Read Kalanga Kutangisa 28 Bible Online

Kutangisa 28 - Kalanga bible

Kutangisa 28

¹Ndizo Isaki kadana Jakubo kankombolela kandwa kati, “Usitongolobola nkadzi we Nkanana.

²Milika uyende ku Padani Aramu ku ludzi gwa batategulu babo tate ba mmeyabo Bhethuwele unolobola mmwe we bakololokadzi ba Labani basekulu babo.

³Ndzimu Masimbawose ngaukukombolele ukupe bana banjinji bawande kudzina mube njudzi njinji.

⁴Ngaukupe iwe ne bana babo kukombolegwa kwa Abhurahama kuti ndizo utole shango iyeyi yaugele muili ngwenu se nzhi, shango Ndzimu yawakapa Abhurahama.”

⁵Ipapo Isaki kadwa Jakubo kuti ayende ku Padani Aramu kuna Labani basekulu babo nkololo wa Bhethuwele we N'aramu hazwadzi ya Ribeka mme ba Jakubo na Esau.

⁶Ipapo Esau kahwa kuti Isaki wakombolela Jakubo ngono kan'yisa ku Padani Aramu kunoshaka nkadziko. Kahwa kuti wakati enkombolela kandwa kati asitongo lobola nkadzi we Nkanana,

⁷ngono Jakubo kahwa tate babe na mmeyabe kayenda ku Padani Aramu.

⁸Kukati Esau ebona kuti bakadzi be Tjikanana abatoshathisa Isaki tate babe

⁹kayenda kuna Ishimaele nkololo wa Abhurahama kanolobola Mahalati nkololokadzi wa Ishimaele hazwadzi ya Nebayoti epaphidza bakadzi baakabe anabo kale.

¹⁰Jakubo kamilika mu Bheerisheba kayenda ku Harani.

¹¹Zhuba likammilila pamwe pathu ngono katola bgwe limwe ipapo kalisazamila kayizela.

¹²Kawolota ebona datho lakamisiwa pasi mu shango, theswi dzalo dziswika kudzimu, batumwa be Ndzimu bedeluka bakabuya bakatatha ndilo.

¹³Yahwe bakabe bali mile pezhugwi kwalo ngono bakabe beti, “Ndimi Yahwe Ndzimu wa batategulu babo Abhurahama, Ndzimu wa Isaki. Shango yaulele muili ndowoipa iwe ne bana babo.

¹⁴Ludzi gugo gowowanda se hwuluba ye shango, mowopashila ku golombedzo ne ku bhezhuba ne ku bunandzwa ne ku burwa. Njudzi dzose dze shango dzowokombolegwa nge kuko nenge kwe bana babo.

¹⁵Bona, ndinawe, ndowokutjengeta kumwe ne kumwe kwaunoyenda akubuza mu shango iyeyi. Andingakusiye kuswikila ndishinga tjandakakugadza bgwe.”

¹⁶Jakubo kamuka mu hwope ngono kati, “Nge malebeswa tjose Yahwe bayapo pathu ipapa, koga ndabe ndisingazibe.”

¹⁷Kawigwa ngotja ngono kati, “Pathu ipapa panotjisa seni! Ipapa pathu i ng'umba ye Ndzimu, ipapa nkoba we kudzimu.”

¹⁸Tjimuka mangwanana Jakubo katola bgwe laakabe akasazamila kalimisa kube ikumbuludzo ngono kalidila mafuta.

¹⁹Katumila pathu ipapo kati Bhetele nenguba nzi iwoyu wakabe udang'wa Luzi.

²⁰Ipapo Jakubo katuna kabe eti, “Ha Ndzimu ungabe nami ukanditjengeta mu gwendo igogu gwandinoyenda ukandipa zojiwa ne zwiambalo

²¹adzina abgwilila ku nzi wa tate kusina tjibiibi, Yahwe banowobe Ndzimu wangu.

²²Bgwe ileli landamisa ipapa se ikumbuludzo lowobe ng'umba ye Ndzimu ngono kose kwa munowondipa ndowodusa tje bugumi.”