Read Kalanga Kutangisa 37 Bible Online

Kutangisa 37 - Kalanga bible

Kutangisa 37

¹Jakubo wakagala mu shango yakagagwa ndi tate babe, shango ye Kanana.

²Eyi i ndongoloso ngekwe nsha wa Jakubo. Josefa wakati ali nzhuzha una makole ali gumi lina makole ali kutendeka kabe elisa zwithuwo ne bakulu babe, bakololo ba Bhiliha ne ba Zilipa bakadzi ba tate babe ngono kabatjeta kuna tate babe.

³Iziraela wakabe eda Josefa kupinda bakololo babe bamwe bose, ngoti azwagwa akwegula ngono kanthumila jasi lakanaka lina maboko malefu.

⁴Ngono bakati bebona kuti unonda kubapinda bose bakambenga, bebe basingatjanlebese zubuyanana.

⁵Gumwe busiku Josefa kawolota ngono kati ebudza bakulu babe bakambenga kunyanyisa.

⁶Kabadwa kati, “Hwililani hwope dzangu dzandawolota.

⁷Takabe tisunga zwishwa zwe koroni mu nnda ngono ipapo tjishwa tjangu tjikamuka tjikama, zwenyu zwikama kutjipoteleka zwitjikotamila.”

⁸Bakulu babe bakandwa bakati, “Apa unodwa kuti unowotibusa ukabe mambo wedu iwe kene?” Ngono bakambenga kunyanyisa ngekwe mawoloto awe ne ngekwe tjaakaleba.

⁹Ngono kawolota dzimwe hwope kakale kabudza bakulu babe kati, “Ndawolota kakale ndibona zhuba ne mwedzi ne nyenyedzi dzili gumi lina kung'ompela zwindikotamila.”

¹⁰Koga wakati ebudza tate babe ne bakulu babe, tate babe bakantjemela beti, “I hwope dzakatini idzedzi dzawawolota? Apa mmeyabo nami ne bakulu babo towozha mbeli kuko tikakuthigamila kene?”

¹¹Bakulu babe bakanthamila fupa, koga tate babe bakakulondolodza mu moyo wabo ikoku.

¹²Bakulu ba Josefa bakayenda ku danga kufudza pkhwizi dza tate babo pejo ne Shekemu.

¹³Iziraela kati kuna Josefa, “Bakulu babo bakudanga pejo ne Shekemu. Buya ndikutume ku bali.” Iye kadabila eti, “Kwakalulwama.”

¹⁴Jakubo kabe eti kunli, “Yenda unolekula bakulu babo ne zwithuwo, ubuye undibudze kuti wawana kwakatini?” Ndizo kantuma kudwa ku nkuku we Heburoni. Josefa kati eswika ku Shekemu

¹⁵kapungaila pungaila mu shango ngono kawangwa ne mmwe nlume kanbhuzwa kati, “Unoshakani?”

¹⁶Josefa kashandula eti, “Ndoshaka bakulu bangu. Mungandibudza kwabangabe befudza zwithuwo zwabo kene?”

¹⁷Nlume iwoyo kabe eti, “Bakafuluka imomu. Ndakabahwa beti banoyenda ku Dotani.” Ndizo Josefa kayenda ku Dotani.

¹⁸Bakulu babe bakambona atjithambo, ngono kati asathu kaswika pabali bakalangana kumbulaya.

¹⁹Bakalebesana beti, “N'woloti ihwowuje hwoyoyu waswika.

²⁰Ngatimbulayeni tinlashile mu limwe le matshime iyawa. Towoti wakajiwa nge tjibandana. Ipapo towobona kuti kowoshingikalani nge mawoloto awe.”

²¹Rubheni kati ehwa ikoku kagwisa kunsunungula mu maboko abo. Wakati ku bali, “Ngatisimbulayeni.”

²²“Musitebule malopa. Munlashile mu tshime ileli mu tjilambanyika, musitongo nlonga luboko.” Rubheni wakaleba ikoku kuti ansunungule mu bali ekon'yisa kuna tate babe.

²³Ndizo Josefa wakati eswika pa bakulu babe bakammbula jasi lile lefu lina maboko malefu laakabe akaambala,

²⁴ngono bakantola bakanlashila mu tshime. Tshime ilelo lakabe lisina tjimwe, lakabe lisina vula.

²⁵Bakati batjigele pasi beja bakabona gupo le Baishimaeli lili mu gwendo kudwa ku Giliyadi. Kamela dzabo dzakabe dzakabelesiwa mimotsha ne nyonje. Bakabe bali mu zila beyenda ku Egipiti.

²⁶Juda kabe eti ku bakulu babe ne ku banung'una babe, “Towobuyigwa ngeni ha tibulaya nnung'una wedu tikozwimba lufu gugwe.

²⁷Buyani tintengeseni ku Baishimaeli, tisimbulayeni. Kana iko nnung'una wedu, i nyama ne lopa ledu.” Bakulu ne banung'una babe bakaduma.

²⁸Ndizo kukati baseenyi be Midiyani beswika, bakulu ba Josefa bakankweba bendusa mu tshime bebe bentengesa makumi mabili e shekele dze siliva ku Baishimaeli bakayenda naye ku Egipiti.

²⁹Rubheni kati ebgwilila ku tshime kawana Josefa asipo ngono kabhata zwiambalo zwizwe kazwipalula nge shungu.

³⁰Kabgwilila ku banung'una babe kati ku bali, “Mwana aapo! Ndowolinga ngayi dumbu?”

³¹Ipapo bakabulaya mbudzi bakatola jasi la Josefa bakalidubika mu malopa.

³²Bakatola jasi ilelo bakaliyisa kuna tate babo bakati, “Takanunga jasi ileli. Bonani kene lisi le mwana wenyu.”

³³Jakubo kaliziba ngono kati, “I jasi le mwanangu! Wakajiwa nge tjibandana. Malebeswa Josefa wakamwaugwanyiwa.”

³⁴Ipapo Jakubo kapalula zwiambalo zwizwe, kaambala jila le saka ngono kalilila nkololo uwe mazhuba manjinji.

³⁵Bakololo babe bose ne bakololokadzi babe bose bakazha kunnyaladza, koga kalamba kunyaladziwa kati, “Aa, ndowongina mu ikumbu kuna mwanangu ndilila.” Sa ikoko tate babe bakanlilila.

³⁶Bamidiyani ibo bakatengesa Josefa ku Egipiti kuna Potifa mmwe we hadzasha dza Faro, ali ntungamili we batjengeti babe.