Read Kalanga Kutangisa 31 Bible Online

Kutangisa 31 - Kalanga bible

Kutangisa 31

¹Jakubo kahwa kuti bakololo ba Labani bakabe beti, “Jakubo wakatola tjimwe ne tjimwe tjakabe tjili tja tate bedu. Fumwa yose yaanayo wakaiwana muna zwakabe zwili zwa tate bedu.”

²Ngono Jakubo kabonabo kuti Labani wakabe asingatjanshathile se kutanga.

³Ipapo Yahwe bakati kuna Jakubo, “Bgwilila ku shango ya botate babo ne ku makamu awo, ngono imi ndowobe nawe.”

⁴Ndizo Jakubo katuma nthu kanodana Rahele na Liya kuti bazhe ku shango kwaakabe efudza zwithuwo zwizwe.

⁵Kabadwa kati, “Ndobona kuti tate benyu abatjina hwanano yabagala banayo nami, koga Ndzimu wa tate bangu unami.

⁶Moziba kuti ndakashingila tate benyu nge masimba angu wose,

⁷koga tate benyu bakanditjebela. Bakashandula mbhayilo wangu kanjinji. Koga Ndzimu auzobaletja bakandithamila tjakabipa.

⁸Bakabe beti ha beti, ‘Zwithuwo zwazwagwa zwina mibala ndizo mbhayilo uwo,’ zwithuwo zose zowobe zwizwala bana bana mibala, kene beti, ‘Zwina mizila ndizo mbhayilo uwo,’ zwithuwo zose zowobe zwizwala bana bana mizila.

⁹Ndizo wali Ndzimu wakatola zwithuwo zwa tate benyu ukandipa izo.

¹⁰“Mu nsi we zwithuwo zwikwiigwa ndakawolota ndibona phoko dzina mizila ne dzina manjanja ne zwibadzi dzikwiila hadzi.

¹¹Ntumwa we kudzimu we Ndzimu ukandidana mu hwope ukati, ‘Jakubo’ Adabila nditi, ‘Ndipano.’

¹²Ngono ukabe uti, ‘Linga ubone kuti phoko dzinokwiila hadzi dzina mizila ne manjanja ne zwibadzi ngoti ndabona kose Labani kwaakakuthamila.

¹³Ndimi Ndzimu we Bhetele kwawakazhodza bgwe mafuta ukabuya ukatuna kundili. Ndizo ngwenu wali tjibhuda mu shango iyeyi uyende ku shango ya kanyi kwenyu.’ ”

¹⁴Ipapo Rahele na Liya bakashandula beti, “Apa titjina gobe kene thaka mu thundu ya tate bedu kene?

¹⁵Apa abatotitola se bataya kene? Bakatitengesa bakabuya bakashingisa mari wose akatilobola.

¹⁶Fumwa yose iyeyi Ndzimu yawakatolela tate bedu ndiyo yedu ne bana bedu. Ndizo iwe shinga tjawabudziwa nge Ndzimu.”

¹⁷Ipapo Jakubo katathisa bana babe ne bakadzi babe kamela

¹⁸katakula zwithuwo zwizwe zose kasenga thundu yose yaakashaba mu Padani Aramu kuyenda kuna tate babe Isaki ku shango ye Kanana.

¹⁹Labani wakati ayenda kunokera pkhwizi dzidze Rahele kasala ekwiba midzimu ya tate babe.

²⁰Jakubo wakatjebela Labani we N'aramu nge kusambudza kuti iye woyenda.

²¹Katizha kayenda na kose kwaakabe anako katjuluka gwizi gwe Yufuratesi akalinga ku shango ye matuthu ye Giliyadi.

²²Kwakati kwapinda mazhuba matatu Labani kabudziwa kuti Jakubo wakatizha.

²³Labani katola makamu awe kalonda Jakubo ngono kambhata mu shango ye matuthu ye Giliyadi shule kwe mazhuba ali kutendeka.

²⁴Kukati busiku Ndzimu ukazha kuna Labani we N'aramu mu hwope ukandwa ukati, “Usitongoleba tjimwe tjakabipa kene tjakanaka kuna Jakubo.”

²⁵Labani wakabhata Jakubo mu shango ye matuthu ye Giliyadi kwaakabe akotokela ngono na iye kakotokelabo ko.

²⁶Labani kadwa Jakubo kati, “Ini ikoku kwawathama unditjebela usenga bakololokadzi bangu ubathama se bakadzi batapiwa nge thumo?

²⁷Ini wakanyeluka utizha unditjebela. Ini usakandibudza kuitila kuti ndikupeleke nge kushatha timba njimbo nge zwilidzo?

²⁸Ini usandipa tjibaka kuputa bana be bana bangu ne bakololokadzi bangu ndiwonekana nabo? Tjawathama bulengwe koga.

²⁹Ndina simba le kukuhwisazogwadza koga busiku gwapinda Ndzimu wa tate babo wati kundili, ‘Yela njele kuti usitongoti tjimwe tjakabipa kuna Jakubo.’

³⁰Watizha ngoti wakashuba kubgwilila kanyi kwa tate babo, koga wakwibilani midzimu yangu?”

³¹Jakubo kashandula Labani eti, “Ndakabe nditja kuti mowodwa mutola bakololokadzi benyu nge simba.

