Read Kalanga Kutangisa 40 Bible Online

Kutangisa 40 - Kalanga bible

Kutangisa 40

¹Kwakati nge tjimwe tjibaka shule kwa ikoku mbhati we bhepe la mambo ne mbhiki wa mambo we Egipiti bakatjinyila mambo we Egipiti.

²Faro kagwadzila moyo hadzasha dzidze idzedzi mbili, mbhati we bhepe nkulu ne mbhiki nkulu,

³ngono kabalonga mu ng'umba ye nkulu we batjengeti be ng'umba ye busungwa kwakabe kuna Josefa.

⁴Nkulu we batjengeti kabapa Josefa kuti abashingile. Bakagala mu ng'umba ye busungwa tjibaka tjilefu.

⁵Gumwe busiku mu ng'umba ye busungwa mmwe ne mmwe we balume ibaba, mbhati we bhepe la mambo ne mbhiki wa mambo we Egipiti kawolota hwope dzakasiyana nenge kutjenesiwa kwadzo.

⁶Josefa kati ezha ku bali tjimuka mangwanana kawana bakatemeka mafupa.

⁷Ngono kabhuzwa hadzasha idzedzo dza Faro dzaakabe anadzo mu ng'umba ye busungwa mu nzi wa tetshi uwe kati, “Ini njiso dzenyu dzakafuba nasi?”

⁸Bakanshandula beti, “Talala tawolota ngono tasheta ungatjenesa mawoloto iyawa kuti anodwani.” Ipapo Josefa kabe eti, “Apa kutjenesiwa kwe hwope akutodwa ku Ndzimu kene? Mundibudze hwope dzenyu.”

⁹Ndizo mbhati we bhepe nkulu kabudza Josefa hwope dzidze eti, “Ndakawolota ndibona nzhambi mbeli kwangu.

¹⁰Nzhambi iwoyo wakabe una thabi dzili thatu. Tjinyolotjo ukathinila ngono ukabe ne zhambi dzakabidwa.

¹¹Bhepe la Faro lakabe lili mu luboko gwangu ngono atola zhambi adzishabila mu bhepe la Faro answiswa ilo.”

¹²Josefa kabe eti, “Tjadzinodwa etji. Thabi thatu mazhuba matatu.

¹³Mu mazhuba ali matatu Faro unowohwilila luposwa gugo ngono unowokubgwiliza ku nshingo uwo. Unowobhatila Faro bhepe lile sekwa wakabe uthama utji mbhati we bhepe lile.

¹⁴Koga kuti ha zwithu zwikuyendila zubuyanana undikumbule undiyitile buthu, ubudze Faro nge kwangu kuti ndibhude mu ng'umba ye busungwa iyeyi.

¹⁵Ngoti dumbu ndakakwibiwa mu shango ye Bahebheru na ipapa akuna tjandakathama tjingathama kuti ndilongwe mu ng'umba ye busungwa.”

¹⁶Kukati mbhiki nkulu ebona kuti Josefa wapa tjeneso mbuya kati kuna Josefa, “Namibo ndakawolota. Ndakabe ndakasenga seme thatu dzakatiliyana pa nsholo wangu.

¹⁷Mu seme yakabe ili pezhugwi tjose kwakabe kuna zojiwa zwakasiyana zwakabhikwa zwa Faro koga nyuni dzakabe dzizwija dzidusa mu seme pa nsholo wangu.”

¹⁸Josefa kabe eti tjadzinodwa etji, “Seme thatu mazhuba matatu.

¹⁹Mu mazhuba matatu Faro unowohwilila luposwa gugo ngono unowokulembeledza mu nti. Nyuni dzowoja nyama ye mbili uwo.”

²⁰Zhuba le butatu lakabe lili le mazwago a Faro ngono kathamila balanda babe nzano we zojiwa. Kabe egalila ndebo ye mbhati we bhepe nkulu ne ye mbhiki nkulu mbeli kwe hadzasha dzidze.

²¹Ngono kabgwiliza mbhati we bhepe nkulu mu nshingo uwe ndizo kabhatila Faro bhepe kakale,

²²koga kalembeledza mbhiki nkulu mu nti se kwakaleba Josefa etjenesa hwope dzabo.

²³Koga mbhati we bhepe nkulu kasitongo kumbula Josefa kankangang'wa.