Read Kalanga Kutangisa 33 Bible Online

Kutangisa 33 - Kalanga bible

Kutangisa 33

¹Jakubo kamilidza mesho kabona Esau aswika ana balume bali mazana manna (400). Ndizo kathubukanya bana, bamwe kabapa Liya, bamwe Rahele, bamwe kabapa balandakadzi babe babili.

²Katungamidza balandakadzi ne bana babo, betobegwa ndi Liya ne bana babe, kukozha Rahele na Josefa shule.

³Jakubo iye nge kukwe kabatungamila ngono kathigama katendeka enshanganidza nkulu uwe.

⁴Koga Esau kalabuka kunonshanganidza, kangumbatila kamputa. Bubili gwabo bakalila.

⁵Kukati Esau emilidza mesho kabona bakadzi ne bana. Ngono kabhuzwa kati, “Ibaba ndi boani banawe?” Jakubo kadabila eti, “Bana bangu imi nlanda wenyu, Ndzimu wakandipa ibo nge ngoni dzawo.”

⁶Balandakadzi ne bana babo bakathigama.

⁷Kukatobela Liya ne bana babe bakathigamabo. Ku bupelo kukazha Josefa na Rahele ngono na ibobo bakathigama.

⁸Esau kabhuzwa eti, “Matanga wose iyawa andashangana nawo akatakugwa unodwani ndiwo?” Jakubo kadabila eti, “Kuti ndiamutjilike she wangu.”

⁹Koga Esau kati, “Zwangu zwandinazo zwinjinji zwakandilizana nnung'una wangu, zwaunadzo nge zwizo.”

¹⁰Jakubo kabe eti, “Aa, ndomukumbila amandihwila ngoni amutjilani tjipo tjangu. Ha ndabona buso gwenyu konga ndabona buso gwe Ndzimu ngoti mandiamutjila nge ludo.

¹¹Ndokumbila muamutjile zwipo zwandamuzhila. Ndzimu wakandida ukandipa kose kwandinosheta.” Jakubo kantetedzela kuswikila eamutjila.

¹²Ipapo Esau kati, “Ngatitole gwendo gwedu. Ndowokutungamila.”

¹³Jakubo kashandula eti, “She wangu moziba kuti bana abathu bakasima ne kuti ndakafanila tjengeta pkhwizi ne ng'ombe dzitjamwisa bana badzo. Ha dzingatakugwa dzitatiwa zhuba ling'ompela, zose zwithuwo zwingafa.

¹⁴Ndizo mungayenda zwenyu muli mbeli, imi ndowotobela ndakabiga moyo ndilaugwa ngoyenda kwe zwithuwo zwandinotakula nenge kuyenda kwe bana kuswikila ndiswika kuna she wangu ku Seiri.”

¹⁵Esau kabe eti, “Ngono ima ndisiye bamwe bathu bangu nawe.” Koga Jakubo kati, “Mowobe mukuthamilani ikoku wali? Ngandiamutjilike koga muna she wangu.”

¹⁶Ndizo mu zhuba ilelo Esau katangisa gwendo gugwe ebgwilila ku Seiri.

¹⁷Koga Jakubo kayenda ku Sukoti kwaakabaka nzi uwe ne matanga e ng'ombe dzidze. Ndizo wali bugalo igogo gudang'wa kuyi Sukoti.

¹⁸Jakubo wakaswika zubuyanana pejo ne nzi we Shekemu mu shango ye Kanana paakabaka mishasha iye edwa ku Padani Aramu.

¹⁹Kadusa maloso e siliva ali zana katenga ntuthu mu bakololo ba Hamori tate ba Shekemu ngono kabiga nshasha uwe ipapo.

²⁰Kabaka tjibeso tjinopisigwa zwibhayilo ipapo katjidana zina eti Eli Elohe Iziraela.