Read Kalanga Kutangisa 34 Bible Online

Kutangisa 34 - Kalanga bible

Kutangisa 34

¹Dina nkololokadzi wa Liya na Jakubo kabhuda limwe zhuba kunokumba bakadzi be shango iyeyo.

²Kukati Shekemu nkololo wa Hamori we Nhivi ntungamili we ntuthu iwoyo embona kantola kandzula.

³Kada Dina nkololokadzi wa Jakubo nge moyo uwe wose ngono kalebeleka naye nge ludo.

⁴Ngono Shekemu kadwa tate babe Hamori kati, “Mundilobolele mwanadi iwoyu abe nkadzi wangu.”

⁵Jakubo kahwa kuti nkololokadzi uwe Dina walengudziwa ngo kudzugwa ngono kanyalalazwe kuswikila bakololo babe bebuya bedwa ku shango kulisa zwithuwo.

⁶Ipapo Hamori tate ba Shekemu bakayenda kunolebeleka na Jakubo.

⁷Bakololo ba Jakubo bakaswika bedwa ku shango basinohwa tjashingikala bakagwadzika ngono bakagwadza moyo kwazo ngoti Shekemu athama mbipo inoshemisa mu Iziraela ngodzula nkololokadzi wa Jakubo, tjithu tjisakafanila kuikhwa.

⁸Koga Hamori kalebeleka nabo kati, “Mwanangu Shekemu unoda mwana wenyu, ndizo ndokumbila kuti mundumile anlobole.

⁹Ngati lobolaneni, mutipe bana benyu tibalobole namwibo mulobole bedu.

¹⁰Mungagala zwenyu naswi. Shango yakamuzhukila galani muili mushabe muwane fumwa.”

¹¹Shekemu kalebeleka na tate ba Dina ne hazwadzi dzidze kati, “Ha mungandiamutjila ndowodusa kose kwamunoshaka.

¹²Danani mangaba andakafanila dusa sekwa munoda ngono ndowodusa tjamandidanila. Tjikulu mundipe mwanadi abe nkadzi wangu.”

¹³Bakololo ba Jakubo bakashandula Shekemu na tate babe Hamori nge bupitipiti ngoti hazwadzi yabo Dina wakabe alengudziwa.

¹⁴Bakati kunli, “Atingakushinge ikoku kwakajali, atingape hazwadzi yedu nthu usakathumbigwa. Ikoku kowobe kutilengudza.

¹⁵Tingadumana nako koga ha mathama saswi mukathumbila balume bose mu muli.

¹⁶Ndiko kwatingalobolelana naswibo tikagala pakati kwenyu tikabe bathu bang'ompela namwi.

¹⁷Koga amusingadumane nako mukathumbigwa towotola hazwadzi yedu tibe tiyenda.”

¹⁸Nkumbulo iwoyu ukashathisa Hamori ne nkololo uwe Shekemu.

¹⁹Nzhuzha iwoyo aazononoka kuthama tjalebgwa ngoti wakabe eda nkololokadzi wa Jakubo. Shekemu wakabe ekudziwa kupinda bose mu nsha wa tate babe.

²⁰Ndizo Hamori ne nkololo uwe Shekemu bakayenda ku lubazhe pa nkoba we nzi wabo kunolebeleka ne balume be nzi iwoyo.

²¹Ngono bakati ku balume ibabo, “Bathu ibaba bana buthu naswi. Ngatibaletjeni bagale mu shango yedu bashabe muili, shango yakabazhukila. Tingalobolelana nabo.

²²Koga bangaduma kugala naswi tikabe bathu bang'ompela ha bose bedu be tjilume bangathumbigwa se babo.

²³Apa zwithuwo zwabo ne thundu yabo yose aitowobe yedu kene? Ndizo ngatidumaneni nabo ngono banowogala pakati kwedu.”

²⁴Balume bose bakabhudila kuzhe kwe nzi ku lubazhe bakadumana na Hamori ne nkololo uwe Shekemu ndizo mmwe ne mmwe we tjilume mu nzi iwoyo kathumbigwa.

²⁵Kwakati shule kwe mazhuba matatu balume ibabo bose batji mu zogwadza bakololo babili ba Jakubo, Simiyoni na Levi hazwadzi dza Dina bakatola mathumo abo ngono bakanginilila nzi pakafagwa bakabulaya balume bose.

²⁶Bakabulaya Hamori na Shekemu nkololo uwe nge thumo ndizo bakatola Dina mu ng'umba ya Shekemu bakayenda.

²⁷Bakololo ba Jakubo bakatapa thundu mu nzi iwoyo kwakabe kwalengudziwa hazwadzi yabo.

²⁸Bakatapa pkhwizi dzabo ne ng'ombe ne madonki ne tjimwe ne tjimwe tjabo mu nzi na kuzhe mu shango.

²⁹Bakatuta fumwa yabo yose ne bakadzi babo bose ne bana ne tjimwe ne tjimwe mu ng'umba.

³⁰Ipapo Jakubo kadwa Simiyoni na Levi kati, “Mandilonga mu mbatsha ngekwe Bakanana ne Baperizi ne bathu bose banogala mu shango iyeyi. Iswi ti bashomanana ngono ha bangathama nshanganyila we ngwa bebe betinginilila, imi ne nsha wangu towolobesiwa.”

³¹Simiyoni na Levi bakashandula beti, “Apa tabe tingaletja hazwadzi yedu ibhakhwa se fukula kene?”