Read Kalanga Kutangisa 42 Bible Online

Kutangisa 42 - Kalanga bible

Kutangisa 42

¹Jakubo kati ahwa kuti kuna mathunde ku Egipiti kati ku bakololo babe, “Mugelileni makalingana saikoku?

²Ndakahwa kuti kuna mathunde ku Egipiti. Yendani munotitengela mathunde kuti titjile tisife nge zhala.”

³Ndizo bakulu ba Josefa bali gumi bakayenda kunotenga mathunde ku Egipiti.

⁴Koga Jakubo kasitume Bhenjamini nnung'una wa Josefa ne bamwe ngoti wakabe etja kuti pamwe tjakabipa tjingan'wila.

⁵Ndizo bakololo ba Iziraela bakabe bali bamwe bakabe bayenda kunotenga mathunde ngoti zhala yakabe yaswika ne ku Kanana.

⁶Tjibaka itjetjo Josefa wakabe ali mbusi we shango iyeyo, ndiye wakabe etengesa mathunde ku bathu bose, ndizo bakulu ba Josefa bakazha bakanthigamila.

⁷Josefa kati ebona bakulu babe kabaziba, koga kazwitola se ntaya kabalebesa nge kubakaikanya ebhuzwa eti, “Madwa ngayi?” Ibo bakashandula beti, “Tadwa ku Kanana tawotenga zojiwa.”

⁸Nenguba Josefa akaziba bakulu babe ibo abazonziba.

⁹Ipapo kakumbula mawoloto awe nge kwabo ngono kati ku bali, “Imwi mu shodzi! Mazha kuwoshola shango yedu kuwobona paisakasima.”

¹⁰Bakadabila beti, “Tetshi wedu, akuzojalo, tazha kuwotenga zojiwa.

¹¹Tose ti bana be nthu. Ti balume banogalikabgwe, iswi balanda benyu ate tili shodzi.”

¹²Josefa kabe eti ku bali, “Akuna! Mazha kuwoshola shango kubona paisakasima.”

¹³Bakashandula beti, “Iswi takabe tili gumi lina babili, tili bana be nthu, bakololo be mmwe nlume unogala ku Kanana. Kologwe tjedu tjasala na tate bedu, mmwe aatjipo wakatisiya.”

¹⁴Josefa kati ku bali, “Konga sekwa ndaleba koga. Imwi mu shodzi!

¹⁵Koga zila ya munowoshogwa ndiyo eyi: Ndotuna na Faro, amungadwe mu magalo iyawa kuzhe kwe kuti nnung'una wenyu abe azha ipapa.

¹⁶Tumani mmwe wenyu anotola nnung'una wenyu, bamwe bose banowosala mu busungwa kuti matama enyu ashogwe kuti kene malebeswa. Ha musingalebese, ndotuna na Faro, mu shodzi!”

¹⁷Josefa kabalonga mu ng'umba ye busungwa mazhuba ali matatu.

¹⁸Mu zhuba le butatu Josefa kabadwa kati, “Imi ndotja Ndzimu, ndizo thamani tjandinoleba mutjile.

¹⁹Kulakidza kuti mu bathu banogalikabgwe, mmwe wenyu ngaasale mu busungwa ha bamwe beyisa mathunde ku misha yenyu inofa nge zhala.

²⁰Muzhise kologwe tjenyu kundili kuti matama enyu azhadzisike kuti ndizo musife nge zhala.” Ngono bakadumana nako.

²¹Bakalebesana tjekwabo beti, “Malebeswa tina nlandu ngekwe nnung'una wedu. Takabona dumbu kudziyidzika kukwe etikumbila koga iswi tikasihwilile, ndizo wali kudziyidzika ikoku kwatiwila.”

²²Rubheni kabe eti, “Apa andizomudwa ati musithame mbisana tjimwe tjakabipa kene? Koga amuzohwilila! Ndizo ngwenu lopa lile loshakwa mutili.”

²³Bakabe basingazibe kuti Josefa wakabe ebahwa se akabe eshingisa ntoloki.

²⁴Josefa kadwa pabali kanolila, koga kabuya kulebeleka nabo kakale. Katola Simiyoni mu bali kasungwa mbeli kwabo.

²⁵Josefa kalaya kuti hwomo dzabo dzipakiwe dzizhale mathunde. Ne kuti mmwe ne mmwe wabo abgwilizigwe mari mu hwomo iye, bapiwe mbuba dze gwendo gwabo. Bakathamigwa saikoko.

²⁶Bakabelesa hwomo dzabo mu madonki abo bakayenda.

²⁷Pa bakalala mmwe wabo kazhula hwomo kupa donki iye zojiwa ngono kawana mari awe pa nlomo we hwomo iye.

²⁸Kabe eti ku bamwe, “Mari angu abgwiliziwa, awawa mu hwomo yangu.” Bakalobgwa nge hana, bakalingana betetema ngono bakati, “Ini ikoku Ndzimu kwawatithamila kene?”

²⁹Bakati beswika kuna Jakubo tate babo mu shango ye Kanana, bakababudza kose kwakabashingikalila. Bakati,

³⁰“Mbusi we shango iyeyije wakatilebesa nge bushongola, katitola se shodzi dzinoshola shango.

³¹Koga iswi takandwa tikati, ‘Iswi ti bathu banogalikabgwe, ate tili shodzi.

³²Takabe tili bana be nthu tili gumi lina babili, mmwe wakatisiya, kologwe tjakasala na tate bedu ku Kanana.’

³³Nlume iwoyo kabe eti, ‘Ndowoziba kuti mu balume banogalikabgwe nge zila eyi, mmwe wenyu unowosala nami, bamwe banowotola mathunde bakaayisa ku misha yabo inofa nge zhala.

³⁴Muzhise kologwe tjenyu kundili. Ipapo ndowoziba kuti ate muli shodzi, koga mu balume banogalikabgwe. Ndizo ndowosunungula mmwe wenyu kuti ndizo mukowoshaba zwenyu mu shango iyeyi.’ ”

³⁵Bakati bopipha hwomo dzabo bakawana hwomwana dze mari mu hwomo ye mmwe ne mmwe wabo ina mari ayo. Bakati bebona mari bose na tate babo bakapaluka moyo.

³⁶Tate babo Jakubo bakati ku bali, “Manditolela bana bangu. Josefa aatjipo na Simiyoni aatjipo, ngono ngwenu moshakatola Bhenjamini. Tjimwe ne tjimwe tjogwisana nami.”

³⁷Ipapo Rubheni kabe eti, “Mundipe iye ndowontjengeta. Andingasambuza mubulaye bakololo bangu bose babili.”

³⁸Koga Jakubo kabe eti, “Nkololo wangu aatowoyenda ikweno namwi, nkulu uwe wakafa iye ndiye yega wakasala. Ha tjimwe tjakabipa tjingan'wila mu gwendo gwamunotola, mowobe mathama kuti ndidzine ndife nge moyo una shungu.”