaladza nge nkumbulo we kukubulaya.

⁴³Ndizo ngwenu wali mwanangu thama tjandinoleba. Tizhila kuna basekulu babo Labani ku Harani.

⁴⁴Ugale nabo kuswikila bushongola gugwe gutebama.

⁴⁵Kowoti bushongola gwe nkulu uwo gwapela, akangang'wa tjawakanshingila, ndowozhisa dama ku kuli kuti ubuye ngeno. Kobhatshani kuti mundilashikile mose zhuba ling'ompela?”

⁴⁶Ribeka kati kuna Isaki, “Ndanyala kakale ndadziyidzika mu butjilo ngekwe bakadzi ibaba be Bahiti. Jakubo ha angalobola mmwe we bakadzi be shango iyeyi be Tjihiti kunganaka ha ndingafa.”