Read Kalanga Kutangisa 3 Bible Online

Kutangisa 3 - Kalanga bible

Kutangisa 3

¹Ndizo ngwenu, nyoka yakabe ili jenjedu linopinda phuka dzose dze shango dzakathamiwa ndi Yahwe Ndzimu. Yakabhuzwa nkadzi ikati, “Kumande, Ndzimu wakati musitongoja miti yose imu nnda iwoyu kene?”

²Nkadzi kadabila nyoka eti, “Tingaja zwedu mitjelo ye miti imu nnda,

³koga Ndzimu wakati, ‘Musitongoja ntjelo we nti u pakati kwe nnda, kene kuli kuubhata musiubhate ngoti mungafa.’ ”

⁴Koga nyoka ikati ku nkadzi, “Nge malebeswa dumbu, amungafe

⁵ngoti Ndzimu unoziba kuti mu zhuba ilelo la mungauja, mesho enyu anowozhulika mukanga Ndzimu, mukaziba bubuya ne mbipo.”

⁶Nkadzi kati ebona kuti nti iwoyo wakanakila kujiwa, kakale uli mbuya ngolingwa, ntome upa nthu butjenjedu, katjela ntjelo kauja. Mmwe ntjelo kaupa nlume uwe ngono kajabo.

⁷Ipapo mesho abo bose kazhuka, ngono bakaziba kuti bambujo, ndizo bakabe bethumanya mazhani e mpaya bezwithamigwa zwitembgwe.

⁸Kwakati mu madekwana kotothola, bakahwa nsindo wa Yahwe Ndzimu beyenda mu nnda, ngono nlume ne nkadzi uwe bakabgwatila Yahwe Ndzimu pakati kwe miti ye nnda.

⁹Koga Yahwe Ndzimu bakadana nlume bakati, “Ungayi?”

¹⁰Kadabila eti, “Ndahwa nsindo wenyu mu nnda, ngono atja ngoti ndili mbujo, ndizo abe ndibgwata.”

¹¹Ndzimu ukabe umbhuzwa uti, “Ndiani wakubudza kuti umbujo? Waja ntjelo wandakakudwa ati usiuje kene?”

¹²Nlume kabe eti, “Nkadzi wamakandipa kuti agale nami, wandipa ntjelo we nti iwoyo ngono auja.”

¹³Yahwe Ndzimu bakabhuzwa nkadzi bakati, “Ini ikoku kwawathama kene?” Nkadzi kashandula eti, “Nyoka yandifulila, ngono aja.”

¹⁴Ndizo Yahwe Ndzimu bakadwa nyoka bakati, “Se wathama ikoku, wabe ne bhiso kupinda zwithuwo zose, ne phuka dzose dze shango. Unowoyenda usoba pasi nge ntumbu, unowotjila uja hwuluba mazhuba wose e bupenyu gugo.”

¹⁵“Ndowolonga lubengo pakati kuko ne nkadzi, na pakati kwe ludzi gugo ne ludzi gugwe. Ludzi gugwe gowopkhwanya nsholo uwo, iwe unowokaadza itshitshino tjitje.”

¹⁶Ndzimu ukadwa nkadzi ukati, “Ndowowatsha zwibhayo mu kuwana mbeleko kuko. Nge zwibhayo unowowana bana, nenguba kwakajalo njemulo dzidzo dzowobe mu nlume uwo, ngono iye unowokulaula.”

¹⁷Kuna Adamu Ndzimu ukabe uti, “Iwe ngoti wahwilila nkadzi uwo ukaja ntjelo we nti wandakati usiuje, pasi pabe ne bhiso nge kuko, unowotjilila mu mang'oni e kushinga kuti uwane zojiwa butjilo gugo gose.

¹⁸Pasi panowokumelela mihwa ne mitinyana inobhaya, nawe unowoja milibo ye shango.

¹⁹Unowoja zojiwa nge dukuta le phazha iyo kudzina ubgwilila mu mavu ngoti wakatogwa mu ali, u hwuluba ngono unowobgwilila mu hwuluba.”

²⁰Adamu katumila nkadzi uwe kati Efa, ngoti wakabe ewobe mme be bathu bose.

²¹Yahwe Ndzimu bakathamila Adamu ne nkadzi uwe zwiambalo zwe makukuta bakabaambadza.

²²Ipapo Yahwe Ndzimu bakabe beti, “Nthu ngwenu wofanana koga ne mmwe wedu, unoziba bubuya ne mbipo, ungadwa etambunudza luboko gugwe etjela ntjelo we nti we butjilo eja, edwa etjilila tjose.”

²³Ndizo Yahwe Ndzimu bakabe bentata mu nnda we Edeni kunolima mavu aakatogwa mu ali.

²⁴Ndzimu ukatatila nthu kuzhe, ngono ukabiga dzikherubhu* dzawo ku bhezhuba kwe nnda we Edeni ne thumo linothuta linoshandukila mu mbizho dzose kulinda zila inoyenda ku nti we butjilo.