Read Kalanga Kutangisa 35 Bible Online

Kutangisa 35 - Kalanga bible

Kutangisa 35

¹Ipapo Ndzimu ukati kuna Jakubo, “Milika uyende ku Bhetele unogalako ngono ubakile Ndzimu iwoyu wakaboneka ku kuli pawakabe utizha nkulu uwo Esau.”

²Ndizo Jakubo kadwa be nsha uwe na bose bakabe banaye kati, “Lashani midzimu yamunayo isi iyo, mu zwitjenapadze muambale zwiambalo zwipoga.

³Tofuluka ipapa toyenda ku Bhetele kwandinowobakila Ndzimu wakandihwa ukandidabila ndili mu manikano tjibeso tjinopisigwa zwibhayilo. Wakabe nami kumwe ne kumwe kwandakayenda.”

⁴Ndizo bakapa Jakubo midzimu yose isi iyo ne mang'ina ngono Jakubo kazwitshila kusi kwe nti nkulu we pakayengemala wa More mu Shekemu ngono bakatola gwendo.

⁵Bakati beyenda lutjo gwe Ndzimu gukawila mizi yose kubapoteleka ndizo kukasheta wa londa bakololo ba Jakubo.

⁶Jakubo ne bathu bose baakabe anabo bakaswika ku Luzi (kene Bhetele) mu shango ye Kanana.

⁷Kabaka tjibeso tjinopisigwa zwibhayilo ikoko katjidana eti Eli Bhetele ngoti ndipo ipapo Ndzimu pawakazwilakidza kunli paakabe etizha nkulu uwe.

⁸Debora nlandakadzi wa Ribeka wakatjinyikila ipapo ngono kabiganyiwa kusi kwe nti nkulu we pakayengemala ku burwa gwe Bhetele. Ukatumigwa zina kuyi, “Nti we Tjililo.”

⁹Jakubo wakati abuya edwa ku Padani Aramu Ndzimu ukaboneka kunli kakale ngono ukankombolela.

¹⁰Ndzimu ukati kunli, “Zina lilo ndi Jakubo, koga autjowodang'wa Jakubo, zina lilo lowobe Iziraela.” Ndizo ukantumila uti Iziraela.

¹¹Ndzimu ukabe uti kunli, “Ndi Ndzimu Masimbawose, ibe ne mbeleko uwande. Mukuli kowobhuda zwitjaba na bomambo banowobhuda mukuli.

¹²Shango yandakapa Abhurahama na Isaki ndokupabo iyo, ndowobuya aipabo bana babo banozha shule kuko.”

¹³Ndzimu ukathubukana naye pawakalebesana naye ukayenda kudzimu.

¹⁴Jakubo kamisa bgwe pa bugalo gwaakalebesana ne Ndzimu paguli kalidila tjipo tje tjing'o, kalidila ne mafuta.

¹⁵Ndizo Jakubo katumila zina bugalo igogo gwakati Ndzimu ukalebeleka naye kati Bhetele.

¹⁶Bakamilidza gwendo gwabo kudwa mu Bhetele. Bakati batjithambo kuyenda ku Efurati, Rahele katangisiwa nge zwibhayo zwe kutshibama.

¹⁷Ngono wakati etshibama ali mu zwibhayo ehwa zogwadza kwazo, ntshibamisi kandwa kati, “Usitje ngoti unowobe ne mmwe mwana we tjilisana.”

¹⁸Kwakati meya iye yopela woyendila kufa ngoti wakabe efa, katumila mwana uwe kati Bhenoni koga tate babe bakantumila beti Bhenjamini[8].

¹⁹Ndizo Rahele kafa ngono kabiganyiwa pahwunde ne zila inoyenda ku Efurati iyo inodang'wa Bhetelehema.

²⁰Jakubo kamisa bgwe le ikumbuludzo pa ikumbu tja Rahele, kuswikila zhuba lino, bgwe ilelo lolakidza ikumbu tjitje.

²¹Iziraela kadwilidza gwendo gugwe kakale ngono kanobaka nshasha uwe mbeli kwe Migidala Ederi.

²²Kukati Iziraela atjigele mu magalo iyawo Rubheni kangina mu ng'umba na Bhiliha nkadzi ntukunu wa tate babe ngono Iziraela kahwa nge kwako. Bakololo ba Jakubo bakabe bali gumi lina mido mibili.

²³Bakololo ba Liya bakabe bali bo Rubheni, mbano ya Jakubo na Simiyoni na Levi na Juda na Isakari na Zebuluni.

²⁴Bakololo ba Rahele bakabe bali bo Josefa na Bhenjamini.

²⁵Bakololo ba Bhiliha nlandakadzi wa Rahele bakabe bali bo Dani na Nafutali.

²⁶Bakololo ba Zilipa nlandakadzi wa Liya bakabe bali bo Gadi na Asheri. Ibaba ndibo bakabe bali bakololo ba Jakubo baakazwala atji mu Padani Aramu.

²⁷Jakubo kaswika kanyi kuna tate babe Isaki ku Mamure pejo ne Kiriyatiaribha (Heburoni) kwakatongogala Abhurahama na Isaki.

²⁸Isaki wakatjila makole ali zana lina makole ali zhanakadzi (180),

²⁹ngono Isaki kafa akula, akwegula. Bakololo babe Esau na Jakubo bakambiganya.