Read Kalanga Kutangisa 38 Bible Online

Kutangisa 38 - Kalanga bible

Kutangisa 38

¹Kukashingikala kuti nge tjibaka itjetjo, Juda kasiya bakulu babe ne banung'una babe kayenda kanogala ne mmwe nlume we ku Adulamu wakabe edang'wa kuyi Hira.

²Ikoko Juda kashangana ne nkololokadzi we mmwe nlume we Nkanana wakabe edang'wa kuyi Shua. Kanlobola kagala naye.

³Nkadzi iwoyo kazwisenga katshibama mwana we tjilisana kantumila zina kati Eri.

⁴Kazwisenga kakale katshibama mwana we tjilisana kantumila zina eti Onani.

⁵Kazwala mmwe mwana we tjilisana kakale kantumila zina eti Shela. Iwoyu wakazwaligwa ku Khezibu.

⁶Juda kalobodza nkololo uwe we mbano Eri nkadzi wakabe edang'wa kuyi Tama.

⁷Koga Eri mbano ya Juda wakabe ali nthu mbiimbi mu mesho a Yahwe ndizo Yahwe bakambulaya.

⁸Juda kadwa Onani kati, “Gala nkadzi we nkulu uwo thaka ndizo uwanile nkulu uwo bana, kuyendidzana nge tjilenje.”

⁹Koga Onani kaziba kuti bana banowozwagwa abatowobe babe, ndizo katebulila mbewu pasi kuti asizwalile nkulu uwe bana.

¹⁰Onani tjaakabe athama atjizoshathisa Yahwe ndizo na iye bakambulayabo.

¹¹Ipapo Juda kalebeleka na Tama nlongo uwe kati, “Yenda unogala kanyi kwenyu uli tjilikadzi kuswikila nkololo wangu Shela akula.” Juda wakaleba eijali ngoti wakabe etja kuti pamwe Shela na iye unodwa efabo se bakulu babe. Ndizo Tama kabgwilila kanyi kwabo.

¹²Shule kwe tjibaka nkadzi wa Juda nkololokadzi wa Shua kafa. Kati anyaladzika kayenda ne nzwalani uwe Hira we Adulamu ku Timina ku balume bakabe bekera pkhwizi dzidze.

¹³Kukati Tama abudziwa kuti tezwale babe ba mu zila banoyenda ku Timina kukera pkhwizi dzabo,

¹⁴kaambula zwiambalo zwe butjilikadzi kazwikwididza nge lusiri ngono kagala pa nkoba we Enaimi upa zila inoyenda ku Timina. Wakabe abona kuti Shela wakula koga aazompiwa kun'gala thaka.

¹⁵Juda kati embona kakumbula kuti i fukula ngoti wakabe akwididza buso gugwe.

¹⁶Juda kasizibe kuti nlongo we mwana uwe ngono kabhuda mu zila kayenda kunli kandwa kati, “Ima ndilale nawe.” Tama kabhuzwa kati, “Mowondipani kuti ndizo mulale nami?”

¹⁷Juda kashandula eti, “Ndowokupa mbudzana kudwa mu pkhwizi ne mbudzi dzangu.” Tama kabe eti, “Mundipeni tjandingasala ndakabhata kudzina mutumila mbudzana.”

¹⁸Juda kabe ebhuzwa eti, “Ini tjandingakupa?” Iye kadabila eti, “Ikoku kuna lutjwayo gwenyu ne nsungwana wago ne ludozo gwenyu gwamakabhata.” Ndizo kampa izo ngono kalala naye iye kazwisenga.

¹⁹Tama kabgwilila kanyi, kaambula lusiri kaambala zwiambalo zwizwe zwe butjilikadzi.

²⁰Juda katuma nzwalani uwe we Adulamu kunoyisa mbudzana ku nkadzi iwoyu ne kubuya ne zwaakasiya kunli, koga kasitongombona.

²¹Hira kabhuzwa balume bakabe begala ikoko kati, “Fukula iyeyi yakabe ili gele pa zila ku Enaimi ingayi?” Bakadabila beti, “Akuzotongo be ne fukula ipapa.”

²²Ngono kabgwilila kuna Juda kandwa kati, “Andizonwana. Naikobo balume banogala ikweno bakati akuzotongobe ne fukula ikweno.”

²³Ipapo Juda kati, “Ngaagale nazo ngoti tingadwa tisekiwa nge bathu. Iko ndakutuma kuyisa mbudzana koga wansheta.”

²⁴Kukati shule kwe mwedzi mitatu Juda kabudziwa kuyi, “Nlongo wenyu Tama wakathama bufukula una ntumbu.” Juda kabe eti, “Munduse apisiwe afe.”

²⁵Kati ipapo edusiwa kayisa ndayidzo kuna tezwale babe eti, “Ndakazwisengeswa nge mweni we zwithu izwezwi. Bonani kene mungaziba kuti ikoku kuthu kwe lutjwayo ne nsungwana wako ne ludozo igogu ngezwaani?”

²⁶Juda kazwiziba ngono kati, “Tama wakalulwama kundipinda, ngoti andizompa nkololo wangu Shela kunlobola.” Ngono Juda kasitongolala naye kakale.

²⁷Kukati tjibaka tje kutshibama kukwe tjiswika kukawanika kuna mabili mu nli.

²⁸Kati etshibama, mmwe we bana kadusa luboko gugwe, ntshibamisi bakasungilila thali shaba mu luboko bebe beti, “Iwoyu wazwagwa kutanga.”

²⁹Koga kakwebela luboko gugwe mukati nkwinya uwe kabe ezwagwa ngono ntshibamisi kabe eti, “Ndiko sekwa wazwibezhegwa zila.” Ndizo katumigwa zina kuyi Perezi.

³⁰Nkwinya uwe wakabe ana thali shaba mu luboko gugwe kazwagwa katumigwa zina kuyi Zera.