Read Kalanga Kutangisa 4 Bible Online

Kutangisa 4 - Kalanga bible

Kutangisa 4

¹Adamu kashangana ne nkadzi uwe Efa, ngono nkadzi kazwisenga kawana Kaini. Efa kabe eti, “Ndawana nkololo nge bhatsho ya Yahwe.”

²Shule kwe tjibaka kan'wanila nnung'una Abele. Abele kabe nthuwi we pkhwizi, Kaini iye kabe nlimi.

³Tjibaka tjakati tjiyenda, Kaini kazhisa zwimwe zwe zwidzwalo tjili tjibhayilo kuna Yahwe.

⁴Koga Abele kazhisa pkhwizi ne mbudzi dzidze dzakazwagwa kutanga dzakakola. Ngono Yahwe bakayitila hanya Abele ne tjibhayilo tjitje,

⁵koga bakashayila hanya Kaini ne tjibhayilo tjitje. Kaini kagwadza moyo kwazo ngono kasunamwa.

⁶Ipapo Yahwe bakabhuzwa Kaini bakati, “Wakagwadzilani moyo? Ini wakasunamwa?

⁷Apa ha ushinga tjakanaka aungaamutjigwe kene? Koga ha usingashinge tjakanaka, tjibi tjikulelile pa nkoba, tjoyemula kukulaula, koga iwe utjikunde.”

⁸Kaini kalebesana ne nnung'una uwe Abele kati, “Ngatibhudile kuzhe ku shango.” Ngono bakati babe ku shango, Kaini kamukila nnung'una uwe Abele kambulaya.

⁹Ngono Yahwe bakabhuzwa Kaini bakati, “Nnung'una uwo Abele ungayi?” Kadabila eti, “Anditoziba. Apa ndi nlisi we nnung'una wangu kene?”

¹⁰Ndizo Yahwe bakabe beti, “Wathamani kene? Malopa e nnung'una uwo anolilila kundili kudwa mu mavu.

¹¹Ngono ngwenu wabe ne bhiso, ngono watatiwa mu shango iyeyi yaashamisa nlomo wayo kuamutjila malopa e nnung'una uwo kudwa mu luboko gugo.

¹²Unowoti ulima, pasi apatjawodusa zwizwalo. Iwe unowobe n'yendan'yendi ne ndzungayili mu shango.”

¹³Kaini kabe eti kuna Yahwe, “Shamu yandalobgwa inondikulila.

¹⁴Bonani, nasi manditata mu shango, anditjowoboneka pamulipo. Ndowobe n'yendan'yendi ne ndzungayili mu shango. Mmwe ne mmwe wandiwana, unowondibulaya.”

¹⁵Koga Yahwe bakati kunli, “Akuzojalo, ha mmwe nthu angabulaya Kaini, unowobgwilizigwa shamu dzili kutendeka.” Ndizo Yahwe bakatjwaya Kaini kuti kusitongoyita ungan'wana kammbulaya.

¹⁶Ipapo Kaini kadwa pana Yahwe kanogala mu shango ye Nodi, ku bhezhuba kwe Edeni.

¹⁷Kaini kashangana ne nkadzi uwe ngono nkadzi kazwisenga kawana Enoki. Ipapo Kaini kabaka nzi nkulu, ngono kaudana nge zina le nkololo uwe Enoki.

¹⁸Enoki kazwala Iradi, Iradi kazwala Mehujaeli, Mehujaeli kazwala Methushaele, Methushaele kazwala Lameki.

¹⁹Lameki kalobola bakadzi babili, mmwe edang'wa kuyi Ada, mmwe kuyi Zila.

²⁰Ada kazwala Jabala, Jabala wakabe tate be ludzi gwakabe gugala mu mishasha guli bathuwi.

²¹Nnung'una uwe wakabe eyi Jubala, iye wakabe ali tate be balidzi be tjilidzo tje laya ne nyele.

²²Zila iye kazwala Tubalakaini, oyu wakabe nthuli we zwija zwakathamiwa nge phangula ne tshipi. Hazwadzi ya Tubalakaini yakabe ili Naama.

²³Lameki kati ku bakadzi babe, “Ada na Zila, mundihwilileni, imwi bakadzi ba Lameki, ihwani matama angu. Ndabulaya nlume ngoti andikubadza, nzhuzha wandihwisa zogwadza.

²⁴Ha kubulaya Kaini kubgwilizigwa shamu dzili kutendeka, wabulaya Lameki unowobgwilizigwa dzili makumi ali kutendeka ana dzili kutendeka (77).”

²⁵Adamu kashangana ne nkadzi uwe kakale ngono kawana mwana we tjilisana kantumila eti Seti, edwa kuti, “Ndzimu wandipa mmwe mwana mu bumo gwa Abele wakabulawa ndi Kaini.”

²⁶Seti iye kawanabo mwana we tjilisana kantumila eti Enoshi. Mu tjibaka itjetjo bathu bakatangisa kudana zina la Yahwe.