Read Kalanga Kutangisa 29 Bible Online

Kutangisa 29 - Kalanga bible

Kutangisa 29

¹Jakubo kadwilidza gwendo gugwe ngono kanoswika ku shango ye ku bhezhuba.

²Kati emilidza mesho kabona tshime lakazhaligwa nge bgwe gulugulu ngono kulipoteleka kulilele matanga matatu e pkhwizi ngoti dzakabe dzing'wisiwa ipapo.

³Kwakabe kuti matanga e pkhwizi asinokubungana wose, balisi bakakunguludza bgwe belidusa pa nlomo we tshime bekong'wisa pkhwizi dzabo. Kudwapo bebgwiliza bgwe mu magalo alo pa nlomo we tshime.

⁴Jakubo kabhuzwa balisi kati, “Modwa ngayi bakanyi kwedu?” Ibo bakadabila beti, “Todwa ku Harani.”

⁵Jakubo kabe ebhuzwa eti, “Mungabe muziba Labani nkololo wa Nahori kene?” Bakadabila beti, “Ee, tonziba.”

⁶Ipapo Jakubo kababhuzwa kati, “Unomukazwe kene?” Bakashandula beti, “Unomuka. Nkololokadzi uwe Rahele wouje waswika ne pkhwizi.”

⁷Jakubo kabe eti, “Kutji masikati, atjithu tjikabe tjibaka tje kukubunganya zwithuwo. Ng'wisani pkhwizi mudziyise ku mafulo.”

⁸Bakanshandula beti, “Atingadzing'wise kuswikila matanga wose akubungana, bgwe lakunguludziwa kudwa pa nlomo we tshime. Ipapo ndiko kwatingadzing'wisa.”

⁹Jakubo kati atjalebeleka nabo, Rahele kaswika ne pkhwizi dza tate babe ngoti wakabe ali nlisikadzi wadzo.

¹⁰Jakubo kati ebona Rahele nkololokadzi wa Labani hazwadzi ya mmeyabe ne pkhwizi dza Labani, kayenda kakunguludza bgwe kalidusa pa nlomo we tshime kang'wisa pkhwizi dza basekulu babe.

¹¹Ipapo Jakubo kaputa Rahele ngono kamilidza hwi kalila.

¹²Kabudza Rahele kati, “Imi ndi gamu la tate babo, ndi nkololo wa Ribeka.” Rahele kalabuka kanobudza tate babe.

¹³Labani kati ehwa ngekwa Jakubo mwana we hazwadzi iye kalabuka kunonshanganidza. Kan'gumbatila kamputa ngono kayenda naye ku nzi uwe. Jakubo kabudza Labani zwithu izwezwi zose.

¹⁴Labani iye kandwa kati, “Iwe u gamu langu, ti lopa ling'ompela.” Jakubo kagala ipapo mwedzi wose.

¹⁵Labani kadwa Jakubo kati, “Akuzolingisana kuti undishingile usina tjinokubuyila. Ndipo iyo ingabeni?”

¹⁶Labani wakabe ana bakololokadzi bali babili, hwola eyi Liya, ntjetjana eyi Rahele.

¹⁷Liya wakabe ana lidandi mu mesho, koga Rahele akabumbika zwakanaka ali mbuya.

¹⁸Jakubo wakabe eda Rahele. Ndizo kadwa Labani kati, “Ndowomushingila makole ali kutendeka mukondipa Rahele kunlobola.”

¹⁹Labani kadabila eti, “Kwakanaka kuti ndikupe iye pana kuti ndimpe mmwe nthu. Gala nami.”

²⁰Ndizo Jakubo kashinga makole ali kutendeka kuti apiwe Rahele. Makole iyawa kanga mazhuba asi mangana koga ngoti eda Rahele.

²¹Ngono Jakubo kabe eti kuna Labani, “Tjindipani nkadzi wangu nditjishangana naye ngoti tjibaka tjatakadumana tje kunshingila tjapela.”

²²Ndizo Labani kathama bukwe kakoka bathu be bugalo igogo.

²³Koga kwakati kwabe madekwana katola nkololokadzi uwe Liya kan'yisa kuna Jakubo ngono iye kawalilana naye.

²⁴Labani katola Zilipa nlandakadzi uwe kampa Liya nkololokadzi uwe kube nlandakadzi uwe.

²⁵Kwakati tjimuka mangwanana Jakubo kabona kuti walala apiwa Liya. Ndizo kabe eti kuna Labani, “Ini ikoku kwamandithamila? Ndakashingila Rahele, ini manditjebela?”

²⁶Labani kashandula eti, “Ate uli mpanga wedu kulobodza ntjetjana etangila nkuluyi.

²⁷Pedza tshipi iyeyi ye bukwe gwa iwoyu. Ngono towokupa ntjetjana wanshingilabo mamwe makole ali kutendeka.”

²⁸Jakubo kashinga saikoko. Kapedza tshipi ana Liya ngono Labani kampa Rahele nkololokadzi uwe kube nkadzi uwe.

²⁹Labani katola Bhiliha nlandakadzi uwe kampa Rahele nkololokadzi uwe kube nlandakadzi uwe.

³⁰Jakubo kashanganabo na Rahele ngono kada Rahele kupinda Liya. Jakubo kashingila Labani mamwe makole ali kutendeka.

³¹Yahwe bakati bebona kuti Liya aatodiwa, bakampa mbeleko koga Rahele kabe asingawane bana.

³²Liya kazwisenga kawana mwana we tjilisana. Kantumila zina kati Rubheni ngekuti wakati, “Yahwe babona kudziyila kwangu. Nlume wangu utjowondida kwazo.”

³³Kazwisenga kakale kawana mwana we tjilisana ngono kabe eti, “Yahwe bahwa kuti ndoshimiwa ndizo bandipa mbisana iwoyu kakale.” Ngono kantumila kati Simiyoni.

³⁴Kapapha kazwisenga ngono kati ewana mwana we tjilisana kati, “Ngwenu nlume wangu unowobhatana nami ngoti ndanthamila bakololo batatu.” Ndizo kantumila zina kati Levi.

³⁵Kazwisenga kakale kawana mwana we tjilisana ngono kabe eti, “Ngwenu ndowokudza Yahwe.” Ndizo kantumila zina eti Juda. Ipapo kamisa kuwana bana.