Read Kalanga Kutangisa 30 Bible Online

Kutangisa 30 - Kalanga bible

Kutangisa 30

¹Rahele kati ebona kuti aatowanila Jakubo bana kathamila nkulu uwe fupa. Ngono kadwa Jakubo kati, “Mundipe bana, kuzhe kwa ikoko, ndowofa.”

²Jakubo kagwadzila moyo Rahele kati kunli, “Apa ndimu tjimo tje Ndzimu iwo wakathama kuti usibe ne bana kene?”

³Rahele kabe eti, “Bhiliha nlandakadzi wangu woyu, nginani naye mu ng'umba ndizo andiwanile bana kuti namibo ndibake nsha.”

⁴Ndizo kampa nlandakadzi uwe Bhiliha kube nkadzi. Jakubo kangina naye mu ng'umba

⁵ngono kazwisenga kan'wanila mwana we tjilisana.

⁶Rahele kabe eti, “Ndzimu wandikumbula, wahwa kukumbila kwangu ukandipa mwana we tjilisana.” Ngekwa ikoku kampa zina eti Dani.

⁷Nlandakadzi wa Rahele Bhiliha katola ntumbu kakale ngono kawanila Jakubo mwana we tjilisana.

⁸Ipapo Rahele kati, “Ndagwisana kwazo ne nkulu wangu ngono ndakunda.” Ndizo kampa zina kati Nafutali.

⁹Kukati Liya ebona kuti aatjawana bana katola nlandakadzi uwe Zilipa kampa Jakubo kube nkadzi.

¹⁰Zilipa nlanda wa Liya kawanila Jakubo mwana we tjilisana.

¹¹Ipapo Liya kati, “Ndina phazha seni!” Ndizo kantumila kati Gadi.

¹²Zilipa nlanda wa Liya kawanila Jakubo mwana we tjilisana we bubili.

¹³Ngono Liya kati, “Ndashatha seni! Bakadzi banowondidana kushatha.” Ndizo kantumila eti Asheri.

¹⁴Kukati mu nsi we kuvungwa koroni, Rubheni kabhuda kayenda mu shango ngono kawana malolo kabuya nawo kuna mmeyabe Liya. Rahele kati kuna Liya, “Ndokumbila kuti undipebo mamwe e malolo e mwana uwo.”

¹⁵Liya kadabila eti, “Kanti auzogutshika nge kunditolela nlume wangu? Ngono ngwenu woshokotola ne malolo e mwanangu kene?” Rahele kabe eti, “Kwakalulwama ungalala nawe busiku igogu kumisa malolo e mwana uwo.”

¹⁶Ndizo kukati Jakubo ebuya madekwana edwa ku shango, Liya kabhuda kunonshanganidza. Ngono kandwa kati, “Nasi monolala kundili ngoti ndamutapa nge malolo e mwanangu.” Ndizo kanolala naye busiku igogo.

¹⁷Ndzimu ukahwa Liya kazwisenga kawanila Jakubo mwana we tjilisana we bushanu.

¹⁸Liya kabe eti, “Ndzimu wandipa mbhayilo ngoti ndapa nlume wangu nlandakadzi wangu.” Ndizo kantumila eti Isakari.

¹⁹Liya kazwisenga kakale kawanila Jakubo mwana we tjilisana we butathatu.

²⁰Ngono kabe eti, “Ndzimu wandipa tjipo tjakanaka. Tjibaka tjino nlume wangu unowonditeta ngekuti ndan'wanila bakololo bali tathatu.” Ndizo kantumila kati Zebuluni.

²¹Shule kwe tjibaka kawana mwana we tjianadana kantumila kati Dina.

²²Ndzimu ukakumbula Rahele ukan'dabila ukanthama kuti abe ne mbeleko awane bana.

²³Kazwisenga ngono kawana mwana we tjilisana ndizo kabe eti, “Ndzimu wandidusa shoni.”

²⁴Kantumila zina kati Josefa ngono kabe eti, “Yahwe ngabandipaphidzile nge mmwe mmbisana.”

