Read Kalanga Kutangisa 41 Bible Online

Kutangisa 41 - Kalanga bible

Kutangisa 41

¹Kwakati kwapinda makole ali mabili Faro kawolota. Wakawolota ali mile pa gwizi gwe Naili,

²ngono kabona ng'ombe hadzi dzili kutendeka mbuya dzakakola, dzithathuha mu gwizi dzifula pakati kwe shanga dze gwizi.

³Ngono shule kwadzo kukathatuha dzimwe ng'ombe hadzi dzili kutendeka dzakabipa dzakawonda dzikama pana idzedzije dzimwe pa phili ye gwizi.

⁴Ngono ng'ombe dzakabe dzakabipa dzakawonda dzikaja idzedzija dzimwe dzili kutendeka dzakanaka dzakakola. Ipapo Faro kamuka.

⁵Ngono kabhakhwa nge hwope kakale kawolota gwe bubili ebona misholo ye mathunde ili kutendeka ina shanga dzakapunda mbuya yakamela mu tshinde lili ling'ompela.

⁶Shule kwayo kabona mimwe misholo ye mathunde yakaswaba yakapisiwa nge phepo inopisa se ye tjilambanyika.

⁷Misholo ye mathunde yakaswaba ikamidza misholo ili kutendeka yakapunda. Ipapo Faro kamuka ngono kawana ili kuti wabe ewolota.

⁸Tjimuka mangwanana Faro kadziyidzika mu meya, ndizo kanodana ng'anga dzose ne batjenjendu be Egipiti. Kababudza mawoloto awe koga kukasibe ne watubula kuatjenesa.

⁹Ipapo mbhati we bhepe nkulu le nkumbi la mambo, kati kuna Faro, “Nasi ndakumbula jinyo langu.

¹⁰Makati mmwe nsi imwi Faro magwadzila moyo balanda benyu, imi ne nkulu we babhiki mukatilonga mu ng'umba ye busungwa imu nzi we nkulu we batjengeti.

¹¹Kwakati busiku gumwe, mmwe ne mmwe wedu kawolota hwope dzina tjeneso yakasiyana.

¹²Takabe tina nzhuzha mmwe we Nhebheru ali nlanda we nkulu we batjengeti. Tikambudza mawoloto edu ngono kati tjenesela iwo epa mmwe ne mmwe wedu tjeneso ye hwope dzidze.

¹³Ngono kukashingikala koga sekwa akatitjenesela idzo. Imi ndakati ha bgwiliziwa mu nshingo wangu koga mbhiki kalembedziwa kafa.”

¹⁴Ipapo Faro katuma nthu kunodana Josefa, ngono kadusiwa mu ng'umba ye busungwa tjinyolotjo. Kati akera ndedu dzidze aambala zwiambalo zwipoga kayenda kuna Faro.

¹⁵Faro kati kuna Josefa, “Ndakawolota ngono akuna nthu ungatjenesa hwope idzedzi. Koga ndakahwa nge kuko kuyi awabudziwa hwope iwe ungadzitjenesa.”

¹⁶Josefa kashandula Faro eti, “Imi andingatubule, koga Ndzimu unowomupa tjeneso yamunoshaka.”

¹⁷Ipapo Faro kabe eti kuna Josefa, “Mu mawoloto angu ndakabe ndili mile mu phili dze Naili,

¹⁸ha ndibona ng'ombe hadzi dzili kutendeka dzithatuha mu gwizi dzakakola mbuyanana dzibe dzifula mu shanga dze gwizi.

¹⁹Shule kwadzo kukabhuda dzimwe ng'ombe hadzi dzili kutendeka dzakawunduluka, dzakawonda dzakabipa. Andithu abona ng'ombe dzakabipa sa idzedzi mu shango yose ye Egipiti.

²⁰Ng'ombe hadzi dzakawonda, dzikaja idzedzije dzakakola dzili kutendeka dzathatuha kutanga.

²¹Koga ne dzaja kwakabe kusina ungati ndidzo dzaja, dzakabe dzilingika dzakabipa koga se kutanga. Ngono ipapo amuka mu hwope.

²²Abhakhwa nge hwope kakale ngono awolota kakale ndibona misholo ili kutendeka ye mathude ina shanga dzakapunda mibuya yakamela mu tshinde ling'ompela.

²³Shule kwayo kukamela mimwe misholo ye mathunde ili kutendeka yakaswaba isina shanga yakapisiwa nge phepo inopisa se ye tjilambanyika.

²⁴Misholo ye mathunde yakaswaba ikamidza misholo ili kutendeka mibuya. Ndakabudza ikoku ng'anga, koga akuna yakatubula kutjenesa.”

²⁵Ipapo Josefa kati kuna Faro, “Mawoloto enyu mang'ompela, anodwa tjithu tjing'ompela. Ndzimu wamuzumbunulila tjawabe pejo nge kutjishinga.

²⁶Ng'ombe hadzi dzili kutendeka makole ali kutendeka ne misholo ye mathunde ili kutendeka makole ali kutendeka, mawoloto ali mang'ompela.

²⁷Ng'ombe hadzi dzili kutendeka idzedzi dzakathatuha shule dzakawonda, dzakabipa makole ali kutendeka ne misholo ye mathunde yakaswaba yakapisiwa nge phepo inopisa se ye tjilambanyika makole ali kutendekabo. Amilile makole ali kutendeka e bhamba.

