Read Kalanga Kutangisa 43 Bible Online

Kutangisa 43 - Kalanga bible

Kutangisa 43

¹Bhamba lakabe lakabangalala zwalo mu shango.

²Kukati baja zojiwa zose zwabakabe badwa nazo ku Egipiti, tate babo bakati ku bali, “Bgwililani munotitengela zwimwe zojiwa.”

³Koga Juda kabe eti ku bali, “Nlume iwouje wakaleba ekowomesedza eti, ‘Andidi, kumubona kakale kuzhe kwe kuti mube muna nnung'una wenyu.’

⁴Ha mungatidumila kuyenda ne nnung'una wedu, tingayenda tikanomutengela zojiwa.

⁵Koga ha mulamba naye, atingayende ngoti nlume iwouje wakati, ‘Andidi kumubona, kakale kuzhe kwe kuti mube muna nnung'una wenyu.’ ”

⁶Iziraela kabe eti, “Makandizhisilani zogwadza zwakajali ngobudza nlume iwoyo kuti muna nnung'una kene?”

⁷Ibo bakashandula beti, “Nlume iwoyo wakabe etibhuzwisisa nge kwedu nenge nsha wa kanyi kwedu eti, ‘Tate benyu banotjila kene? Muna nnung'una kene?’ Tjatakambudza takabe tidabila bhuzo dzidze. Takabe tingaziba tjini kuti unowoti, ‘Izhani ne nnung'una wenyu kene?’ ”

⁸Juda kabe eti kuna tate babe Iziraela, “Mundipeni mbisana ndizo towotjimbidza milika tikayenda kuyita kuti iswi namwi ne bana bedu tisitongofa.

⁹Imi nge kwangu ndowontjengeta. Ha tjimwe tjingan'wila mubhuzwe imi. Ha ndisabuya naye kumuli ali mpezha munditole ndili nlandu mu butjilo gwangu gose.

¹⁰Ha takabe tisakanonoka tingabe takayenda tikabuya kabili.”

¹¹Ipapo tate babo Iziraela bakabadwa bakati, “Ha kwakafanila kuti kuijalo, thamani woku, pakani mu hwomo dzenyu zwipo zwakanaka zwinowang'wa mu shango iyeyi muyende nazo ku nlume ihwoyo. Mutole bhalimu ne butji gwe nyutji ne motsha ne nti we mira ne manongo ngosiyana kwawo ne mitjelo ye alimondi.

¹²Muyende ne themba mbili dze mari ngoti makafanila bgwiliza iyawa amakawana mu hwomo dzenyu, Pamwe bakabe baleyanya.

¹³Tolani nnung'una wenyu mumilike muyende ku nlume sangwenu.

¹⁴Ndzimu Masimbawose umubhatshe kuyita kuti nlume iwoyo aletje Simiyoni na Bhenjamini babuye namwi. Nge kwangu ha ndalashikigwa ndalashikigwa.”

¹⁵Ndizo balume ibaba bakatola zwipo izwezo ne themba ye mari ika bili, bakatola na Bhenjamini bakayenda ku Egipiti kuna Josefa.

¹⁶Josefa kati ebona Bhenjamini anabo, kadwa ntjengeti we ng'umba iye kati, “Tola balume ibaba ubayise ku ng'umba yangu, ubulaye ithuwo ululwamise zojiwa. Banowoja nami masikati.”

¹⁷Nlume iwoyo kathama sekwa abudziwa ndi Josefa, katola bathu ibabo kabayisa ku ng'umba ya Josefa.

¹⁸Balume ibabo bakapaluka moyo pabakayisiwa ku ng'umba ya Josefa. Bakakumbula beti, “Tazhisiwa ngeno nge mari akabgwiliziwa mu hwomo dzedu mu gwendo gwe kutanga. Unoshaka kutinginilila, atikulile, atithame balanda babe atitolele madonki edu.”

¹⁹Ndizo bakayenda ku ntjengeti wa Josefa bakalebeleka naye bali pa nkoba we ng'umba.

²⁰Bakabe beti kunli, “Tetshi wedu, takatongo zha pano tiwotenga zojiwa.

²¹Koga kwakati patakalala tikazhula hwomo dzedu mmwe ne mmwe kawana mari awe mu hwomo iye, themba yose izhele. Ndizo wali tazha nayo kuizhisa.

²²Tazha ne mamwe mari kutenga zwimwe zojiwa. Atitoziba kuti ndiani wakabgwiliza mari edu mu hwomo dzedu.”

²³Ntjengeti iwoyo kabe eti, “Musidziyidzike, Musitje, Ndzimu wenyu, iwo Ndzimu wa tate benyu, ndiwo wakamulongela mari mu hwomo dzenyu. Imi ndakaamutjila mari enyu.” Ipapo kabe ezhisa Simiyoni ku bali.

²⁴Ntjengeti iwoyo katola balume ibabo kabalonga mu ng'umba ya Josefa kabapa vula kungula makumbo, kapa madonki abo zojiwa.

²⁵Bakalulwamisa zwipo zwabo kuzwipa Josefa ha eswika masikati ngobe bakabe bahwa kuti banowoja zojiwa zwe masikati ipapo.

²⁶Josefa kati eswika kanyi, bakangina mu ng'umba bakanthigamila bakampa zwipo zwabazha nazo.

²⁷Kababhuzwa mamuko eti, “Tate benyu bamakandibudza nge kwabo banomuka kene? Apa batjatjila zwabo?”

²⁸Ibo bakati, “Tate bedu, nlanda wenyu, batjatjila banomuka.” Ngono bakathigamila Josefa kunteta.

²⁹Josefa kati emilidza mesho kabona nnung'una uwe Bhenjamini mwana wa mmeyabe. Kabhuzwa kati, “Nditjo kologwe tjenyu itjetji tjamakandibudza nge kwatjo? Ndzimu ube nawe mwanangu.”

³⁰Josefa kati ebona nnung'una uwe kazhigwa nge shungu ngono kabhuda kashaka paangalililapo. Kangina mu ng'umba iye kalilila muili.

³¹Kati asinongula buso gugwe kabhuda kazwisimisa kati, “Pakulani zojiwa.”

³²Bakapakulila Josefa tje kukwe, bakapakulila bana ba tate babe tje kwabo, Baegipiti banoja naye bakapakuligwa tje kwabo ngoti Baegipiti bakabe basingaje ne Bahebheru ngoti kuyila.

³³Bakulu babe bakagala mbeli kukwe nge kutobedzana sekwa bakazwagwa, kudwa ku mbano kunoti ku kologwe, ngono bakalingana bakatjenema.

³⁴Zojiwa zwikati zwipakugwa kudwa pa tafuli ya Josefa, Bhenjamini kapakuligwa ka shanu tjilizanyo tje mmwe ne mmwe wabo. Ndizo bakaja bakang'wa bakashatha naye.