Read Kalanga Kutangisa 32 Bible Online

Kutangisa 32 - Kalanga bible

Kutangisa 32

¹Jakubo katola gwendo gugwe ngono batumwa be kudzimu bakashangana naye.

²Jakubo kati ebabona kati, “Eli i bunga le Ndzimu.” Ndizo kadana bugalo igogo kati Mahanayimi.[6]

³Jakubo katuma batumwa kuyenda mbeli ku nkulu uwe Esau ku Seiri shango ye Edomu.

⁴Kabadwa kati, “Tjamunowobudza Esau tetshi wangu ndi etji, ‘Nlanda wenyu Jakubo kati, “Ndakagala na Labani kuswikila ngwenu.

⁵Ndina ng'ombe ne madonki ne pkhwizi ne mbudzi ne balandalume ne balandakadzi. Ndizo ndozhisa ndayidzo iyeyi kumuli tetshi wangu kuti ndiamutjilike.” ’ ”

⁶Balanda bakati babuya kuna Jakubo bakabika beti, “Takanoswika ku nkulu uwo Esau. Umu zila ne balume bali mazana ali manna (400) kuwokushanganidza.”

⁷Ipapo Jakubo kazhigwa ngotja kadziyidzika mu moyo kwazo. Kathubukanya bathu baakabe anabo bakabe makoko mabili. Pkhwizi ne mbudzi ne ng'ombe ne kamela kazwithubukanyabo kube makoko mabili.

⁸Wakabe akumbula eti, “Ha Esau angazha kanginilila goko limwe, limwe lingatubula kutizha.”

⁹Ipapo Jakubo katembezela eti, “Ndzimu wa tate bangu Abhurahama, Ndzimu wa tate bangu Isaki, imwi Yahwe makati kundili, ‘Bgwilila ku shango ya kanyi kwenyu ku makamu awo, ndowothama kuti zwithu zwikuyendile zwakanaka.’

¹⁰Imi andizolizana ludo gwenyu gusingazunguzike ne kugalikabgwe kwenyu kwamakalakidza nlanda wenyu. Ndakatjuluka Jorodani ndakabhata ludozo gwangu koga, ngono ngwenu ndabe makoko mabili.

¹¹Mundibhule mu luboko gwe nkulu wangu Esau ngoti ndotja kuti unowozha katibulaya tose na bomayi ne bana.

¹²Kundili makati, ‘Ndowothama zwithu kuti zwikuyendile zubuyanana athama kuti ludzi gugo guwande se nsetje we gungwa usingake ukabalika.’ ”

¹³Jakubo kalala ipapo busiku igogo ngono muna tjaakabe anatjo kadusila nkulu uwe Esau tjipo,

¹⁴kadusa mbudzi hadzi dzili mazana mabili (200) ne mbudzi ndume dzili makumi mabili, pkhwizi hadzi dzili mazana mabili (200) ne ndume dzili makumi mabili,

¹⁵kadusa kamela dzili makumi matatu (30) ne bana badzo ne ng'ombe hadzi dzili makumi manna (40) ne ndume dzili gumi, kadusa donki hadzi dzili makumi mabili (20) ne donki ndume dzili gumi.

¹⁶Jakubo kazwipa balanda babe kuzwitjengeta, goko limwe ne limwe nge kwalo, ebe eti ku balanda, “Yendilani mbeli kwangu muzhule thambo pakati kwe goko limwe ne limwe le zwithuwo.”

¹⁷Kalaya nlanda umbeli kati, “Kuti nkulu wangu Esau eshangana nawe ekubhuzwa eti, ‘Tetshi uwo ndiani? Unoyenda ngayi? Zwithuwo zwawakatakula nge zwaani?’

¹⁸Iwe udabile uti, ‘Ngezwa Jakubo nlanda wenyu. Tjipo tjapiwa tetshi wangu Esau, iye Jakubo waswika shule kwedu.’ ”

¹⁹Jakubo kalaya goko le bubili ne le butatu ne mamwe wose akabe akatakula zwithuwo kati, “Namwibo mulebe saikoku kuna Esau pamunoshangana naye.

²⁰Mun'dwe muti, ‘Nlanda wenyu Jakubo waswika shule kwedu.’ ” Jakubo wakabe ekumbula eti, “Ndowonshathisa nge zwipo izwezwi zwandinotumila mbeli, kowoti shule tishangana pamwe kandiamutjila.”

²¹Ndiko zwipo zwa Jakubo zwikatungamila koga iye kalala mu maswikilo.

²²Mu busiku igogo Jakubo katola bakadzi babe babili ne balandakadzi babe babili ne bakololo babe bagumi lina nng'ompela ngono katjuluka lukoba gwe Jabhoki.

²³Wakati asinobatjuludza lukoba, katjuludza ne thundu iye yose.

²⁴Jakubo kasala ega. Mmwe nlume kadzulana naye kuswikila ku bhezhuba kutema.

²⁵Nlume iwoyo kati ebona kuti aangakulile Jakubo kakutha sonyo ya Jakubo ndizo Jakubo kasonyoka ipapo bedzulana.

²⁶Nlume iwoyo kati, “Undiletje ndiyende, ku bhezhuba kwatema.” Jakubo kashandula eti, “Andingakuletje kuzhe kwe wandikombolela.”

²⁷Nlume iwoyo kambhuzwa kati, “Zina lilo ndiani?” Kadabila eti, “Zina langu ndi Jakubo.”

²⁸Nlume iwoyo kabe eti, “Zina lilo alitowobe litjayi Jakubo, koga lowoyi Iziraela ngoti wagwisana ne Ndzimu nenge bathu ngono ukakunda.”

²⁹Jakubo kambhuzwa kati, “Ndokumbila mundibudze zina lenyu.” Koga ouje kadabila eti, “Unobhuzwilani zina langu?” Ipapo kabe enkombolela.

³⁰Ndizo Jakubo kadana bugalo igogo kati Penieli eti, “Ndabona Ndzimu ndakalingana nawo koga nditji mpenyu.”

³¹Zhuba lakabhuda edwa mu Penieli[7]. Wakabe eshudza ngekwe sonyo iye.

³²Nanasi kuno, Baiziraela abatoja lutshinga gumu malunganilo e bi ngoti sonyo ya Jakubo yakakuthiwa paali.