²⁵Kwakati Rahele asinotshibama Josefa, Jakubo kadwa Labani kati, “Imani nditjiyenda ndibgwilile kanyi kwedu ku shango ya kanyi kwedu.

²⁶Tjindipani bakadzi bangu ne bana bangu bandakashingila ndizo ndiyende. Moziba kuti ndakamushingila ku ngapani.”

²⁷Koga Labani iye kati kunli, “Ndokumbila kuti ha kuamutjilika gala usiyende. Ndakabona kuti Yahwe bakandikombolela nge kuko.

²⁸Leba mbhailo waunoshaka ndowokupa iwo.”

²⁹Jakubo kabe endwa eti, “Moziba kuti ndakamushingila tjini ne kuti zwithuwo zwenyu moziba kuti ndakazwitjengeta zubuyanana kungapani.

³⁰Ndakati ndiswika pano makabe muna zwithuwo zwishomanana, koga ngwenu zwawanda kwazo. Yahwe bakamukombolela pamwe ne pamwe pandakabepo. Ngono ngwenu imi nsha wangu ndowoushingila lini?”

³¹Labani kabhuzwa kati, “Ndikupeni?” Jakubo kadabila eti, “Musindipe tjimwe. Ha mungadumana ne tjandinokumbila ndingadwilila ndilisa zwithuwo zwenyu.

³²Imani ndipalame pkhwizi ne mbudzi dzenyu dzose nasi nditheule pkhwizana imwe ne imwe ina manjanja ne ina mibala ne thema ne mbudzi imwe ne imwe ina manjanja ne mibala. Ndidzo dzinowobe mbhailo wangu.

³³Kugalikabgwe kwangu ndiko kunowondimila tjibaka tjimwe ne tjimwe muzha kuwobona mbhailo wangu. Mbudzi imwe ne imwe yandinowobe ndi nayo isina mabala kene manjanja, kene pkhwizi imwe ne imwe isi thema kowotogwa kuti ndaikwiba.”

³⁴Labani kadabila eti, “Kwakalulwama. Ngakube sekwa waleba.”

³⁵Mu zhuba ilelo Labani katheula mbudzi ndume dzose dzakabe dzina mizila kene mibala ne hadzi dzose dzakabe dzina manjanja ne mibala ne pkhwizana thema dzose kadzipa bana babe kuti badzitjengete.

³⁶Ipapo kazwithubukanya na Jakubo thambo inolizana gwendo gwe mazhuba matatu. Jakubo kasala elisa zwithuwo zwa Labani zwakasala.

³⁷Jakubo katola thabi nyolo dze mpopula ne dze alimondi ne mpulane kadzithama mizila mitjena nge kudzisubula makwati etjuluka mamwe esubula etjuluka kusala kuna mizila mitema ne mizila mitjena.

³⁸Kabe ebiga thabi idzedzo dzakasubugwa pa migoro inong'wisigwa zwithuwo vula kuti ilingisane ne zwithuwo ha zwizha kung'wa.

³⁹Ndizo zwithuwo zwikakwiigwa zwili mbeli kwe thabi idzedzi ngono zwikazwala bana bana mizila ne manjanja ne zwibadzi.

⁴⁰Jakubo katheula pkhwizana ngono kathama kuti zwithuwo zwasala zwilingisane ne zwithuwo zwa Labani zwina mizila ne zwitema. Ndizo kathubukanya zwithuwo zwizwe ne zwa Labani.

⁴¹Kwakabe kuti zwithuwo zwakasima zwikwiigwa, Jakubo ebiga thabi pa migoro mbeli kwe zwithuwo kuti zwikwiigwe pejo ne thabi.

⁴²Koga kwakabe kuti akukwiigwa zwithuwo zwisakasima asingabige thabi pazwili. Ndizo zwithuwo zwisakasima zwikabe zwa Labani zwakasima zwikabe zwa Jakubo.

⁴³Nge zila yakajali, Jakubo kafuma kabe ne zwithuwo zwinjinji ne balandakadzi ne balandalume ne kamela ne madonki.