²⁸Nditjo tjandakabudza Faro nditi Ndzimu wazumbunulila Faro tjawabe pejo nge kutjishinga.

²⁹Kwaswika makole ali kutendeka e bhokonyogwa mu shango yose ye Egipiti.

³⁰Shule kwawo kowozha makole ali kutendeka e bhamba. Ipapo bhokonyogwa lowokanganika mu Egipiti, zhala inowothukudza shango.

³¹Bhokonyogwa lowokanganika ngoti bhamba lowobe lakabipisisa.

³²Kubgwilulugwa kwe mawoloto a Faro kodwa kuti ikoku kwathang'wa nge Ndzimu ndizo Ndzimu unowokuthama tjinyolotjo.

³³“Ndizo ngwenu Faro ngaashalule nthu una hwisiso, wakatjenjela anthame ntjengeti we Egipiti.

³⁴Faro ngaabige bamwe balingi mu shango banowobe betola gaswa le bushanu mu zwivuno zwe Egipiti mu makole ali kutendeka e bhokonyogwa mu Egipiti.

³⁵Dusani ndaulo kuti bakubunganye zojiwa zose zwe makole iyawa akanaka anozha. Zwibiganyiwe mu mizi bazwitjengete.

³⁶Zojiwa izwezwi zwakafanila zwibiganyigwe shango, kuti zwishingisiwe mu makole ali kutendeka e bhamba iyawa anowozha mu Egipiti kuyita kuti shango isilobesiwe ne bhamba.”

³⁷Nkumbulo iwoyu ukashathisa Faro ne makulukota awe.

³⁸Faro kalebeleka ne makulukota awe eti, “Apa tingawana mmwe kumwe kene unonga iwoyu una meya ye Ndzimu kene?”

³⁹Ndizo Faro kabe eti kuna Josefa, “Ndzimu se wakulakidza ikoku, akuna mmwe wakatjenjela unohwisisa sawe.

⁴⁰Ndiwe unowotjengeta zwaka nzinda, bathu bangu bose banowohwilila ndayo dzidzo. Imi ndowobe nkulu pakuli nge bushe.”

⁴¹Ndizo Faro kadwa Josefa kati, “Bona, ndakuthama ntungamili we shango yose ye Egipiti.”

⁴²Ndizo Faro kadusa ring'i mu tjinyala tjitje kaambadza Josefa mu tjinyala. Kammbadza hazu dze jila lakanaka ne ndalama dze golide mu ntshibha uwe.

⁴³Kantathisa koloyi ye ngwa inotobela ya mambo nge mamo. Mbeli kukwe kukayenda bathu bakabe bepululudza beti, “Munthigamile!” Saikoko kanthama ntungamili we shango yose ye Egipiti.

⁴⁴Faro kati kuna Josefa, “Ndimi Faro, kuzhe kwe dama laungabe waleba akuna nthu ungathama tjithu kene tjipi zwatjo mu Egipiti.”

⁴⁵Faro katumila Josefa kati Zafenati Paneya ngono kampa Asenati nkololokadzi wa Potifera mpirisiti wa Oni kube nkadzi uwe. Josefa katendeleka mu shango ye Egipiti.

⁴⁶Josefa wakabe ana makole ali makumi matatu (30) tjibaka tjaakatangisa kushingila Faro mambo we Egipiti. Josefa kamilika pana Faro katendeleka mu shango yose ye Egipiti.

⁴⁷Mu makole iyawa ali kutendeka e bhokonyogwa kwakabe ne zojiwa zwinjinji kwazo.

⁴⁸Josefa kakubunganya zojiwa zose zwakawanika mu makole ali kutendeka e bhokonyogwa mu Egipiti kazwibiganya mu mizi. Mu nzi mmwe ne mmwe wakabe ebiganya zojiwa zwadwa mu minda yakaupoteleka.

⁴⁹Josefa kabiganya mathunde manjinji se nsetje we gungwa. Akabe ali manjinji kwaakadzina kaletja kuyela ngoti akabe epinda ndizanyo.

⁵⁰Josefa ne nkadzi uwe Asenati nkololokadzi wa Potifera mpirisiti wa Oni bakazwala bakololo babili makole e bhamba asathu kaswika.

⁵¹Josefa katumila mwana uwe we mbano eti Manase eti, “Ndzimu wakandithama kuti ndikangang'we kudziyila kwangu, ndikangang'we ne nsha wa tate bangu.”

⁵²Nkololo we bubili kantumila zina kati Ifureimi ngoti eti, “Ndzimu wandiwatsha mu shango ye kudziyila kwangu.”

⁵³Makole ali kutendeka e bhokonyogwa mu Egipiti kapela,

⁵⁴ngono makole ali kutendeka e bhamba katangisa sekwakaleba Josefa. Bhamba likabepo mu shango dzimwe dzose, koga mu shango yose ye Egipiti kwakabe kuna zojiwa.

⁵⁵Kukati shango yose ye Egipiti yabe ne bhamba, bathu bakalilila Faro beshaka zojiwa. Faro kabadwa kati, “Yendani kuna Josefa, ngono tjaanomudwa mu tjishinge.”

⁵⁶Kukati bhamba labe mu shango yose Josefa kazhula matula katengesela Baegipiti mathunde ngoti bhamba lakabe lakabipa mu shango yose ye Egipiti.

⁵⁷Shango yose ikazha ku Egipiti kutenga mathunde muna Josefa ngoti bhamba lakabe lakabipa mu shango yose.