Read Kalanga Kutangisa 39 Bible Online

Kutangisa 39 - Kalanga bible

Kutangisa 39

¹Baishimaeli bakayenda na Josefa ku Egipiti. Potifa we Egipiti wakabe ali mmwe we hadzasha dza Faro, ali ntungamili we batjengeti, kantenga mu Baishimaeli bakabe bayenda naye ikoko.

²Yahwe bakabe bana Josefa ngono kabhudilila kwazo. Wakabe egala mu nzi wa tetshi uwe we Egipiti.

³Tetshi uwe kabona kuti Yahwe bakabe bana Josefa nenge kuti tjimwe ne tjimwe tjaanoshinga Yahwe banothama kuti tjibhudilile.

⁴Potifa kashathisiwa ndi Josefa ngono kanthama ntjengeti uwe kampa simba kutjengeta zose zwe nsha uwe.

⁵Kudwa mu zhuba ilelo laakanthama ntjengeti wa zose zwe nsha uwe Yahwe bakakombolela nsha wa Potifa N'egipiti ngekwa Josefa. Yahwe bakakombolela tjimwe ne tjimwe Potifa tjaakabe anatjo, zose zwakabe zwili mu nzi kene ku minda.

⁶Ndizo kalonga tjimwe ne tjimwe mu maboko a Josefa kutjitjengeta. Potifa wakabe asitjina tjimwe tjaanozwidziyidza nge kwatjo kuzhe kwe zojiwa zwaakabe eja. Josefa wakabe akabumbika kakale ali mmbuya ngolingwa.

⁷Shule kwe tjibaka nkadzi wa tetshi uwe katangisa kuyela Josefa njele ngono kandwa kati, “Lala nami.”

⁸Koga Josefa kalamba kadwa nkadzi wa tetshi uwe kati, “Bonani tetshi wangu aatodziyidzika nge tjimwe tji mu nzi, tjimwe ne tjimwe tjaanatjo wakatjilonga mu maboko angu kutjitjengeta.

⁹Akuna mmwe nkulu pandili mu nzi iwoyu. Tetshi wangu wakandipa masimba mu zwithu zose kuzhe kwenyu moga ngoti mu nkadzi uwe. Ngono ndingathama mbipo yakajali tjini nditjinyila Ndzimu?”

¹⁰Nenguba akalebeleka na Josefa zhuba ne zhuba Josefa wakalamba kulala naye na iko kube naye.

¹¹Limwe zhuba Josefa kangina mu ng'umba kunoshinga mishingo iye. Kwakabe kusina mmwe we balanda mukati.

¹²Nkadzi iwoyo kambhata nge jasi kati kunli, “Lala nami.” Koga Josefa kaphunyuka katizha kabhuda mu ng'umba esiya jasi mu luboko gugwe.

¹³Nkadzi wa Potifa kati ebona kuti Josefa waphudzumuka katizhila kuzhe kasiya jasi lile mu luboko gugwe,

¹⁴kadana balanda babe kati ku bali, “Bonani, wakatizhisila Nhebheru kuwotibilimila. Wangina imomu kuwolala nami, ngono abe ndimimila.

¹⁵Kati ehwa ndimimila kabe esiya jasi lile pandili etizha ebhuda mu ng'umba.”

¹⁶Nkadzi uwoyo katjengeta jasi ilelo kuswikila nlume uwe ebuya kanyi.

¹⁷Kabe etaulila nlume uwe eti, “Nlanda iwoyu we Nhebheru wamakatizhisila wakazha kuwondibilimila.

¹⁸Koga ndati ndimimila kabe esiya jasi lile pandili etizhila kuzhe kwe ng'umba.”

¹⁹Tetshi uwe kati ehwa lingano gwe nkadzi uwe eti, “Iyeyi ndiyo zila nlanda uwo yaandibhata ndiyo,” kazhala bushongola kwazo.

²⁰Katola Josefa kanlonga mu ng'umba ye busungwa yakabe ili ye basungwa ba mambo. Koga Josefa kati ali mu ng'umba ye busungwa,

²¹Yahwe bakabe naye, bakanthamila ludo gusingazunguzike bakathama kuti ashathise ntjengeti we ng'umba ye busungwa.

²²Ntjengeti we ng'umba ye busungwa kalonga basungwa bose ba mu ng'umba ye busungwa mu maboko a Josefa. Tjimwe ne tjimwe tjakabe tjishingwa imomo tjakabe tjishingwa ndiye.

²³Ntjengeti we ng'umba ye busungwa wakabe asingazwidziyidze nge tjimwe muna zwakabe zwili mu maboko a Josefa ngoti Yahwe bakabe bana Josefa bethama kuti tjimwe ne tjimwe tjaanothama tjibhudilile.