³²Koga ha mungawana mmwe ipapa una midzimu yenyu ngaabulawe. Shakani mu mesho e makamu edu pano mubone kene mowana tjimwe tjingabe tjili tjenyu, amatjiwana mutjitole.” Jakubo wakabe asingazibe kuti Rahele wakabe akwiba midzimu.

³³Ndizo Labani kangina mu nshasha wa Jakubo ne muna wa Liya ne mu mishasha ye balandakadzi babili koga kasiwane tjimwe. Kati ebhuda mu nshasha wa Liya kangina muna wa Rahele.

³⁴Rahele wakabe atola midzimu iyeyo kailonga mu hwomo ye sale dze kamela kabe egala pezhugwi kwayo. Labani kashaka nshasha wose ngono kasiwane tjimwe.

³⁵Rahele kadwa tate babe kati, “Musitongo ndigwadzila moyo tate, ngoti musati muswika pandili amilika, ndimu mwedzi.” Labani kashaka ngono kasiwane midzimu iye.

³⁶Ndizo Jakubo kagwadza moyo ngono kakayikanya Labani. Kabhuzwa Labani eti, “Nlandu wangu ini? Tjibiibi tjandakashinga ndi tjipi tjayita kuti munditobele?

³⁷Ngono se mashaka mukashakisisa mu thundu yangu yose, mawanani tjenyu? Mu tjibige ipapa mbeli kwe makamu enyu ne angu kuti batisumikilise.

³⁸Ndakagala namwi makole wose iyawa ali makumi mabili. Pkhwizi hadzi ne mbudzi dzenyu hadzi adzizotongo sodza kakale akuna tjandakatongo bhaya ndija mu zwithuwo zwenyu.

³⁹Zwithuwo zwenyu zwakabulawa nge zwibandana andizotongo zwizhisa kumuli, ndakazwimisa nge zwangu. Zwakakwibiwa masikati kene busiku, makazwishaka mu ndili.

⁴⁰Tjimo tjangu tjakabe tjili etji, masikati ndakabe nditshwa ne zhuba, busiku ndipota, ndisingabone hwope.

⁴¹Kwakabe kwakajalo koga makole wose ali makumi mabili ndigala namwi. Ndakamushingila makole ali gumi lina makole ali manna ndishingila bakololokadzi benyu babili ashinga makole ali tathatu ndakatjengeta zwithuwo zwenyu ngono mukashandula mbhayilo wangu kanjinji.

⁴²Ha Ndzimu wa tate bangu, Ndzimu wa Abhurahama iwo unothigamigwa ndi Isaki usakabe nami, nge malebeswa mungabe makanditata ndisina tjandakabhata. Koga Ndzimu wakabona kudziyila kwangu ne kushinga kwangu kunolema ngono busiku gwapinda wakamutjemela.”

⁴³Labani kashandula Jakubo eti, “Bakololokadzi ibaba nge bangu ne bana ibaba nge bangu ne zwithuwo nge zwangu. Kose kwaunobona nge kwangu. Koga ini tjandingathama ngwenu ngekwe bakololokadzi bangu kene ngekwe bana babakazwala?

⁴⁴Ngatithame tjidumano pakati kwangu nawe tjibe tjitendeki pakati kwedu.”

⁴⁵Ndizo Jakubo katola bgwe kalimisa kube ikumbuludzo.

⁴⁶Jakubo kadwa makamu awe kati, “Kubunganyani mabgwe.” Bakakubunganya mmbumba we mabgwe bakagala kubapa nawo bakaja.

⁴⁷Labani kaudana eti Jega Sahaduta, Jakubo iye kaudana Galeedi.

⁴⁸Labani kabe eti, “Mmbumba iwoyu tjitendeki pakati kuko nami nasi.” Ndizo wali wakadang'wa kuyi Galeedi.

⁴⁹Limwe zina le bgwe ilelo lakabe liyi Mizipha ngoti Labani wakati, “Yahwe ngabatibige zhisho ha tapalalana mmwe ali kwaaliko ne mmwe kwaaliko.

⁵⁰Ha ungadziyidza bakololokadzi bangu kene ukalobola bakadzi bamwe nenguba kusina unaswi, kumbula kuti Ndzimu ntendeki pakati kuko nami.”

⁵¹Labani kati kakale kuna Jakubo, “Mmbumba we mabgwe hwoyu ne bgwe yeli landamisa pakati kuko nami.

⁵²Mmbumba iwoyu we mabgwe tjilakidzo ne bgwe ileli tjilakidzo tjekuti andingapinde mmbumba iwoyu ndipindila ku lubizho gugo kukuthama tjakabipa, nawe aungapinde mmbumba iwoyu upindila ku lubizho gwangu kundithama tjakabipa.

⁵³Ndzimu wa Abhurahama ne Ndzimu wa Nahori, Ndzimu wa tate babo ngaube ntendeki pakati kwedu.” Ndizo Jakubo katuna ne Ndzimu unothigamigwa ndi Isaki tate babe.

⁵⁴Jakubo kabhaya tjibhayilo mu shango ye matuthu ngono kakoka makamu awe ku zojiwa. Bakati basinoja bakapitsha busiku ipapo.

⁵⁵Tjimuka mangwanana Labani kaputa bana be bana babe ne bakololokadzi babe kabakombolela. Ngono kamilika kabgwilila kanyi.